მსოფლიოში ყველაზე სასტიკი კარანტინი, სპეციალური ბანაკები და მეტალის ოთახები გაუსაძლისი პირობებით - როგორ ცხოვრობენ ჩინეთში კოვიდის გამო იზოლირებული ადამიანები (ფოტოები)

ჩინეთის "საკარანტინო ბანაკიდან" გავრცელებული შემზარავი ვიდეოკადრები, რომლებიც ეჭვის ქვეშ აყენებს ქვეყნის "0 კოვიდის" პოლიტიკას

"ნულოვანი კოვიდის" პოლიტიკის ფარგლებში, ჩინეთის ზოგიერთ ქალაქში მკაცრი შეზღუდვები დაწესდა და დასავლურ მედიაში ამ შეზღუდვებს "სასტიკსაც" კი უწოდებენ. მაგალითად, ქალაქ პუტიანიში მოწყობილია საკარანტინე ბანაკები, სადაც კარანტინში გადასული ადამიანები პატარა მეტალის ყუთებში ცხოვრობენ და ასე იცავენ იზოლაციის წესებს.

ყოველივეს მედიაში უკვე უწოდეს "მსოფლიოს უმკაცრესი ლოქდაუნი." უზარმაზარ ტერიტორიაზე განთავსებულია მეტალის ნაგებობები იმ ადამიანებისთვის, რომლებსაც ინფიცირებულთან ჰქონდათ კავშირი, ან თავად არიან ვირუსის მატარებელნი.

როგორც ირკვევა, კონსტრუქციების მშენებლობა ჩინეთში შარშან, წლის მიწურულს დაიწყო.

გავრცელებული ინფორმაციით, საკარანტინე ბანაკებში ადამიანები ავტობუსებით გადაჰყავთ და იზოლაციის პერიოდი 2 კვირამდეა. ამ ოთახებში კაცები, ქალები, ბავშვები და მოხუცებიც თავსდებიან.

კადრების საფუძველზე, რომელიც ჩინურ სოციალურ მედიაში გავრცელდა, დისტოპიურ გარემოში ჩადგმულ კაბინებში მყოფ ადამიანებს მხოლოდ ხის საწოლი, ერთი ბალიში, პლედი და საპირფარეშო აქვთ.

სოციალურ ქსელებში წერენ, რომ ადამიანები რეალურად ტყვეობაში, გაუსაძლის პირობებში არიან.

თავად იზოლირებულები იმაზე ჩივიან, რომ ოთახები ცივია და საკმარის საკვებს არ ურიგებენ: "არავინ მოდის ჩვენი მდგომარეობის შესამოწმებლად, არაფრითაა ეს ოთახები აღჭურვილი, ეს რანაირი კარანტინია?!" - აცხადებს BBC-სთან ინტერვიუში ერთ-ერთი ინფიცირებული.

გავრცელებული ინფორმაციით, ჩინეთში, პუტიანიში კვლავ შენდება 1000 მსგავსი საკარანტინე ოთახი.

ჩინეთში ოფიციალური პირები აცხადებენ, რომ მათ ასეთი მკაცრი პოლიტიკა ზამთრის ოლიმპიადისთვის მოსამზადებლად სჭირდებათ, რათა ვირუსის აფეთქებებისგან თავი მაქსიმალურად დაიცვან.

წყარო: the sun

მოამზადა ანა სიბოშვილმა