ერაყი ქურთისტანის დაბომბვაში თურქეთს ადანაშაულებს, ქვეყანამ ანკარადან დროებითი რწმუნებული გაიწვია - რას პასუხობს ბრალდებებს ოფიციალური ანკარა

ერაყმა ქურთისტანის ავტონომიურ რეგიონში განხორციელებულ დაბომბვაში, რასაც 9 ადამიანის სიცოცხლე ემსხვერპლა, თურქეთი დაადანაშაულა და ანკარადან დროებით რწმუნებული გაიწვია, - ინფორმაციას BBC ავრცელებს.

ამასთან, თურქეთის ელჩი ერაყის საგარეო საქმეთა სამინისტროში ბოდიშის მოსახდელად დაიბარეს.

თურქეთი ბრალდებას უარყოფს და აცხადებს, რომ დარტყმა ქურთისტანის მუშათა პარტიის (PKK) ძალებმა განახორციელეს.

ერაყის სახელმწიფო ტელევიზიის ცნობით, საარტილერიო დაბომბვა ერაყის ქურთისტანის რეგიონისა და თურქეთის საზღვარზე მდებარე ქალაქ ზახოში, პარკში მოხდა. დაიღუპა 9 და დაშავდა 23 ადამიანი. მსხვერპლთა შორის არიან ბავშვები.

ფაქტს ერაყში საპროტესტო აქციები მოყვა. ქალაქ კარბალაში, თურქეთის სავიზო ცენტრის წინ დემონსტრანტებმა თურქეთის დროშა დაწვეს. საპროტესტო აქციები გაიმართა ბაღდადსა და ნასირიაშიც.