"სოზარ სუბარი არის ჩემი ნათესავი და მინდა მას მივმართო... მგონია, რომ გავა დრო და საკუთარ შვილებსა და შვილიშვილებს სირცხვილით შეხედავ" - ანა სუბელიანი
ანა სუბელიანი სოზარ სუბარს პირდაპირ ეთერში მიმართავს. აქტივისტი ამბობს, რომ დეპუტატი მისი ნათესავია და „ხალხის ძალის“ ლიდერს "უცხოური გავლენის გამჭვირვალობის შესახებ“ კანონპროექტის შესახებ გადახედვისკენ მოუწოდებს.
"სოზარ სუბარი არის ჩემი ნათესავი და მინდა მას მივმართო. სოზარ, მგონია, რომ გავა დრო და საკუთარ შვილებსა და შვილიშვილებს სირცხვილით შეხედავ თვალებში, როცა გაგახსენდება რომ ამ კანონპროექტის ერთ-ერთი ინიციატორი იყავი. შენ კარგად იცი, რას ნიშნავს იღებდე მხარდაჭერას დასავლური ქვეყნებიდან და ამ მხარდაჭერის შედეგად რამდენი სარგებელი მიუღია თითოეულ მოქალაქეს ამ ქვეყნის.
სტუდენტებს, პროფესიონალებს, სხვადასხვა მოწყვლად ჯგუფებს, ეს შენ ძალიან კარგად იცი, გამოცდილი გაქვს, გიმუშავია ამ თემებზე და ამ ყველაფრის ცოდნის ფონზე, რომ ასეთ მავნებლურ ინიციატივას უყრი საფუძველს, მე ვფიქრობ, რომ ამის ძალიან შეგრცხვება.
თუ კი ჯერ კიდევ არსებობს დრო, იქნებ შენც და შენი კოლეგებიც დაფიქრდეთ და გადახედოთ თქვენს გადაწყვეტილებას" - აღნიშნა სუბელიანმა.
შეგახსენებთ, რომ კანონპროექტი "უცხოური გავლენის აგენტის გამოსავლენად" იუსტიციის სამინისტროს უფლებამოსილებას ანიჭებს ჩაატაროს კვლევა. უცხოური გავლენის აგენტად რეგისტრაციისთვის თავის არიდებისთვის ან დეკლარაციის არშევსება გამოიწვევს ორგანიზაციის დაჯარიმებას 25 ათასი ლარის ოდენობით. პროექტით ასევე გათვალისწინებულია შემდეგი სახის ჯარიმები:
იუსტიციის სამინისტროს ვებ-გვერდზე დაშვებიდან 10 სამუშაო დღის ვადაში, თუ ორგანიზაცია არ შეავსებს განაცხადის ფორმას - 10 ათასი ლარი; დოკუმენტებში ხარვეზების განსაზღვრულ ვადაში არგამოსწორების შემთხვევაში - 10 ათასი ლარი; კანონით გათვალისწინებული სამართალდარღვევის ერთი თვის შემდეგ ჩადენა - 20 ათასი ლარი.
კანონის ინიციატორი პარტია „ხალხის ძალაა,“ რომლის ერთ-ერთი ლიდერიც სოზარ სუბარი გახლავთ.
ნახეთ ვიდეო: