"მარიუპოლში წასვლა რომ შემეძლოს, აუცილებლად წავიდოდი...“ - "აზოვსტალის" მცველი 21 წლის გოგონა, რომელიც ოკუპანტების ტყვეობაშიც არ გატყდა
რუსული მედია წერს, რომ"აზოვსტალის" მცველი კატერინა პოლიშჩუკი, მეტსახელად, "ჩიტი“ ცოცხალია. ტყვეობაში ჩავარდნის შემდეგ, მისი პირველი ვიდეო რუსულმა პროპაგანდისტულმა მედიამ გამოაქვეყნა.
ტერნოპოლელი გოგონა ომის დაწყებიდან მალევე მთელმა მსოფლიომ გაიცნო. 21 წლის კატერინა მარიუპოლის მცველებს სამედიცინო დახმარებას უწევდა და თავისი სიმღერით ამხნევებდა, რის ამსახველ ვიდეოებსაც სოციალურ ქსელში აქვეყნებდა. უკრაინული მედია წერს, რომ ხალხმა ყურადღება არ უნდა მიაქციოს რუსების მიერ ვიდეოზე გაკეთებულ შეფასებებს, რომელშიც წერენ, რომ გოგონა ხალხის დახოცვას არ ნანობს.
"მივიჩნევ, რომ როგორც მედდას, მაქსიმალური სარგებელი მომაქვს. მე არ წავსულვარ "აზოვსტალში" მზარეულად, იმიტომ რომ ცუდად ვამზადებ, არც მსროლელად ან არტილერისტად. მიმაჩნია, რომ ყველაზე დიდი სარგებელი მოვიტანე, როგორც მედიკოსმა. ერთადერთი რაზეც ვდარდობ, არის ის, რომ ერთ-ერთ ვიდეოში ვიგინებოდი. ამის გამო, დედაჩემის მრცხვენია...“
კითხვაზე არჩევანის შემთხვევაში წავიდოდა თუ არა ისევ მარიუპოლში, გოგონამ უპასუხა: "ვფიქრობ, რომ მარიუპოლში წასვლა რომ შემეძლოს, აუცილებლად წავიდოდი...“
ვიდეოს დასასრულს კადრში ჩანს, რომ ოკუპანტებს 5 დაპატიმრებული სამხედრო ქალი გაყავთ.
"აზოვსტალის" დამცველები ოკუპანტებს კარგა ხნის განმავლობაში უწევდნენ წინააღმდეგობას და დიდი ზარალიც მიაყენეს. მათი ევაკუაციის ოპერაცია 17 მაისს დაიწყო. ევაკუაციის ფარგლებში, მარიუპოლში "აზოვსტალის" ქარხნიდან ყველა უკრაინელი სამხედრო რუსული ძალების თანხლებით მათ მიერ კონტროლირებად ტერიტორიებზე გადაიყვანეს, მათ შორის გახლდათ ეკატერინა პოლინჩუკიც. უკრაინის თავდაცვის მინისტრის მოადგილემ თქვა, რომ უკრაინის მიერ კონტროლირებად ტერიტორიაზე დასაბრუნებლად მათ რუს ტყვეებში გაცვლიდნენ.
იხილეთ ასევე: