ბელგოროდში მდებარე სამხედრო ნაწილიდან რუსი ჯარისკაცი "კამაზით" გაიქცა - "წაიღო ავტომატი და დანაყოფი დატოვა"

რუსეთში პოლიციამ დააკავა შეიარაღებული, კონტრაქტორი რუსი ჯარისკაცი, რომელიც ბელგოროდის რაიონში მდებარე სამხედრო ნაწილიდან მოპარული, "კამაზის“ სამხედრო სატვირთო მანქანით გაიქცა. ამის შესახებ "ტელეგრამ“ არხი Baza იტყობინება.

მათი ცნობით, 43 წლის ვიქტორ პერეკიპსკი სამხედრო ნაწილიდან 23 სექტემბრის ღამით გაიქცა. მან თან წაიღო ავტომატი, ვაზნები, ჩაჯდა სატვირთო მანქანაში და დანაყოფის ტერიტორია დატოვა.

კურსკის რაიონში მან სატვირთო ავომობილი გზის პირას დატოვა და მიიმალა. გაქცეულ ჯარისკაცს ეძებდა რუსეთის შსს და რუსეთის გვარდიის თანამშრომლები და ის ამჟამად დაკავებულია.

როგორც gazeta.ru წერს, ძებნა დეზერტირზე მას შემდეგ დაიწყო, რაც ოჯახმა განგაში ატეხა, რადგანაც კაცს ვერ უკავშირდებოდნენ.

მედიის ცნობით, კაცი აპირებდა კონტრაქტის გაწყვეტას, მაგრამ მობილიზაციის გამოცხადების შემდეგ მიხვდა, რომ ამას ვეღარ შეძლებდა, რის გამოც გაქცევა გადაწყვიტა. ჯარისკაცი დაკავებულია და ის დაკითხვაზეა გადაყვანილი.