კვლავ შეიარაღებული დაპირისპირება და გამწვავებული კონფლიქტი - რა ხდება სომხეთ -აზერბაიჯანის საზღვარზე
სომხეთისა და აზერბაიჯანის საზღვარზე კვლავ დაძაბული ვითარებაა. ორი ქვეყნის თავდაცვის სამსახურიების წარმომადგენლები სხვადასხვაგვარ ინფორმაციას ავრცელებენ.
აზერბაიჯანის თავდაცვის უწყების ცნობით, სახელმწიფო საზღვარზე 16 ნოემბერს, "სომხეთის პროვოკაციით გამოწვეული საბრძოლო მოქმედებების დროს, დაიღუპა 7 და დაიჭრა 10 აზერბაიჯანელი სამხედრო მოსამსახურე."
"კატეგორიულად ვგმობთ სომხური მხარის რევანშიზმზე დაფუძნებული სამხედრო პროვოკაციების გაგრძელებას. სომხეთის სამხედრო-პოლიტიკურ ხელმძღვანელობას უშუალოდ ეკისრება პასუხისმგებლობა რეგიონში სიტუაციის ესკალაციაზე და სამმხრივი განცხადების განხორციელებისთვის დაბრკოლებების შექმნაზე,“ - აცხადებენ აზერბაიჯანის თავდაცვის სამინისტროში.
მათი მტკიცებით, "აზერბაიჯანის რესპუბლიკის ტერიტორიული მთლიანობის წინააღმდეგ ნებისმიერ მუქარას და სამხედრო პროვოკაციას შესაბამისი რეაგირება მოჰყვება.“
სომხური მხარის განცხადება:
რაც შეეხება სომხეთს, ქვეყნის თავდაცვის უწყების ცნობით, საზღვრის აღმოსავლეთ ნაწილში, სადაც აზერბაიჯანის შეიარაღებულმა ძალებმა 16 ნოემბერს თავდასხმა განახორციელეს, ვითარება შედარებით სტაბილურია.
უწყების ცნობით, ცეცხლის შეწყვეტის შეთანხმების რეჟიმი "ძირითადად" შენარჩუნებულია.
სომხეთის თავდაცვის სამინისტროში აცხადებენ, რომ დაპირისპირების დროს 1 სომეხი ჯარისკაცი დაიღუპა, 13-აზერბაიჯანელმა სამხედროებმა ტყვედ აიყვანეს. კიდევ 24 სომეხ ჯარისკაცთან კი ამ დრომდე კონტაქტის დამყარება ვერ ხერხდება.
"სამხედროების მოსაძებნად ინტენსიური სამუშაოები მიმდინარეობს. ორი სამხედრო პოზიცია მოწინააღმდეგის კონტროლის ქვეშ მოექცა. რუსეთის შუამავლობით მიმდინარეობს მოლაპარაკებები სიტუაციის მოგვარებასა და დატყვევებული სომეხი სამხედროების დაბრუნების საკითხზე,“- აცხადებენ უწყებაში.
მათი მტკიცებით, აზერბაიჯანულმა მხარემ მნიშვნელოვანი მატერიალური ზარალი განიცადა. ამასთან, უწყების განცხადებით, დაჭრილი და დაღუპული აზერბაიჯანელი ჯარისკაცების რაოდენობა 70-ს აღწევს.
- რუსეთისა და ევროკავშირის წარმომადგენლებმა სომხეთი-აზერბაიჯანის საზღვარზე არსებული მდგომარეობა განიხილეს
რუსეთის საგარეო საქმეთა მინისტრის მოადგილემ ანდრეი რუდენკომ და ევროკავშირის სპეციალურმა წარმომადგენელმა სამხრეთ კავკასიასა და საქართველოში კრიზისის საკითხებში ტოივო კლაარმა სატელეფონო საუბარი გამართეს, - ინფორმაციას რუსეთის საგარეო საქმეთა სამინისტროს პრესსამსახური ავრცელებს.
მათივე ინფორმაციით, მხარეებმა სომხეთ-აზერბაიჯანის საზღვრის ცალკეულ მონაკვეთებში სიტუაციის გამწვავების საკითხი განიხილეს.
"გამოითქვა შეშფოთება მომხდარი შეიარაღებული შეტაკებების გამო. მხარეებმა ხაზი გაუსვეს ბაქოსა და ერევნის მხრიდან თავშეკავების გამოვლენისა და ყველა პრობლემის მხოლოდ პოლიტიკური და დიპლომატიური მეთოდებით გადაჭრის აუცილებლობას“, - აცხადებენ რუსეთის საგარეო საქმეთა სამინისტროში.