"ეს შეეხება კონფლიქტს, რომელიც მე და ზურა ყიფშიძეს მოგვივიდა" - რას აღიარებს და ნანობს დათო დოიაშვილი?
რეჟისორმა დავით დოიაშვილმა ლელა წურწუმიასთან გადაცემაში სტუმრობისას ზურა ყიფშიძესთან ათი წლის წინ მომხდარ კონფლიქტზე ისაუბრა.
"ამდენი ხანია ამაზე არ მისაუბრია, რაც ჩემთვის ინტიმურია იმაზე ვერიდები ლაპარაკს, ახლაც მიჭირს საჯაროდ რაღაცების მოყოლა. დრო ყველაფრის მკურნალია და ალბათ გავიდა ის დრო და მეც ზუსტად მივხვდი, რა იყო ჩემი არასწორი პოზიცია. ეს ეხება კონფლიქტს რომელიც მე და ზურა ყიფშიძეს მოგვივიდა. წარმოუდგენელი ნიჭის ადამიანია, არის რაღაცა, რაც არ ისწავლება, ღმერთისგან დაფერთხებული აქვს. გადავწყვიტე, რომ დამედგა "სირანო დე ბერჟერაკი" და მთავარ როლზე მოვიწვიეთ ზურა ყიფშიძე... ყოველი რეპეტიცია რაღაც ახლის აღმოჩენა იყო, ბევრ რამეს ვსწავლობდი აქედან. ძალიან ბევრმა გამაფრთხილა, რომ რაოდენ უცნაურიც უნდა იყოს და შეიძლება ამას ხმამაღლა არ უნდა ვამბობდე, მაგრამ ვიტყვი... იმედია, ზურას არ ეწყინება - ზურას აქვს პრემიერის და მაყურებლის შიში. ეს არის ცნობილი შიში…
არიან არტისტები, მაგალითად, ნინო კასრაძე, პირიქითაა, ეშინია რეპეტიციების დროს, მაგრამ პრემიერაზე იმდენად მზადაა, რომ ერთი სული აქვს, გავიდეს სცენაზე. მითხრეს, რომ ზურა ყველაფერს გააკეთებს პრემიერის წინ, რომ პრემიერა არ შედგესო. ამისთვის იყავი მზად, მთავარია ათამაშო პირველ დღეს და მერე წავა და წავაო.
მოხდა ისე, რომ "სირანო დე ბერჟერაკი" უნდა გვეთამაშა "თბილისის საერთაშორისო ფესტივალზე", ჩვენ ვხურავდით ამ ფესტივალს. ეკა მაზმიშვილმა დამირეკა და მითხრა, ხუთი-ექვსი იმპრესარიოა საქართველოში, ძალიან უნდათ ამ სპექტაკლის და ზურას ნახვა, მაგრამ ვერ ასწრებენ დასწრებას და შეგიძლია წინა დღეს გენერალურ რეპეტიციაზე მოიყვანოო. შევუთანხმდი დასს, ზურასაც. პირველი აქტი რომ დამთავრდა, ყველა მათგანს გაოგნებული სახე ჰქონდა, მერე დიდხანს ესაუბრნენ ზურას, აღფრთოვანებულები იყვნენ მისით.
ერთი დღე იყო პრემიერამდე დარჩენილი, ზურას ვუთხარი, რომ მეორე დღეს კიდევ გაგვევლო რეპეტიცია. მეგონა, ეს შიში მან უკვე გადალახა. მოხდა, ისე რომ რეპეტიციაზე ზურამ დაიწყო ჯაჯღანი, ეს რატოა ასე, მე ვერ გავიგე რას ვთამაშობ. ორი მინუსი თუ პლუსი დაეტაკა ერთმანეთს და ვუთხარი, რომ დავამთავრეთ ჩვენ ურთიერთობა, ჩავშალე პრემიერა.
დასიც ძალიან განერვიულდა, ყველა არტისტი ვინც თამაშობდა და ვინც არა, მთხოვდნენ, - ამდენი შრომა არ ჩავყაროთ წყალშიო. ეს არის ჩემი ძალიან ცუდი ხასიათი და ისიც არ ვიცი, ეს ცუდი ხასიათი არის თუ არა.
მერე ეს სპექტაკლი თავიდან დავდგი. ეს ზურას გამოა გულდასაწყვეტი, წარმოუდგენლად თამაშობდა. ის რაც გატყდა, იმის შეწებებას აზრი არ აქვს ჩემთვის.
გავიდა დრო და მივხვდი, რომ ვნანობ, ოღონდ არა ჩემ გადაწყვეტილებას, იმას, რომ ზურა ვერ ნახა ქართველმა მაყურებელმა..."