ბრიტანული კომპანია 55 თანამშრომელს პანდემიის დროს მუშაობის გამო, მადლობის ნიშნად, კანარის კუნძულებზე უფასოდ დაასვენებს - "გვსურს, რომ იგრძნონ დაფასება"

დასაქმების ბრიტანული კომპანია 55 თანამშრომელს პანდემიის პირობებში მუშაობის გამო, მადლობის ნიშნად, კანარის კუნძულებზე კომპანიის ხარჯებით დაასვენებს. ამის შესახებ BBC-ი წერს.

კომპანია Yolk Recruitment კარდიფში მდებარეობს. მისი წარმომადგენლის განცხადებით, თანამშრომლები აპრილში, ტენერიფეში 4 დღეს გაატარებენ, მოგზაურობის ყველა ხარჯს კი კომპანია დაფარავს.

Yolk Recruitment-ს ყოველივე დაახლოებით, 140 000 დოლარი დაუჯდება. პანდემიის პირველ ეტაპზე მათ რთული პერიოდი გაიარეს, თუმცა კომპანიის არსებობის ისტორიაში, 2021 წელი ყველაზე შემოსავლიანი იყო.

"ჩვენმა თანამშრომლებმა რთული პერიოდი გამოიარეს, ისევე როგორც ადამიანებმა მთელ მსოფლიოში ისინი ხან დისტანციურად მუშაობდნენ, ხან ოფისიდან, შემოვიღეთ მუშაობის ე.წ. ჰიბრიდული რეჟიმი, ეს ყველაფერი არ ყოფილა მარტივი, ამიტომ გადავწყვიტეთ მათ ხელი ჩავკიდოთ და მადლობა გადავუხადოთ ბოლო ორი წლის მუშაობისთვის.

ეს არის თანამშრომლებზე ზრუნვა და გვინდა დავრწმუნდეთ, რომ ყველა მათგანი გრძნობს დაფასებას“, - ამბობს კომპანიის კომერციული ოფიცერი, პავან არორა.