"ვინც ბუჩას არმაგედონსა და მიშას ტყვეობას შორის პარალელს ვერ ავლებს, ნუ გამომეხმაურებით" - დავით დარჩიაშვილი
ყოფილი დეპუტატი დავით დარჩიაშვილი სოციალურ ქსელში სტატუსს აქვეყნებს, რომელშიც პარალელს ავლებს ბუჩაში მომხდარ ტრაგიკულ მოვლენებსა და ექსპრეზიდენტ მიხეილ სააკაშვილის პატიმრობას შორის.
"ვერასოდეს ჩავთვლი სალომე ზურაბიშვილს ადამიანად, სანამ მსოფლიო მასშტაბის განსაცდელის ჟამს, რომლის სახელია ბუჩა, ის არ დგამს ნაბიჯს მიშას გამოსახსნელად. ივანიშვილი და ღარიბაშვილი რომ ადამიანები არ არიან, ეგ ისედაც “იასნია”. ვინც ბუჩას არმაგედონსა და მიშას ტყვეობას შორის პარალელს ვერ ავლებს, ნუ გამომეხმაურებით: საჯარო პოლიტიკა მივატოვე, მღვდელი მე არ ვარ და, ამიტომ, თქვენი გონების გახსნა თუ სულის ხსნა აღარაა ჩემი საქმე", - წერს დარჩიაშვილი.
შეგახსენებთ, რომ ორი დღის წინ, მას შემდეგ რაც უკრაინელმა სამხედროებმა კიევის ირგვლივ 30-ზე მეტი ქალაქი და სოფელი ოკუპანტებისგან გაათავისუფლეს, ბუჩაში უმძიმესი მდგომარეობა დახვდათ. ბოლო მონაცემებით, ბუჩაში ნაპოვნია სამასზე მეტი მოკლული მშვიდობიანი მოქალაქე.