"დავინახე, რომ მირიან კუკავა და დათო ჯიჯეიშვილი ჩხუბობდნენ... შემდეგ მირიანი ეგდო ძირს და მოსდიოდა სისხლი" - რას ჰყვებიან ცხვარიჭამიაში მომხდარი მკვლელობის თვითმხილველები
27 ივლისს ცხვარიჭამიაში მოკლული მირიან კუკავას საქმის ერთ-ერთმ ნიშვნელოვან მოწმესთან ინტერვიუ "ტვ პირველმა" ჩაწერა.
სოფო ჩოხელი, რომელიც ტრაგიკული დაბადების დღის მასპინძელი იყო, იხსენებს სად და როგორ დაიწყო დაპირისპირება ახალგაზრდებს შორის და როდის გამოიძახა მან პოლიცია დასახმარებლად.
"მეგონა, რომ დაბადების დღის ყველა მონაწილე სტუმარი იმყოფებოდა სახლის ეზოში, მაგრამ მალევე მომესმა განწირული ხმა ეზოს გარედან - სოფო, გვიშველე. მე ამ დროს გავიქეცი ეზოს კარისკენ, რადგან ხმა კარების გარედან ისმოდა. აივნიდან გადავიხედე და ბავშვები ხმამაღლა საუბრობდნენ. კამათი და ხმამაღალი საუბარი როცა იყო, პირველად მაშინ განვახორციელე ზარი 112-ში. სანამ ბავშვები ხელის გარტყმაზე გავიდოდნენ და ჩხუბი ატყდებოდა ეზოში." - ამბობს სოფო ჩოხელი.
საქმეში არსებული მასალებით, იუბილარის და მირიან კუკავასა და ბრალდებულ დავით ჯეჯეიშვილის ჩხუბს შეესწრო.
"როდესაც გავედი ჭიშკრის გარეთ, ქუჩაში, დავინახე, რომ ერთმანეთში ჩხუბობდა წვეულების მხოლოდ ორი წევრი ჩვენი სტუმრებიდან - მირიან კუკავა და დათო ჯიჯეიშვილი. ჩხუბში ვგულისხმობ, რომ ისინი ერთმანეთის მიმართულებით იქნევდნენ ხელებს და იგინებოდნენ. დავიწყე მათი გაშველება. ამ ჯაჯგურიდან გამომდინარე, ისევ წავიქეცი. არ დამინახავს, რომელიმეს ხელში ეჭირა თუ არა რაიმე საგანი. როდესაც ავდექი, მირიან კუკავა ეგდო ძირს, ჰქონდა ჭრილობა და მოსდიოდა სისხლი" - იხსენებს ჩვენებაში იუბილარის და, ნანა არაბული.
ცნობისთვის, შემთხვევა ცხვარიჭამიაში 27 ივლისს მოხდა. არსებული ინფორმაციით, 20 წლის მირიან კუკავა მეგობრის - ქეთათო არაბულის სახლში, დაბადების დღეზე იმყოფებოდა, რა დროსაც სუფრასთან ახალგაზრდებს შორის სიტყვიერი დაპირისპირება მოხდა.
აღნიშნული მოგვიანებით ფიზიკურ დაპირისპირებაში გადაიზარდა, ერთ-ერთმა ახალგაზრდამ, სავარაუდოდ, დავით ჯიჯეიშვილმა მირიან კუკავას გულ-მკერდის არეში დანით ჭრილობა მიაყენა, ის შემთხვევის ადგილზე გარდაიცვალა. თავად ჯიჯეიშვილი კი მიმალვაში თითქმის ერთი დღის განმავლობაში იმყოფებოდა, მის დასაკავებლად სამართალდამცავები სამძებრო მოქმედებებს ახორციელებდნენ.
ამ დროისთვის დაკავებულ რვავე პირს ბრალი ოფიციალურად 30 ივლისს წარუდგინეს. ბრალდებული 7 პირიდან 5 პირს ბრალი ჯგუფური ხულიგნობით წარედგინა, რაც სასჯელის სახედ და ზომად ორიდან ხუთ წლამდე თავისუფლების აღკვეთას ითვალისწინებს, ხოლო 2 პირს ბრალდება ცრუ ინფორმაციის მიწოდებისა და მძიმე დანაშაულის შეუტყობინებლობის მუხლებით წარედგინა, რაც სასჯელის სახედ და ზომად ორიდან ექვს წლამდე თავისუფლების აღკვეთას ითვალისწინებს.
მთავარ ბრალდებულს, დავით ჯიჯეიშვილს, ბრალი საქართველოს სისხლის სამართლის კოდექსის 108-ე მუხლით (განზრახ მკვლელობა) და 239-ე მუხლის მე-2 ნაწილის "ა“ ქვეპუნქტით და მე-3 ნაწილით (ხულიგნობა, ჩადენილი წინასწარი შეთანხმებით ჯგუფის მიერ, დანის გამოყენებით) წარედგინა, რაც სასჯელის სახედ და ზომად 10-დან 15 წლამდე თავისუფლების აღკვეთას ითვალისწინებს. მან ბრალი აღიარა : " ვაღიარებ, რომ ჩემი მიყენებული ჭრილობებით გარდაიცვალა" - თქვა სასამართლო პროცესზე ჯიჯეიშვილმა.