"აშშ-ის დაზვერვაში თვლიან, რომ დარია დუგინას მკვლელობის უკან შესაძლოა, უკრაინის მთავრობის წარმომადგენლები იდგნენ" - New York Times
აშშ-ში თვლიან, რომ კრემლის იდეოლოგიის მთავარი შემოქმედის, ულტრამემარჯვენე ფილოსოფოსის, ალექსანდრ დუგინის ქალიშვილი, დარია დუგინა შესაძლოა, უკრაინის მთავრობის ზოგიერთი წარმომადგენლის თანხმობით მოკლეს, ამის შესახებ The New York Times-ი აშშ-ის დაზვერვის სამსახურებთან დაკავშირებულ წყაროებზე დაყრდნობით წერს, რომელთა ვინაობასაც გამოცემა არ ასახელებს.
უკრაინა უარყოფს რაიმე სახის მონაწილეობას მკვლელობაში, მაგრამ "ნიუ იორკ თაიმსის" მიხედვით, აშშ-ის დაზვერვამ გაიზიარა შეფასება, რომ უკრაინის მთავრობის წარმომადგენლებმა სავარაუდოდ, თავდასხმის უფლება მისცეს. ეს ნარატივი ეხმიანება და გარკვეულწილად იმეორებს რუსეთის მთავრობის პრეტენზიების უკრაინასთან აღნიშნულ თემასთან დაკავშირებით.
გამოცემის წყაროებს არ უთქვამთ კონკრეტული გვარები, თუ ვინ შეიძლება იდგეს ამ საქმის უკან, ან იცოდა თუ არა აღნიშნულის შესახებ უკრაინის პრეზიდენტმა ვოლოდიმირ ზელენსკიმ.
აღსანიშნავია, რომ მოგვიანებით, CNN-მაც გამოაქვეყნა ინფორმაცია დაზვერვის წყაროებზე დაყრდნობით იმის შესახებ, რომ შესაძლოა, თავდასხმა უკრაინის მთავრობის წარმომადგენლების მიერ ყოფილიყო ნებადართული.
"ნიუ იორკ თაიმსი" წერს, რომ ამერიკული დაზვერვის სამსახურის წარმომადგენლების თქმით, ამერიკას მომხდართან არაფერი აკავშირებს. მათი განმარტებით, აშშ-ის დაზვერვას არ მიუწოდებია ინფორმაცია უკრაინისთვის დუგინას შესახებ და არ დახმარებია თავდასხმის მომზადებაში.
ცნობისთვის, 20 აგვისტოს, მოსკოვის გარეუბანში აფეთქდა ავტომობილი, რომელსაც ცნობილი ნაციონალისტი იდეოლოგის, ალექსანდრ დუგინის ქალიშვილი, 30 წლის დარია დუგინა მართავდა. რუსეთის საგამოძიებო კომიტეტის განცხადებით, მანქანაში, სავარაუდოდ, ასაფეთქებელი მოწყობილობა იყო დამონტაჟებული. დუგინა იყო "საერთაშორისო ევრაზიული მოძრაობის“ პოლიტიკური კომენტატორი.