"კახა კალაძე მაშინ დამიდგა გვერდით, როცა ყველაზე მეტად მიჭირდა! მაშინ არც კი ვიცნობდი" - რას წერს კოტე ზარნაძე თბილისის მერის შესახებ?
გლდანის მაჟორიტარი დეპუტატი კოტე ზარნაძე თბილისის მერისა და ვაკის ტრაგედიას გადარჩენილი ლაზარე ლობჟანიძის გარშემო შექმნილ აჟიოტაჟს კიდევ ერთხელ ეხმაურება.
დეპუტატი, რომელიც ლაზარეს მამის მეგობარია წერს, რომ ბოლო დღეებში "უცოდველ ბავშვს უშვერი სიტყვებით ლანძღავენ".
ის ასევე იხსენებს იმ დროს, როდესაც თბილისის მერი გაიცნო. კოტე ზარნაძის თქმით, კალაძე იმ დროს დაუდგა გვერდით, როცა ყველაზე მეტად უჭირდა.
"კახა კალაძე იყო ადამიანი, რომელიც მართლა დამიდგა გვერდით, მაშინ როცა თანადგომა ყველაზე მეტად მჭირდებოდა, მაშინ როცა ყველაზე მეტად მიჭირდა! არც კი ვიცნობდი ამას ისე აკეთებდა!ახლაც გვერდით მიდგას, ოღონდ არა პირადი საჭიროებებისთვის.
დღეს, მე სწორედ კახა კალაძის ხელით ვაკეთებ იმდენ სიკეთეს, რამდენიც არც ერთ იმ ადამიანს არ დაესიზმრება, რომლებმაც ბოლო დღეების განმავლობაში შუბლის ძარღვი გაიწყვიტეს და პატარა, უცოდველ ბავშვს უშვერი სიტყვებით ლანძღავენ!" - წერს ზარნაძე.
ცნობისთვის, კოტე ზარნაძე იყო ინიციატორი კახა კალაძისა და ლაზარე ლობჟანიძის შეხვედრის ინიციატორიც. როგორც მან ჩვენთან საუბარში თქვა, მოზარდმა მერთან შეხვედრა თავად მოისურვა და ამაზე აჟიოტაჟის ატეხვა არასწორია.
რაც შეეხება თბილისის მერისა და ზარნაძის ურთიერთობას, მან კალაძე წლების წინ გაიცნო, როცა მის ცხოვრებაში რთული პერიოდი დადგა. რამდენიმე თვის წინ AMBEBI.GE-სთვის მიცემულ ინტერვიუში ახალგაზრდა დეპუტატი ჰყვებოდა, რომ მისი სიცოცხლის გადარჩენა კახა კალაძის დამსახურებაა.
"2017 წელს, როცა თბილისის მერობის არჩევნებზე კახა კალაძემ დააყენა კანდიდატურა, ავდექი და მივწერე. მანამდე გეტყვით, რომ როცა ლეიკემია აღმომაჩნდა, კახა ძალიან დამეხმარა. ამ ადამიანს საერთოდ არ ვიცნობდი, როგორც ყოფილი ფეხბურთელი ფეხბურთელს, ისე დამეხმარა. ასევე ჩემს გამოჯანმრთელებაში წვლილი მიუძღვის ლევან კობიაშვილსაც. კახას პირდაპირ მივწერე მადლობა - როცა ყველაზე მეტად მჭირდებოდა, მაშინ დამიდექით გვერდით, ახლა ჩემი ჯერია, გლდანში ბევრ ადამიანს ვიცნობ და რითაც შემიძლია, დაგეხმარებით-მეთქი. საერთოდ არ ვფიქრობდი, რომ ჩვენი ურთიერთობა ასე განვითარდებოდა. მოკლედ, მერის არჩევნებში აქტიურად ჩავერთე. როცა კახა მერი გახდა, თვითონ დამიძახა და მერიაში მუშაობა შემომთავაზა. იმ პერიოდში ეს ჩემთვის ხსნა იყო იმიტომ, რომ არ მინდოდა საპოლიციო სისტემაში ყოფნა. გავიარე კონკურსები და მერიაში უსაფრთხოების მონიტორინგის განყოფილების უფროსად დავიწყე მუშაობა, რამაც დიდი გამოცდილება შემძინა. შემდეგ გადმოვედი გლდანის გამგებლის მოადგილის პოზიციაზე, ინფრასტრუქტურისა და მშენებლობის მიმართულებით. გარდა იმისა, რომ ეს რაიონი ძალიან მიყვარდა და მიყვარს, მისი თითოეული ქუჩის პრობლემა და მათი გადაჭრის გზები ვისწავლე. კარგად მოვახერხე ადაპტირება და თავიდან ბოლომდე ჩავერთე ამ პროცესში" - ჰყვებოდა კოტე ზარნაძე.
ნახეთ ასევე:
- "ფოტოები ლაზარემ თავად დადო... ვუთხარი, იცოდე, ამას შეიძლება ცუდი კომენტარები მოჰყვეს-თქო" - რას ამბობს კალაძისა და ლაზარეს შეხვედრის ინიციატორი, კოტე ზარნაძე?
- "22 წლის ასაკში ლეიკემიამ ცხოვრება თავდაყირა დამიყენა... კლინიკიდან სხვა ადამიანი გამოვედი" - 28 წლის დეპუტატის ორი გამარჯვება და გზა ფეხბურთიდან პოლიტიკამდე