თოვლი, ქარბუქი, ზვავსაშიშროება: როდემდე გაგრძელდება უამინდობა საქართველოში - რას აცხადებს სვეტლანა ნიორაძე? - "მიწისძვრა და კატაკლიზმები ამ ამინდებთან არაფერ შუაშია"
თბილისში 13 თებერვლის მზიანი დილა, მოულოდნელად შუადღეს ამოვარდნილმა ქარმა და თოვამ შეცვალა. ამინდის გაუარესებამ მოსახლეობა შეაშფოთა. სოციალურ ქსელში წერდნენ, ხომ არ იყო რაიმე კავშირში ბოლო დროს მომხდარ მიწისძვრებთან.
კიდევ რამდენი დღე გაგრძელდება ქვეყანაში უამინდობა, ამ საკითხზე ambebi.ge-ს გარემოს ეროვნული სააგენტოს ჰიდრომეტეოროლოგიური პროგნოზების სამმართველოს უფროსი, სვეტლანა ნიორაძე ესაუბრა:
- ჩვენ ჯერ კიდევ გუშინ გავავრცელეთ განცხადება, რომ ამინდი შეიცვლებოდა. ახლა დასავლეთ საქართველოში ყველგან თოვს. თბილისში ქარი გაძლიერდება, დედაქალაქში ძლიერ ქარს ველოდებით. შემდეგ ცოტა ხანს თოვა გაჩერდება, თუმცა ზეგიდან ისევ უამინდობა გველის, ძლიერი ქარით. თბილისში 16 თებერვალს ისევ გათოვდება. დასავლეთ საქართველოში ითოვებს 15-ში, 16-სა და 17-ში.
მაღალ მთებში იქნება ქარბუქი, ზვავსაშიშროება, საავტომობილო გზებზე - ლიპყინული. ტრანსპორტს შეეზღუდება მოძრაობა. 18 თებერვლამდე ასეთ ამინდს ველოდებით. შემდეგ, ნალექი ასეთი ინტენსიური არ იქნება, ტემპერატურაც ნელ-ნელა მოიმატებს, მაგრამ გაზაფხულის ამინდი ჯერჯერობით არ ჩანს. მიწისძვრა და კატაკლიზმები ამ ამინდებთან არაფერ შუაშია.