"ქალი იმ შენობაში გადავიდა საცხოვრებლად, სადაც მისი "ბოსი" ოჯახთან ერთად ცხოვრობდა" - CNN-ის ხელმძღვანელის სკანდალური სამსახურებრივი რომანი, რამაც მისი თანამდებობა შეიწირა
CNN-ის ხელმძღვანელი, ჯეფ ზაკერი თანამდებობიდან მას შემდეგ გადადგა, რაც ცნობილი გახდა მისი სასიყვარულო ურთიერთობის შესახებ ტელევიზიის ხელმძღვანელი გუნდის ერთ-ერთ წევრთან, ელისონ გოლუსტისთან. ამბავი ტელევიზიის ერთ-ერთ ყველაზე დიდ საიდუმლოდ მიიჩნეოდა.
სასიყვარულო ურთიერთობას, დიდი ალბათობით, ზაკერის თანამდებობა არ შეეწირებოდა, რომ არა CNN-ის ყოფილ ჟურნალისტ კრის კუომოსა და მის ძმასთან, ნიუ იორკის ყოფილ გუბერნატორთან, ენდრიუ კუომოსთან დაკავშირებული საგამოძიებო პროცესი.
ცნობისთვის, ენდრიუ კუომო გუბერნატორის თანამდებობიდან 2021 წელს გადადგა. მიზეზი კი ის იყო, რომ კუომო არაერთმა ადამიანმა სექსუალურ ძალადობაში დაადანაშაულა.
გამოძიების ფარგლებში გაირკვა, რომ ენდრიუს თავისი ძმა, CNN-ის ჟურნალისტი, ტელეწამყვანი კრისი გამოძიების შესახებ ინფორმაციის მოპოვებასა და ასევე, მედიაში დადებით კონტექსტში გაშუქების თვალსაზრისით ეხმარებოდა
- ამ კონტექსტში გამოძიებას კითხვები ჰქონდა CNN-ის ხელმძღვანელ ჯეფ ზაკერთან, ასევე ელისონ გოლუსტისთან - ორივე მათგანს ძმებ კუომოებთან ახლო კავშირი ჰქონდა.
"გამოძიების ფარგლებში მკითხეს, რა შეთანხმებული ურთიერთობა მქონდა ჩემს უახლოეს კოლეგასთან, ვისთანაც 20 წელზე მეტია ვმუშაობ. მოითხოვეს, რომ მეღიარებინა მასთან სასიყვარულო კავშირი, რაც არ გავაკეთე და ეს შეცდომა იყო. ამიტომ, დღეს ვტოვებ თანამდებობას. ვაღიარებ, რომ ჩვენი ურთიერთობა ბოლო წლებში განვითარდა", - ნათქვამია ზაკერის განცხადებაში.
განცხადებას აქვეყნებს ელისონ გოლუსტიც და ადასტურებს ზაკერთან ურთიერთობას:
"მე და ჯეფი ახლო მეგობრები და პროფესიული თვალსაზრისით, პარტნიორები ვიყავით თითქმის 20 წელი. კოვიდის დროს ჩვენი ურთიერთობა შეიცვალა. ვწუხვარ, რომ ამის შესახებ არ განვაცხადეთ შესაფერის დროს", - ნათქვამია ელისონის განცხადებაში.
- 56 წლის ზაკერისა და 49 წლის გოლუსტის სასიყვარულო ურთიერთობის შესახებ მედიაში ჭორებს უკვე წლებია წერენ, მაგრამ წყვილმა ეს არაერთხელ სასტიკად უარყო.
როგორც "ნიუ იორკ პოსტი" წყაროზე დაყრდნობით წერს, რამდენიმე წლის წინ, როდესაც ზაკერიც და ელისონიც ქორწინებაში იყვნენ, ქალი ქმართან და შვილებთან ერთად ზემო "ისთ საიდში" ზუსტად იმ შენობაში გადავიდა საცხოვრებლად, სადაც ზაკერი ოჯახთან ერთად ცხოვრობდა.
ჯეფ ზაკერს 21-წლიანი ქორწინება აკავშირებდა ქარინ ზაკერთან.
"ზაკერის ცოლს წარმოდგენა არ ჰქონდა, რომ ქალი, რომელთან ერთადაც ის ხშირად ლიფტით მგზავრობდა, მისი ქმრის საყვარელი იყო. როდესაც ამის შესახებ შეიტყო, ძალიან გაბრაზდა", - ამბობს წყარო.
მისივე ინფორმაციით, ამ ამბის შემდეგ, ორივე მათგანის ქორწინება მალევე დასრულდა. ზაკერიც და ელისონიც 2018 წელს ოფიციალურად განქორწინდნენ. განქორწინებამდეც და მას შემდეგაც, წყვილი ერთად არაერთხელ შეუნიშნავთ სხვადასხვა ღონისძიებებზე და "ინსაიდერები" ყოველთვის აღნიშნავდნენ, რომ მათ შორის მეგობრობაზე მეტი იყო.
საინტერესოა, რომ 2017 წელს ისრაელში მოგზაურობისას, ელისონი შეუერთდა ტელევიზიის ბოსს, სადაც მათ ნიუ იორკის ყოფილ გუბერნატორთან, ენრიუ კუომოსთან და მის თანაშემწესთან, მელისა დეროზასთან ერთად King David-ის სასტუმროში ისადილეს.
CNN-ის თანამშრომლები გაკვირვებულები არიან ელისონ გოლუსტის განმარტებით იმის შესახებ, რომ სასიყვარულო ურთიერთობა პანდემიის დროს დაიწყო და ამ ნაბიჯს "განედული ტყუილი“ უწოდეს, რადგანაც იციან, რომ "მათი ურთიერთობა პანდემიამდეც მრავალ წელს ითვლიდა".
"ამ რომანის გამო დასრულდა ორივე მათგანის ქორწინება, ეს ყველამ იცის“, - ამბობს CNN-ის ერთ-ერთი თანამშრომელი.კიდევ ერთი კი მიიჩნევს, რომ ზაკერის გადადგომაში დამნაშავე კრის კუომოა.
"კრის კუომომ გამოიყენა თავისი პოზიცია CNN-ში, როგორც მანიპულირებისთვის, ასევე ძმის ბრალმდებლების შესახებ ინფორმაციის მოსაძიებლად. ზაკერი დაეხმარა მას ამაში. ეს არის პროფესიული და ჟურნალისტური ეთიკის დარღვევა. CNN-ის თანამშრომლები იმსახურებენ სამართლიან გარემოს და საზოგადოება იმსახურებს იცოდეს, ზაკერის მსგავსი ძლიერი ადამიანები რას მალავენ დახურულ კარს მიღმა“, - ამბობს უფლებადმაცველი ელიზა ბატისტა.