"ყური მომჭრა, როდესაც პრეზიდენტმა მიხეილ სააკაშვილი და ბიძინა ივანიშვილის ერთ სიაში მოათავსა - უადგილო შედარება იყო" - დავით სერგეენკო
"ყური მომჭრა, როდესაც პრეზიდენტმა მიხეილ სააკაშვილი და ბიძინა ივანიშვილის ერთ სიაში მოათავსა - უადგილო შედარება იყო", - აღნიშნული შეფასება ჟურნალისტებთან პარლამენტის ვიცე-სპიკერმა დავით სერგეენკომ გააკეთა.
მისივე განცხადებით, მისასალმებელია, რომ პრეზიდენტი პოლიტიკურ პროცესებში აქტიური მონაწილეობის მზადყოფნას გამოთქვამს.
“გამოჩნდება, რაში შეიძლება გამოიხატებოდეს ეს. რაც შეეხება შეწყალებას (მიხეილ სააკაშვილის და ნიკა გვარამიას), ეს მისი დისკრეციული უფლებაა. პრეზიდენტმა მიხეილ სააკაშვილთან დაკავშირებით განაცხადა, რომ ამის გაკეთებას არ აპირებს. თუ გადაიფიქრა, გამოჩნდება“, - განაცხადა დავით სერგეენკომ.
ცნობისთვის, საქართველოს პრეზიდენტის, სალომე ზურაბიშვილის განცხადებით, ბრიუსელის შემდეგ ვიზიტის განხორციელება კიდევ რამდენიმე ქვეყანაში სურდა, თუმცა მთავრობისგან უარი მიიღო, რის გამოც ბრიუსელიდან თბილისში დაბრუნება უწევს. როგორც პრეზიდენტმა აღნიშნა, მას არ სჯერა, რომ რამე სხვა მომავალი არსებობდეს საქართველოსთვის თუ არა ევროპული მომავალი: "არ მიმაჩნია, რომ ვინმეს უნდა გადავყვეთ ამ პროცესის წინ წასვლაში, არც სააკაშვილს, არც გვარამიას და არც ბიძინა ივანიშვილს“,- აღნიშნავს პრეზიდენტი.