მიხეილ სააკაშვილმა ილია მეორეს მისალოცი წერილი გაუგზავნა - რას ამბობს ექსპრეზიდენტის ადვოკატი
საქართველოს მესამე პრეზიდენტის ინტერესების დამცველის, ილია ლომიას განცხადებით, ექსპერტიზის ჩატარებაზე დათანხმდებიან, თუ ნიმუშები საზღვარგარეთ გადაიგზავნება და პროცესში მათივე ექსპერტი ჩართული იქნება.
"სამხარაულის ეროვნული ბიურო ფრჩხილისა და თმის ნიმუშებზე ექსპერტიზას ვერ ჩაატარებს. აქედან გამომდინარე, ჩვენი პოზიცია იყო ის, რომ ასეთი გამოკვლევები საზღვარგარეთ ჩატარდეს ჩვენი სპეციალისტის მონაწილეობით, თუ ასეთს საგამოძიებო სამსახური ჩაატარებს,” - განაცხადა ლომიამ.
- მისივე თქმით, მიხეილ სააკაშვილმა საქართველოს პატრიარქს წინასაშობაო მისალოცი ბარათი გაუგზავნა.
"პატრიარქს ილია მეორეს მიმართა წერილით, ულოცავს დამდეგ შობა-ახალ წელს. წერილის შინაარსი არ ვიცი, მაგრამ მისალოცი ბარათი გაუგზავნა”, - აღნიშნა ლომიამ.
უფლებადამცველის თქმით, ყოფილი პრეზიდენტის ჯანმრთელობის მდგომარეობა უცვლელია.
"მისი მდგომარეობა უცვლელია, თავს გრძნობს ცუდად, როგორც ყოველთვის უჭირს გადაადგილება, მაღალი ტემპერატურა აქვს და ასევე, საკვებს ვერ იღებს", - აცხადებს ლომია.