26-29 მაისს წიგნის ფესტივალი განსაკუთრებული სიახლეებით გელოდებათ
თბილისის წიგნის 24-ე საერთაშორისო ფესტივალი 26-29 მაისს ტრადიციულად „ექსპო ჯორჯიაში“, მე-11 და მე-6 პავილიონებში გაიმართება. პანდემიური წლების გამოცდილებიდან გამომდინარე ფესტივალი ამჯერადაც ფიზიკურთან ერთად, ონლაინ ფორმატშიც ჩატარდება. მსურველებს ფასდაკლებით წიგნების შეძენა ონლაინ კატალოგებშიც შეეძლებათ.
წიგნის 24-ე ფესტივალისთვის განსაკუთრებულად ემზადებიან გამომცემლობები და წიგნის მაღაზიები. ისინი წიგნის მოყვარულებისთვის მნიშვნელოვან სიახლეებსა და დიდ ფასდაკლებებს გეგმავენ. გაიმართება არაერთი გათამაშებაც. წარმოდგენილ გამომცემლობებს შორისაა „პალიტრა L-ც“, რომლის სტენდთან მისულ მკითხველსაც უამრავი სიახლე დახვდება.
„მკითხველს ძალიან ბევრ სიახლესა და სიურპრიზს ვთავაზობთ. სიახლეებს შორის იქნება არაერთი წიგნი, რომლებიც სპეციალურად წიგნის ფესტივალისთვის გამოვეცით. გაიმართება ახალი წიგნის წარდგენები, ყველასთვის საყვარელ ავტორებთან შეხვედრები. ჩვენს ერთგულ მკითხველს განსაკუთრებულ ფასდაკლებებსაც შევთავაზებთ. უყურადღებოდ არ დარჩებიან პატარა მკითხველებიც, რომლებსაც ასევე უამრავი ახალი წიგნი და საინტერესო აქტივობა ელოდებათ. ფესტივალზე ველოდებით ყველას, ვისაც კითხვა უყვარს,“ - განმარტავენ გამომცემლობა „პალიტრა L-ში“.
ფესტივალის მასპინძელი ტრადიციულად „ექსპო ჯორჯიაა“. გამოფენის მე-11 პავილიონი ზრდასრულებს უმასპინძლებს, მე-6 პავილიონში კი სპეციალურად საბავშვო სივრცე მოეწყობა.
თბილისის წიგნის საერთაშორისო ფესტივალი 1997 წლიდან ყოველწლიურად ტარდება და კავკასიის რეგიონში ერთ-ერთი ყველაზე დიდი წიგნის ფესტივალია. მას მთელი ქვეყნის მასშტაბით ათასობით გულშემატკივარი და დამთვალიერებელი ჰყავს. აღსანიშნავია, რომ ფესტივალის სტუმრების რაოდენობამ ბოლო წლებში 100 000 ადამიანს მიაღწია.
უნდა აღინიშნოს, რომ გასულ წელს ფესტივალზე მისვლა მხოლოდ წინასწარი რეგისტრაციის საფუძველზე იყო შესაძლებელი, წელს კი ღონისძიების ოთხივე დღის განმავლობაში მისვლა თავისუფალია.
არ გამოგრჩეთ წლის მთავარი ლიტერატურული ღონისძიება, რომლის დაწყებამდეც რამდენიმე დღე რჩება!
R