აგრესიული პროპაგანდა, რომლისთვისაც პუტინი ბიუჯეტიდან მილიონებს ხარჯავს - "მასებზე ზემოქმედების მოსახდენად ფული არასდროს ენანება, ამაზე დგას მისი ძალაუფლება"
როგორ მუშაობს რუსული სამხედრო საზოგადოება, კულტურის ყოფილი მინისტრის ვლადიმირ მედინკის თაოსნობით, რომლის მთავარი მიზანი სამხედრო ისტორიის ფალსიფიკაციაა? - რუსეთის სამხედრო-ისტორიულმა საზოგადოებამ, ბოლო ცხრა წლის განმავლობაში, ადგილობრივი სახელმწიფო ბიუჯეტიდან 3,5 მილიარდი რუბლის დაფინანსება მიიღო, დამატებით 2,3 მილიარდი რუბლი კი შემოწირულობის სახით ჩაურიცხეს.
novayagazeta.ru-ს ცნობით, "სახელმწიფო-პროპაგანდისტული ორგანიზაცია" ოფიციალურად ცალკე სახელმწიფო უწყება იყო, რომელიც ისტორიული მემკვიდრეობის შესწავლასა და შენარჩუნებას, ისტორიული მეხსიერების საკითხებს და ისტორიულ პროპაგანდას ემსახურებოდა.
"მისი მთავარი ფუნქცია კონტრპროპაგანდისტული ამოცანები იყო" - წერდა კულტურის ყოფილი მინისტრი ვლადიმერ მედინსკი თავის დისერტაციაში, რომელიც 2011 წელს მოამზადა. 2013 წლის დასაწყისში ის რუსეთის სამხედრო ისტორიული საზოგადოების თავმჯდომარედ აირჩიეს.
"ამ დროისთვის მას უკვე ჰქონდა ისტორიულ-მეცნიერებათა დოქტორის სტატუსი, მალე კი კულტურის მინისტრი გახდა, ხოლო ექვსი თვის შემდეგ, 2012 წლის დეკემბერში, რუსეთის პრეზიდენტმა ვლადიმერ პუტინმა ხელი მოაწერა ბრძანებულებას, რუსეთის სამხედრო ისტორიული საზოგადოების საზოგადოებრივ-სახელმწიფო ორგანიზაციის შექმნის შესახებ" - წერს გამოცემა.
მისივე ცნობით, ორგანიზაცია პატრიოტულ საქმიანობას ეწევა, ქვეყნის ისტორიულ და კულტურულ მემკვიდრეობას ეცნობა და "სამხედრო სამსახურის პრესტიჟის" ამაღლებას ემსახურება. კერძოდ, იწერებოდა ისტორიული წიგნები, ასევე, ორგანიზაციის წევრები კონსულტაციას უწევდნენ კინემატოგრაფებს, ამზადებდნენ სკოლის მოსწავლეებს, გეგმავდნენ სამხედრო-ისტორიულ ფესტივალებს საბავშვო ბანაკებში.
გამოცემა წერს, რომ სახელმწიფო სუბსიდიის გარდა, ფედერალურ პროექტს შემოქმედი ადამიანებიც უხდიდნენ თანხას, რომლებიც გარკვეული შეღავათებით სარგებლობდნენ. მთლიანობაში პროექტის ფარგლებში, წლის განმავლობაში, 250-ზე მეტი ძეგლი დაიდგა, მათ შორის საბჭოთა არმიის სამხედროებისაც.
მონუმენტური პროპაგანდა...
2014 წლის აგვისტოში, აღნიშნულმა ორგანიზაციამ მოსკოვში პირველი მსოფლიო ომის გმირების პატივსაცემი ძეგლი გახსნა. მაღალი რანგის სტუმრებს შორის იყვნენ პრეზიდენტი ვლადიმირ პუტინი, თავდაცვის მინისტრი სერგეი შოიგუ, მოსკოვის მერი სერგეი სობიანინი და რუსეთის პატრიარქი კირილი. მონუმენტზე პუტინის ნდობით აღსავსე სკულპტორმა ანდრეი კოვალჩუკმა იმუშავა. ის იმ წერილის ერთ-ერთი ავტორია, რომელიც 2014 წელს რუსეთის ცნობილმა სახეებმა ყირიმის რუსეთისთვის დაბრუნების მოთხოვნით პუტინს გაუგზავნეს და ღია მხარდაჭერა გამოუცხადეს.
