"პროტესტი არის ერთ-ერთი ყველაზე მნიშვნელოვანი ბერკეტი, ამას ამბობს სააკაშვილიც" - რაზე ისაუბრეს ციხეში ხატია დეკანოიძემ და ექსპრეზიდენტმა
"ერთიანი ნაციონალური მოძრაობის“ ერთ-ერთ ლიდერმა, ხატია დეკანოიძემ, ციხის #12 სასჯელაღსრულების დაწესებულების დატოვების შემდეგ, მიხეილ სააკაშვილის ჯანმრთელობის მდგომარეობასთან დაკავშირებით ჟურნალისტების კითხვებს უპასუხა.
მისი განცხადებით, სააკაშვილის 33-დღიანი შიმშილობა მის სახის ფერსა და სისუსტეზეც აისახება, თუმცა ამის მიუხედავად ძალიან მხნედ არის და პოლიტიკურ ყოველდღიურობაში აქტიურად არის ჩართული.
როგორც დეკანოიძემ აღნიშნა, სააკაშვილთან მისი პატიმრობის საკითხთან ერთად არჩევნების შედეგებზეც ისაუბრა. დეკანოიძის თქმით, ოპოზიციამ ადგილობრივი თვითმმართველობის არჩევნების მეორე ტურზე ძალიან სერიოზული გამარჯვება მოიპოვა, მაგრამ სამწუხაროდ მანიპულაციებით და გაყალბებებით ეს გამარჯვება წაართვეს.
"არჩევნების შემდეგ პირველად მომეცა მიშასთან შესვლის და საუბრის საშუალება. პირველ რიგში რაც მე და ძალიან ბევრ ადამიანს გვაწუხებს, არის მისი ჯანმრთელობის მდგომარეობა. სუსტად არის და ეტყობა ძალიან დიდი ხნის შიმშილობა, მაგრამ გამორჩეულდ მხნედ არის. მე მართლა გაკვირვებული ვარ იმდენად ნებისყოფით არის. რა თქმა უნდა, ის, რომ ამდენი ხანია შიმშილობს, სახის ფერზეც და ზოგადად სისუსტეზეც აისახება, მაგრამ ძალიან მხნედ არის. საოცარი რწმენა და მხნეობა აქვს, მაგრამ ვწუხვართ, რომ სუსტად არის ამდენი ხნის შიმშილობის შემდეგ.
ვისაუბრეთ ბევრ რამეზე, უპირველესად ეს საუბარი შეეხებოდა ჩვენთვის სასიცოცხლოდ მნიშვნელოვან საკითხს, ეს არის მიხეილ სააკაშვილის თავისუფლება. ძალიან მნიშვნელოვანია, რომ საქართველოს და ქვეყნის დამოკიდებულება მესამე პრეზიდენტის მიმართ იყოს ისეთი, როგორიც შეეფერება ჩვენს მომავალს და მომავალ თაობას, ამაზე ვისაუბრეთ, არჩევნების შედეგებზეც ვისაუბრეთ. ასევე, ვისაუბრეთ იმაზე, რომ ძალიან სერიოზული გამარჯვება მოვიპოვეთ, მაგრამ სამწუხაროდ მანიპულაციებით და გაყალბებებით ეს გამარჯვება წაგვართვეს”, - განაცხადა დეკანოიძემ.
მისი თქმით, იმისათვის, რომ ვადამდელი საპარლამენტო არჩევნები მივიღოთ და ასევე სააკაშვილის პენიტენციურ დაწესებულებაში მონახულების შესაძლებლობა ჰქონდეს ოპოზიციას, დეპუტატის მანდატის შენარჩუნება აუცილებელია.
როგორც დეკანოიძემ აღნიშნა, ყოფილი პრეზიდენტის პოზიციაც ასეთია, რომ პროტესტი უნდა იყოს ყველგან, რომ მიზანი მიღწეული იყოს.
"რაც შეეხება საპარლამენტო საკითხებს, მისი პოზიცია არ შეცვლილა, მეც ვიზიარებ იმ სულისკვეთებას, რომელიც ჰქონდა მიხეილ სააკაშვილს გუშინდელ წერილში, ჩვენ გვჭირდება ეს მანდატი არა იმისთვის, რომ მაგალითად, ყოველდღიურად პარლამენტში ვიაროთ და ყოველ პროცედურულ საკითხებში მივიღოთ მონაწილეობა, არამედ იმისთვის, რომ ვადამდელი არჩევნები დაინიშნოს და დავაჭიროთ თითი იმ ღილაკს, რომელიც არის აუცილებელი. ასევე, რაც მე ვუთხარი მას, არის ის, რომ აუცილებელია მისი და მისი თანამებრძოლების ნახვა ყოველდღიურად, რაც არის უმნიშვნელოვანესი საკითხი, რაშიც, რა თქმა უნდა, მეთანხმება. რეჟიმის წინააღმდეგ ყველა ბერკეტი, პატარა ვაკუუმიც კი, უნდა გამოვიყენოთ. რა თქმა უნდა, იმ პარლამენტში არაფერი გვესაქმება, მაგრამ ვადამდელი არჩევნებისთვის და მისი ციხეში, სასჯელაღსრულების დაწესებულებაში მონახულებისთვის, არის აუცილებელი ამ ბერკეტის გამოყენება. მაშინ, როდესაც ჩვენ ქართველი ხალხი გვეტყვის, "შედით პარლამენტში და დააჭირეთ ღილაკს, რომ ვადამდელი დაინიშნოს,“ ეს უნდა გვქონდეს. ჩვენ ისედაც არ ვართ პარლამენტში, ბოიკოტში ვართ, ისედაც მერობის კანდიდატები ვიყავით და ეს ავტომატურად ნიშნავდა, რომ საპარლამენტო მანდატები აღარ გვექნებოდა. პრეოტესტი არის ერთ-ერთი ყველაზე მნიშვნელოვანი ბერკეტი, ამას ამბობს ისიც. ვთანხმდებით, რომ პროტესტი უნდა იყოს ყველგან“, - განაცხადა ხატია დეკანოიძემ