"ჩვენ მთავრობა რუსეთის გუბერნიად გახდომისკენ მიგვექაჩება, არასოდეს მოხდება ეს" - რეჟისორი ნანა ჯორჯაძე
თბილისში, რესპუბლიკის მოედნიდან პარლამენტის მიმართულებით "ქალთა მოძრაობის მარში“ იმართება. რუსთაველის გამზირზე შეიკრიბნენ "ქალთა მოძრაობის“ წევრები, ასევე არასამთავრობო ორგანიზაციების წარმომადგენლები, უფლებადამცველები და რიგითი მოქალაქეები, მათ შეუერთდნენ ჟურნალისტებიც.
აქციის მონაწილეების თქმით, ისინი აპროტესტებენ პარლამენტის მიერ პირველი მოსმენით მიღებულ რუსულ კანონპროექტს "უცხოური გავლენის გამჭვირვალობის შესახებ“. მათი თქმით, კანონპროექტის კანონად მიღება თუ მოხდება, ეს დააზიანებს და შეზღუდავს ქალთა უფლებებს, რადგან მომავალში მიზნად ისახავს დასავლური ორგანიზაციების ქვეყნიდან გასვლას. მსგავსი აქცია საქართველოს რეგიონებშიც იმართება.
პროტესტს შეუერთდა ქართველი კინორეჟისორი, სცენარისტი და მსახიობი ნანა ჯორჯაძე, რომელმაც "ტვ პირველთან“ კომენტარი აქციიდან გააკეთა:
"მგონია, რომ ყველას, ვისაც საქართველო თავის სამშობლოდ მიაჩნია და მოღალატე არ არის თავისი ქვეყნის და ერის, უნდა გამოვიდეს და დაიცვას ქვეყნის თავისუფლება, დამოუკიდებლობა და ევროპაში ინტეგრაცია, სხვა გზა ჩვენ არა გვაქვს. ჩვენ მთავრობა რუსეთის გუბერნიად გახდომისკენ მიგვექაჩება, არასოდეს მოხდება ეს. არასდროს არც ერთ პარტიას არ ვეკუთვნოდი, არასოდეს ვყოფილვარ, ვარ და არ ვიქნები არც ერთი პარტიის წევრი. ჩემი ერთადერთი სატკივარი არის ჩემი სამშობლო, რასაც საქართველო ჰქვია, სულ არ მაინტერესებს პარტიების პოზიციები“.