19 წლის სალმან ტეფსურკაევი ჯერ სასტიკად აწამეს, შემდეგ კი პირში ყუმბარა ჩაუდეს და ააფეთქეს - კადიროვის ახალგაზრდა კრიტიკოსის უმძიმესი ისტორია

ჩეჩნეთში წამებით მოკლეს 19 წლის სალმან ტეფსურკაევი, რომელიც "ტელეგრამზე" მართავდა არხს 1ADAT და კადიროვის მოწინააღმდეგე იყო. ტეფსურკაევი 2020 წელს გაიტაცეს, მისი სიკვდილის შესახებ კი ახლა გახდა ცნობილი.

ინფორმაცია ტეფსურკაევის წამებით მოკვლის შესახებ გაავრცელა "წამების საწინააღმდეგო ჯგუფის" ადვოკატმა ოლგა სადოვსკაიამ, ასევე განცხადება გამოქვეყნდა "ტელეგრამში" იმ არხზეც, რომლის ერთ-ერთი მოდერატორიც სალმან ტეფსურკაევი იყო.

"ჩვენ ის ვერ გადავარჩინეთ", - ამბობს სადოვსკაია.

სალმან ტეფსურკაევი 2020 წელს რუსეთის ქალაქ გელენჯიკიდან უცნობმა პირებმა გაიტაცეს. გამტაცებელთა შორის ერთ-ერთს ჩეჩნეთის შინაგან საქმეთა სამინისტროს ოფიცრის მოწმობა ჰქონდა.

მოგვიანებით ინტერნეტსივრცეში გავრცელდა სალმანის წამების ამსახველი კადრები, სადაც ჩანდა, თუ როგორ აიძულებდნენ მას ბოთლზე დაჯდომას.

ამის შემდეგ გავრცელდა ვიდეო, სადაც აღბეჭდილი იყო, თუ როგორ სეირნობდა ტეფსურკაევი გროზნოში. უფლედამცველები საუბრობენ, რომ ეს ვიდეოები ერთსა და იმავე დღეს, 2020 წლის სექტემბერშია გადაღებული და რომ ამ ჩანაწერების გაკეთების შემდეგ ის მოკლეს.

1ADAT-ის "ტელეგრამ" არხზე აღწერენ, თუ როგორ მოკლეს 19 წლის ბიჭი. მათი ინფორმაციით, ერთკვირიანი წამების შემდეგ, სალმანი ადამ დელიმხანოვის (სახელმწიფო სათათბიროს დეპუტატი) საგვარეულო სახლში წაიყვანეს, დააბეს, პირში ყუმბარა ჩაუდეს და აფეთქეს.