"პოლიტიკური სარჩულის ძებნა ყველაფერში, მით უმეტეს, ბავშვების სასკოლო სახელმძღვანელოებში, არასწორი მგონია" - დავით სერგეენკო

"პოლიტიკური სარჩულის ძებნა ყველაფერში, მით უმეტეს, ბავშვების სასკოლო სახელმძღვანელოებში არასწორი მგონია" - ასე ეხმიანება პარლამენტის პირველი ვიცე- სპიკერი ისტორიის სახელმძღვანელოსთან დაკავშირებით ოპოზიციის კრიტიკას, რომელიც მიიჩნევს, რომ ისტორიის სახელმძღვანელო, რომელსაც განათლების სამინისტროსგან გრიფი აქვს მინიჭებული, პროპაგანდისტულია.

სერგეენკოს თქმით, მსგავსი პოლიტიკური აქცენტის გაკეთება სასკოლო სახელმძღვანელოზე ზედმეტია.

"სახელმძღვანელოების შექმნისას გარკვეული წესებით ხელმძღვანელობენ და ასე ყველაფერში პოლიტიკური სარჩულის ძებნა, მით უმეტეს, ბავშვების სასკოლო სახელმძღვანელოებში არასწორი მგონია. სახელმძღვანელოებში შედიან ის პოლიტიკური მოღვაწეები, ვინც ჩაითვალა, რომ ქვეყნის განვითარებაში თავისი წვლილი შეიტანა. მე არ ვიცი, პროტოკოლის რაიმე ერთი ნაწილი მაინც, რომელიც რაიმე ფორმით კრძალავს იმას, რომ მოქმედი პოლიტიკოსი არ იყოს შეტანილი სახელმძღვანელოში. ერთ- ერთი ყველაზე უფრო გავრცელებული ონლაინ- პლატფორმა არის ვიკიპედია, სადაც უამრავი ინფორმაციაა, მათ შორის, მოქმედ პოლიტიკოსებზე. არ ვიცი, ეს რამდენად მიუღებელი და დაუშვებელია, რომ მოქმედი პოლიტიკოსი არ უნდა შევიდეს ისტორიის სახელმძღვანელოში,"- განაცხადა სერგეენკომ.

ცნობისათვის, პარტია "დროამ" 6 დეკემბერს განათლების სამინისტროსთან აქცია დააანონსა და მე- 9 კლასის ისტორიის სახელმძღვანელოს პროგრამიდან ამოღებას ითხოვს, სადაც გარკვეული ქვეთავები ეთმობა აგვისტოს ომს, "ვარდების რევოლუციას" და ბიძინა ივანიშვილს. "დროაში" მიაჩნიათ, რომ წიგნი პროპაგანდისტულია და მასში მოქმედი ხელისუფლების ხოტბის შესხმა ხდება.