"უკრაინა თავისას დაიბრუნებს, ყველგან ჩვენი დროშა იქნება" - უკრაინელებმა ქალაქი ლიმანი  სრულად გაათავისუფლეს

უკრაინელებმა ქალაქი ლიმანი სრულად გაათავისუფლეს. მედიის ინფორმაციით, აღნიშნულის შესახებ უკრაინის პრეზიდენტის ოფისის ხელმძღვანელის მოადგილემ, კირილ ტიმოშენკომ სოციალურ ქსელში დაწერა.

"უკრაინის შეიარაღებულმა ძალებმა, კერძოდ, 81-ე სადესანტო ბრიგადამ, უკრაინის ეროვნული გვარდიის ნაწილებთან და კულჩიცკის ბატალიონთან ერთად გაათავისუფლა და კონტროლქვეშ აიყვანა დონეცკის ოლქის ლიმანის დასახლება“, – წერს ტიმოშენკო.

მანამდე მედიაში გავრცელდა სურათები, რომელზეც უკრაინელი ჯარისკაცები ლიმანის შესასვლელში უკრაინის დროშას აღმართავენ.

• "დონეცკის ოლქის ლიმანში რამე ფსევდორეფერენდუმის ნიშანიც კი აღარ არის", - ამის შესახებ უკრაინის პრეზიდენტმა ვოლოდიმირ ზელენსკიმ ვიდეომიმართვაში განაცხადა.

მისი თქმით, ამ კვირაში დონბასში უკრაინის დროშები მომრავლდა, ხოლო ერთ კვირაში კიდევ უფრო მეტი იქნება.

“მაშინ რა ფსევდორეფერენდუმი? ეს რა, ორი დონეცკის ოლქი არსებობს? დონეცკის ოლქის იამპოლის ორი დასახლება? ან ტორსკოეს ორი დასახლება? უკრაინის წინსვლა გაგრძელდება. უკრაინის დროშა უკვე დონეცკის ოლქის ლიმანშია. იქ უკვე აღარ არის რამე ფრევდორეფერენდუმის ნიშანიც კი”, - განაცხადა ზელენსკიმ.

• პრეზიდენტმა აღნიშნა, რომ უკრაინისთვის ტერიტორიების დაბრუნება ლოგიკურია, მტრისთვის კი ასეთი “შეუსაბამობები” სულ უფრო და უფრო მეტი იქნება.

“უკრაინა თავისას დაიბრუნებს. აღმოსავლეთშიც და სამხრეთშიც. იმასაც, რის ანექსირებასაც ახლა ცდილობდით და ყირიმსაც, რომელსაც 2014 წლიდან ანექსირებულს ეძახიან. ყველგან ჩვენი დროშა იქნება”, - თქვა ზელენსკიმ.