29
მარტიდღის ზოგადი ასტროლოგიური პროგნოზი
გასულ კვირაში სერიალის "ჩემი ცოლის დაქალები" ბოლო სერიები განსაკუთრებით დაძაბული იყო. მაყურებლის არაერთგვაროვანი რეაქცია იმ გოგონას მამის ქცევამ გამოიწვია, რომელიც ნარკოტიკების შედეგად მოიწამლა. მამის უმკაცრესმა ხასიათმა ბევრი ძალიან გააღიზიანა, თუმცა ჰყავდა მომხრეებიც.
როგორია სინამდვილეში, რამდენად ეთანხმება თავის გმირს და როგორ აღმოჩნდა სერიალში, ამის შესახებ ლევან გაბრიჭიძე თავად გვესაუბრება:
- სერიალში მოხვედრა ჩემთვისაც მოულოდნელი იყო... 2018 წელს უკრაინაში გადაღებებზე გახლდით, სადაც რუსეთ-უკრაინის ტელეფილმის გადაღება მიმდინარეობდა. მაშინ ეკა მჟავანაძის მეშვეობით მოხდა ჩემთან დაკავშირება, გავაგზავნე ვიდეორგოლი და მოეწონათ. ტელეფილმში "ჟენიტ, ნელზია პომილოვატ" ჩემი პერსონაჟი იყო ზურაბ გიორგიევიჩი. ახლაც ეკა მჟავანაძის დამსახურებაა, მე რომ "ჩემი ცოლის დაქალებში" გამოვჩნდი.
- თქვენმა გმირმა განსაკუთრებული აჟიოტაჟი გამოიწვია... რამდენად ჰგავთ ან არ ჰგავხართ?
- თუ იმას გავითვალისწინებთ, რომ ჩხუბი და ყვირილი არ მიყვარს, რაღაცებში ჩემს გმირს ვუგებ... ცხოვრებაში ყველაფერი ხდება და მანაც ვერ ააწყო ოჯახური იდილია. ტრაგიკული პიროვნებაა, რადგან ერთი შვილი გარდაცვლილი ჰყავს, მეორე მძიმედ ავად და მესამე კიდევ ასეთ მდგომარეობაში... მე პირადად ორი ქალიშვილის მამა ვარ, ერთი შვილიშვილის ბაბუა და აბსოლუტურად სულ სხვა სიტუაციია ჩვენს ოჯახში, ღმერთმა დამიფაროს სხვანაირად იყოს! ვამბობდი კიდეც, ხასიათში არ გადამივიდეს ეს ჩხუბი და ყვირილი-მეთქი...
- თქვენი შვილები წარმატებულები არიან, უფროსი სალომე გაბრიჭიძე საოპერო მომღერლია, რომელმაც არაერთ კონკურსში გაიმარჯვა..
- დიახ, მას ამ მიმართულებით ჰქონდა წარმატებები, მაგრამ შემდეგ ოჯახის, შვილის ყურადღება არჩია და ამჯერად სკოლაში პედაგოგად მოღვაწეობს... უმცროსმა წელს ჩააბარა, მანაც დაწყებითების ფაკულტეტი, პედაგოგობა აირჩია..
ისევ ჩემს პერსონაჟზე საუბარს რომ დავუბრუნდე, როლს ასე სჭირდებოდა, ამოცანა ეს იყო და რამდენად შევასრულე, დავაჯერე მაყურებელი, ეს უკვე მათი გასაწყვეტია. კომენტარების წაკითხვის არც დრო მაქვს და არც სურვილი, მაგრამ თუ ბევრი გაღიზიანდა, რაღაც გამიკეთებია. ჩემი ქცევა რა თქმა უნდა, რადიკალურად განსხვავებული იქნებოდა. შინაგანად იგივე განწყობა მექნებოდა, მაგრამ გამოხატვით ასეთი იმპულსური ნამდვილად არ ვარ...
მეც არ ვეთანხმები ჩემს პერსონაჟს რომ ყვირის და წივის, მაგრამ ასეთებიც არიან და ვერც მათ გაამტყუნებ. იმ პერსონაჟს, რა ცხოვრებაც აქვს, მისი ემოციები და აგრესია აღარც არის გასაკვირი. რეალურად ახალგაზრდებმაც ცოტა უნდა გაიგონ, რომ მათაც პასუხისმგებლობა აქვთ. დღეს მაგალითად შვილები უფრო მეტ დროს გარეთ ატარებენ, ვიდრე მშობლებთან. ეს ჩემი გმირიც ხომ საზოგადოების ერთ-ერთი წარმომადგენელი და ნატეხია?! რა ყალიბსაც სთავაზობს საზოგადოება, ახალგაზრდობაც ისე იქცევა... მე მაგალითად არ ვეთანხმები ნარკოტიკების ლეგალიზაციას.
აკრძალული რომ იყო, მაშინაც ეწეოდა ბევრი, მაგრამ ჩვენი მენტალიტეტი სულ სხვაა და რაც არ უნდა ლიბერალობა დავიბრალოთ, მოცემულ სიტუაციაში მაინც კონსერვატორებად ვრჩებით. დამახინჯებულ ტრადიციებს არ ვეთანხმები, მაგრამ წინაპრებისგან რა საუკეთესო ტრადიციებიც გვერგო, აუცილებლად უნდა შევინარჩუნოთ. დღეს შვილი და მშობელი ერთმანეთთან ცოტა გაუცხოებულია და იმიტომაც მოხდა იმ ფილმში, რაც მოხდა...
- დამსახურებული ხელოვანი ხართ..
- გმადლობთ... თეატრალური ინსტიტუტის სამსახიობო ფაკულტეტი დავამთავრე - დრამის, კინოს და თოჯინების თეატრის განხრით (შოთა ცუცქირიძის ჯგუფი). 1998 წელს დავამთავრე შოთა რუსთაველის სახელობის თეატრისა და კინოს სახელმწიფო ინსტიტუტის სარეჟისორო ფაკულტეტი დრამისა და თოჯინებს თეატრის. განხრით (გივი სარჩიმელიძის ჯგუფი)... 1984 წლიდან თოჯინების სახელმწიფო თეატრში ვმოღვაწეობდი, რვა წელია სამხატვრო ხელმძღვანელი ვარ. პარალელურად აკაკი წერეთლის სახელობის უნივერსიტეტში ხელოვნების ფაკულტეტზე და ხელოვნების კოლეჯში ვასწავლი.
- რამდენად ადევნებთ სერიალს თვალს და როგორ ვარაუდობთ, დიდხანს დარჩებით?
- ეს სერიალი უკვე რვა წელია გადის და სამწუხაროდ, დროის უქონლობის გამო ხშირად ყურებას ვერ ვახერხებ. ეპიზოდურად ვუყურებ და დამამახსოვრდა მეგრელების კასტა, სხვა მონაკვეთებიც... სერიალში ძირითადი ხერხემალი დათოს და ნინას ოჯახია, სხვები როგორც მოვლენები მათ ცხოვრებაში, ისე შემოდიან და ალბათ, ჩემი პერსონაჟიც მოვლენაა. რა როგორ იქნება, ვნახოთ. ძალიან სასიამოვნო იყო გადასაღებ მოედანზე მუშაობა, ყველა თავის საქმის საუკეთესო პროფესიონალია და ამიტომაც გაძლო სერიალმა 8 წელი!
მინდა რომ დიდხანს გიხილოთ სერიალში
ლევან გაბრიჭიძე ----საუკეთესო პიროვნება,საუკეთესო ადამიანია!