"გვინდა უპირობო მხარდაჭერა გამოვხატოთ რუსული არმიის მიმართ... ჩვენი ფიქრები პუტინთანაა" - ცხინვალში  რუსეთის მხარდასაჭერად აქცია გამართეს

ცხინვალში 2 მარტს პუტინის მხარდასაჭერი აქცია გაიმართა. უფრო ზუსტად კი, აქციის მიზანი იყო, პუტინისთვის, "დონეცკისა და ლუგანსკის დასაცავად სამხედრო ოპერაციის ჩატარების გამო," მხარდაჭერა გამოეცხადებინათ. ამის შესახებ ადგილობრივი საინფორმაციო სააგენტო "რესი“ წერს.

სააგენტოს ცნობით, აქციის ორგანიზატორი იყო პარტია "გაერთიანებული ოსეთი.“

"ჩვენ ყველამ ვიცით, რომ რუსეთის სამხედრო ძალები ახლა აწარმოებენ სპეციალურ სამხედრო ოპერაციას ნაცისტებისგან დონეცკისა და ლუგანსკის გასათავისუფლებლად და დასაცავად. სამხრეთ ოსეთში მცხოვრებ ადამიანებს, ისე როგორც არავის, ესმით ომის მთელი ტკივილი და სიმძიმე, ასევე დონბასისა და ლუგანსკის მაცხოვრებელთა იმედი და მისწრაფება.

ჩვენ გვახსოვს როგორ დაგვეხმარა რუსეთი და უკვე მე-14 წელია მშვიდად და უსაფრთხოდ ვცხოვრობთ. შევიკრიბეთ, რათა გამოვხატოთ უპირობო მხარდაჭერა და სოლიდარობა რუსეთის, რუსული არმიისა და პრეზიდენტ ვლადიმერ პუტინის მიმართ.

ჩვენი აზრები და ფიქრები რუსულ ჯართან, დონბასთან და პუტინთანაა", - განაცხადა აქციაზე სამხრეთ ოსეთის ე.წ. რესპუბლიკის დე ფაქტო პრეზიდენტმა ანატოლი ბიბილოვმა.