"ლაბორატორიულ პარამეტრებში არის გაუარესება, რაც ინტოქსიკაციაში გამოიხატება" - ვახტანგ კალოიანი ელენე ხოშტარიას ჯანმრთელობის მდგომარეობის შესახებ

"დღეს არის ელენე ხოშტარიას შიმშილობის მე-12 დღე. სიტუაცია, სამწუხაროდ, იმ ლოგიკის მიხედვით ვითარდება, რაც შიმშილობას ახასიათებს. მეტად არის გამოხატული სისუსტე და ინტოქსიკაცია" - ამის შესახებ "ევროპული საქართველოს“ წევრმა და ელენე ხოშტარიას ექიმმა, ვახტანგ კალოიანმა განაცხადა.

როგორც მან აღნიშნა, იდეალური იქნებოდა შიმშილობის შეწყვეტა და ხოშტარიას ჰოსპიტალში გადაყვანა, რაზეც ამ ეტაპზე ის უარს აცხადებს.

"იყო ღებინების რამდენიმე ეპიზოდი, რაც ინტოქსიკაციის მაჩვენებელია. მას გარკვეული სამედიცინო მანიპულაციები, რაც ამ პირობებში შესაძლებელია, უტარდება. დღეს დაგეგმილია გარკვეული ჩარევები და ლაბორატორიული ანალიზების კონტროლი. იმედი გვაქვს, რომ ამ ჩარევებით ვითარების მეტ-ნაკლები სტაბილიზაცია და გაუარესების შემცირება მოხდება.

აქ ექიმები იმყოფებიან და ძალიან აქტიურად არიან ჩართული. ელენე ხოშტარია მუდმივი სამედიცინო მეთვალყურეობის ქვეშ იმყოფება. ლაბორატორიულ პარამეტრებში არის გაუარესება, რაც ინტოქსიკაციის თვალსაზრისით გამოიხატება. ეს მოითხოვს დამატებით ჩარევას დამატებითი მედიკამენტების მიღების სახით. მდგომარეობა არ არის კრიტიკული და ტრაგიკული, თუმცა საკმაოდ მძიმეა და ამ ტემპით გაუარესება მისი ჯანმრთელობისა და სიცოცხლისთვის საფრთხე იქნება“, - განაცხადა კალოიანმა.