"კულტურული პროპაგანდის სამუშაო გეგმა წინასწარ ზუსტად გათვლილი და მოფიქრებულია. ორგანიზაციას კარგად დაფინანსებული წარმომადგენლობა ჰყავს დიასპორებში, სადაც რუსულ საგანმანათლებლო დაწესებულებებში პატრიოტული თემატიკა ფართოდ არის წარმოდგენილი... სხვა განსაკუთრებული ინტერესის ობიექტია ყირიმი, ლუგანსკი, დონეცკის რეგიონები" - წერს გამოცემის კორესპონდენტი ოლესია პავლენკო.
"შესაბამისად, არც პუტინი უკარგავდა შემოქმედებით საზოგადოებას მხარდაჭერის მოტივაციას - ყირიმში, სადაც სოციალურ-ეკონომიკური ფონი მძიმეა, წარმატებით დგამს პიესებსა და სპექტაკლებს რუსული თეატრი, რომელსაც დაჟინებით ესწრებიან ადგილობრივი სკოლის მოსწავლეები. თემატიკა სამხედრო-ისტორიულია, რუსულ სამყაროზე, ყველა სპექტაკლის შინაარსი წინასწარ არის შესწავლილი და დამუშავებული, აუცილებლად რელიგიური კონტექსტით გაჯერებული..." - წერს ადგილობრივი ნელია დანილენკო ანექსირებულ ყირიმში რუსულ პროპაგანდაზე.
novayagazeta.ru-ს ცნობით, აგრესიული კულტურული პროპაგანდისთვის პუტინს ბიუჯეტიდან ფინანსები არ ენანება.
"ორგანიზაციამ, ფსკოვის ოლქში, პუტინის უახლოესი გარემოცვის წევრი სასულიერო პირის, მიტროპოლიტ ტიხონის ინიციატივით ორი დიდი ძეგლი 174 მილიონად დადგა. იმავე გუნდმა 2016 წელს, მოსკოვში, ბოროვიცკის მოედანზე, თავადი ვლადიმირის ძეგლი დადგა, რომლის გახსნასაც მედინსკი და დმიტრი მედვედევი ესწრებოდნენ" - წერს გამოცემა...
კონკურსი, როგორც წესი, დახურულ რეჟიმში მიმდინარეობდა და ყოველთვის პუტინთან დაახლოებული პირები იგებენ. კომისიას კი, მიტროპოლიტი ტიხონი ირჩევს. მისმა ფავორიტმა სალავატ შერბაკოვმა მოამზადა მიხეილ კალაშნიკოვის ძეგლი იარაღის სკვერში დასადგმელად...
მილიარდები პატრიოტიზმისთვის...
პროექტის ფარგლებში, მხოლოდ 2019-2021 წლებში რუსეთის სამხედრო-ისტორიულმა საზოგადოებამ 13 საბავშვო ბანაკი დააფუძნა, სადაც 15 ათასამდე მოზარდი იმყოფებოდა.
"მათ ორი კვირის განმავლობაში წინასწარ მომზადებული მასწავლებლები პატრიოტიზმის საფუძვლებს, რუსეთის სამხედრო და საზოგადოებრივ ისტორიას ასწავლიდნენ, მსოფლიოში მის როლსა და მნიშვნელობას უხსნიდნენ. მთლიანობაში, 15-დღიანი პათეტიკის გაკვეთილებში 600 მილიონ რუბლამდე იხარჯებოდა" - წერს გამოცემა.
რუსი ინტერნეტმომხმარებლები სოციალურ ქსელებში წერენ, რომ მასებზე ზემოქმედების მოსახდენად პუტინს ფული არასდროს ენანებოდა. ამაზე დგას მისი ძალაუფლება. ამიტომაც, იმას, რასაც ვერ ასწავლიან სკოლებში, სახელმწიფოს მიერ დაფინანსებული ორგანიზაციები კულტურული ცენტრების სახელით ავსებენ.