"მინდა, გამოვხატო ჩემი იმედგაცრუება და დავგმო აღმაშფოთებელი შეურაცხყოფა საქართველოში დიპლომატიური კორპუსის წარმომადგენლების მიმართ" - ლიეტუვის ელჩი

ლიეტუვის ელჩი საქართველოში, ანდრიუს კალინდრა ევროკავშირის წარმომადგენლობის ოფისთან გამართულ საპროტესტო აქციას გმობს.

"მინდა, გამოვხატო ჩემი იმედგაცრუება და დავგმო აღმაშფოთებელი შეურაცხყოფა საქართველოში დიპლომატიური კორპუსის ჩემი კოლეგა წარმომადგენლების მიმართ, რომლებიც თავაზიანად წარმოადგენენ საკუთარ ქვეყნებს საქართველოში და ძალ-ღონეს არ იშურებენ საქართველოს დასახმარებლად ევროკავშირისა და ნატოსკენ მიმავალ გზაზე“, - აცხადებს ანდრიუს კალინდრა.

შეგახსენებთ, საქართველოში ევროკავშირის წარმომადგენლობის ოფისთან "ბავშვთა უფლებების დაცვის საზოგადოებისა“ და არასამთავრობო ორგანიზაცია "ზნეობას" ორგანიზებით აქცია გაიმართა. ევროკავშირის ოფისთან მიმდინარე აქციაზე რამდენიმე პირი დააკავეს. არსებული ინფორმაციით, დაკავებულია აქციის 10-მდე მონაწილე, მათ შორის არიან გურამ და ალექსანდრე ფალავანდიშვილები.

აქციის მონაწილეებს ადგილზე ანტიდასავლური შინაარსის პლაკატები ჰქონდათ მიტანილი. მედიის ინფორმაციით, მათ ადგილზე ევროკავშირის დროშის დაწვაც სცადეს.