როგორ ცხოვრობს მსოფლიოში ყველაზე პატარა მილიარდერი - 9 წლის ბიჭუნას მდიდრული სასახლე და ძვირადღირებული მანქანების კოლექცია

მომფა ჯუნიორი მსოფლიოში ყველაზე პატარა მილიარდერია. ის ჯერ კიდევ 6 წლის ასაკში უკვე უზარმაზარი სასახლის მეპატრონე გახდა, სახლში ძვირადღირებული მანქანების კოლექციაც აქვს და კერძო თვითმფრინავითაც დაფრინავს.

ძვირადღირებული ქონება სწორედ პატარა ბიჭის სახელზეა გაფორმებული.

ბიჭუნა ახლა 9 წლისაა. მისი ნამდვილი სახელი მუჰამედ ავალ მუსტაფაა და ინსტაგრამზე 25 000 გამომწერი ჰყავს. ერთ-ერთ ფოტოზე ის კრემისფერ "ბენტლისთან" დგას, ფოტოს აღწერაში წერს, რომ ეს მისი პირველი მანქანაა, რომელიც მამამ უყიდა.

კიდევ ერთ პოსტში ის წითელი "ლამბორჯინის" წინ პოზირებს და წერს, რომ ბედნიერია.

მომფა მულტიმილიონერი ნიგერიელი ინტერნეტ ვარსკვლავის, ისმაილია მუსტაფას ვაჟია. მამას და შვილს ერთნაირად უყვართ ძვირფასი ნივთები და ფულის ხარჯვას არცერთი ერიდება. მამამ მომფას პირველი სახლი 2019 წელს უყიდა, როცა ბიჭუნა 6 წლის გახდა. ისმაილიამ ძვირადღირებული საჩუქარი ასე ახსნა:

"საკუთარი სახლის ქონა ერთ-ერთი ყველაზე კარგი შეგრძნებაა, რაც კი არსებობს. ამას სიტყვებით ვერ გადმოსცემ. სახლში არავინ განგსჯის და ყოველთვის გაშლილი ხელებით გხვდებიან. გილოცავ ჩემო ბიჭო ახალ სახლს. ეს მამიკოსგან შენი დაბადების დღის საჩუქარია.", - ამბობდა ბიჭუნას მამა.

ისმაილია მუსტაფა, როგორც ცნობილია, ვალუტის გადამცვლელი პუნქტის მესაკუთრე იყო ლაგოსში და სწორედ მაშინ გამდიდრდა, მოგვიანებით კი ინვესტორი გახდა. ამჟამად მას სამართალდამცავებთან აქვს პრობლემა და 10 მილიონ ფუნტზე მეტი თანხის გათეთრება ედება ბრალად.

სასამართლო ამ თვის დასაწყისში გაიმართა და მამაკაცს გირაოს სანაცვლოდ 350 000 ფუნტის გადახდა მოუწია.

წყარო: thesun

მოამზადა ანა სიბოშვილმა