ევროპა ბირთვულ კატასტროფას ამჯერად გადარჩა: ზაპოროჟიეს ატომურ ელექტროსადგურს ელექტრომომარაგება სულ ცოტა 2-ჯერ შეუწყდა - რა მდგომარეობაა ამჟამად?
ატომური ენერგიის საერთაშორისო სააგენტო (IAEA), ზაპოროჟიეს ატომურ ელექტროსადგურზე მყოფ უკრაინელ პერსონალზე დაყრდნობით, ავრცელებს ინფორმაციას, რომ ამჟამად სადგურს ელექტროენერგია მიეწოდება ახლომდებარე თბოსადგურის ერთი წყაროდან და ავარიის საფრთხე აღარ არსებობს. მოგეხსნებებათ, 25 აგვისტოს სადგურზე ელექტროენერგიის მიწოდება მინიმუმ ორჯერ შეწყდა.
სააგენტო წერს, რომ ბირთვული უსაფრთხოების უზრუნველსაყოფად აუცილებელია ელექტროენერგიის უსაფრთხო მიწოდება ქსელიდან. თუმცა, გარე წყაროებზე ხელმისაწვდომობასთან დაკავშირებული პრობლემების დროს, სადგურებს დიზელის საწვავზე მომუშავე სარეზერვო გენერატორები აქვს. რაზეც, სააგენტოს განცხადებით, ზაპოროჟიეს ატომური ელექტროსადგურის პერსონალსაც მოუწვდება ხელი. ელექტროენერგიის გარე წყაროებთან წვდომა დაიკარგა, მას შემდეგ სადგურის ახლოს გაჩენილმა ხანძარმა დააზიანა სადგურის ელექტროენერგიის წყაროსთან დამაკავშირებელი ხაზები.
უკრაინის პრეზიდენტი, ვოლოდიმირ ზელენსკი აცხადებს, რომ ისტორიაში პირველად, დაბომბვის შედეგად ელექტროგადამცემი ხაზების დაზიანების გამო, ზაპოროჟიეს ატომური ელექტროსადგური გაჩერდა და ავტომატური სისტემა რომ არ ამუშავებულიყო და პერსონალს სათანადოდ არ ემოქმედა, რადიაციული ავარია მოხდებოდა.
“25 აგვისტოს ისტორიაში პირველად ზაპოროჟიეს ატომური ელექტროსადგური გაჩერდა. საავარიო დაცვამ იმუშავა. დიზელის გენერატორები მაშინვე ამოქმედდა, რათა ელექტროსადგურისთვის ელექტროენერგიის მიწოდება მომხდარიყო. მსოფლიომ უნდა გაიგოს, რა საფრთხეა ეს: დიზელის გენერატორები რომ არ ჩართულიყო, ავტომატურ დაცვას არ ემუშავა და ელექტროსადგურის ჩვენ თანამშრომლებს არ ემოქმედათ, იძულებული გავხდებოდით რადიაციული ავარიის შედეგები დაგვეძლია. რუსეთმა უკრაინა და ყველა ევროპელი ჩააყენა სიტუაციაში, როდესაც რადიაციულ კატასტროფას ერთი ნაბიჯი აშორებდათ“, - აღნიშნა ზელენსკიმ.
მისი თქმით, ატომურ ელექტროსადგურზე რუსული ჯარების ყოფნის ყოველი წუთი არის გლობალური რადიაციული კატასტროფის რისკი.
"მინდა დავარწმუნო ყველა უკრაინელი: ჩვენ ყველაფერს ვაკეთებთ საგანგებო სცენარის თავიდან ასაცილებლად. მაგრამ ეს მხოლოდ ჩვენს სახელმწიფოზე არ არის დამოკიდებული. მთავარი ის არის, რომ საჭიროა ისეთი საერთაშორისო ზეწოლა, რომელიც ოკუპანტებს აიძულებს დაუყოვნებლივ დატოვონ ზაპოროჟიეს ატომური ელექტროსდგურის ტერიტორია. ატომური ენერგიის საერთაშორისო სააგენტომ და სხვა საერთაშორისო ორგანიზაციებმა უნდა იმოქმედონ ბევრად უფრო სწრაფად, ვიდრე ახლა მოქმედებენ, რადგან ატომურ ელექტროსადგურზე რუსული ჯარების ყოფნის ყოველი წუთი არის გლობალური რადიაციული კატასტროფის რისკი“, - აღნიშნა ზელენსკიმ.
ზაპოროჟიეს სადგურს 4 მარტის შემდეგ რუსეთის ძალები აკონტროლებენ. უკრაინელ ინჟინრებს სადგურზე მუშაობის გაგრძელების საშუალება რუსეთის ზედამხედველობით ჰქონდათ. ბოლო კვირებში ამ არეალში შეტაკებები იყო რუსეთის და უკრაინის ძალებს შორის.
უკრაინა და რუსეთი სადგურისთვის ცეცხლის გახსნაში ერთმანეთს ადანაშაულებენ.
"ზაპოროჟიეს ატომურ ელექტროსადგურზე და მის გარშემო განხორციელებულ თავდასხმებზე პასუხისმგებლობა რუსეთს ეკისრება, თუმცა ის ცდილობს, უკრაინა დაადანაშაულოს", - ამის შესახებ "ომის შემსწავლელი ინსტიტუტის“ ანგარიშშია აღნიშნული.
ორგანიზაციის შეფასებით, რუსმა სამხედროებმა ბირთვული ობიექტის მილიტარიზაცია მოახდინეს, თუმცა ზაპოროჟიეს ატომური ელექტროსადგური შორს არის ფრონტის ხაზისგან და არ ექვემდებარება უკრაინის შეიარაღებული ძალების გარდაუვალ თავდასხმას.
"ომის შემსწავლელი ინსტიტუტის“ ანალიტიკოსები აცხადებენ, რომ ატომურ ელექტროსადგურზე თავდასხმების განხრციელებაში რუსეთი უკრაინულ ძალებს ადანაშაულებს, მაგრამ ჯერჯერობით სანდო მტკიცებულება არ წარმოუდგენია, "მიუხედავად იმისა, რომ რუსეთის ფედერაცია აკონტროლებს ტერიტორიას და შეუძლია უფრო დამაჯერებელი მტკიცებულებების მოწოდება ბევრად უფრო ადვილად, ვიდრე უკრაინას“.
იხილეთ ასევე: