ბრაზილიის ყოფილი პრეზიდენტი, ჟაირ ბოლსონარუ საავადმყოფოში გადაიყვანეს
ბრაზილიის ყოფილი პრეზიდენტი, ჟაირ ბოლსონარუ, მუცლის მწვავე ტკივილით, ფლორიდის საავადმყოფოში გადაიყვანეს. ამის შესახებ მისმა მეუღლემ განაცხადა. აღსანიშნავია, რომ ეს მას შემდეგ მოხდა, რაც ბოლსონარუს თასობით მხარდამჭერი ბრაზილიის დედაქალაქში, სამთავრობო შენობაში შეიჭრა.
ცნობისთვის, ყოფილი პრეზიდენტი 2018 წელს დაჭრეს და მას შემდეგ ჯანმრთელობის პრობლემები აქვს. ის არაერთხელ გადაიყვანეს საავადმყოფოში.
ოჯახთან დაახლოებული პირის თქმით, ბოლსონარუს მდგომარეობა შემაშფოთებელი არ არის
ბოლსონარუმ ბრაზილია დაახლოებით 10 დღის წინ დატოვა მას შემდეგ, რაც უარი თქვა პრეზიდენტ ლუის ინასიო ლულასთვის ძალაუფლების გადაცემაში მონაწილეობაზე.
ბოლსონარუს მომხრეები მიიჩნევენ, რომ 2022 წლის ოქტომბერში ჩატარებული არჩევნები გაყალბდა. 8 იანვარს შეიჭრნენ ქვეყნის კონგრესში, პრეზიდენტის სასახლესა და უზენაეს სასამართლოში. პოლიციამ მათ დასაშლელად ცრემლმდენი გაზი გამოიყენა.