„ლიბერთინსის“ ფესტივალიდან შემოსული თანხა ბათუმში დაზარალებული ოჯახების დასახმარებლად გადაირიცხა
გამომცემლობა „პალიტრა L-ის“ ორგანიზებით კვირას, 10 ოქტომბერს „ლიბერთინსის“ წიგნების ფესტივალი გაიმართა. ორგანიზატორების გადაწყვეტილებით, ღონისძიებამ „მუსიკა და ლიტერატურა“ ბათუმში დატრიალებული ტრაგედიის გამო ფორმატი შეიცვალა და ის საქველმოქმედო იყო. ფესტივალში რამდენიმე კომპანია სხვადასხვა ფორმით იღებდა მონაწილეობას. გაყიდული წიგნებიდან და სუვენირებიდან, ასევე, ხელნაკეთი ნივთებიდან შემოსული თანხა სრულად დაზარალებულ ოჯახებს გადაერიცხა.
„პალიტრა L-ის“ მარკეტინგისა და საზოგადოებასთან ურთიერთობის დეპარტამენტის ხელმძღვანელის მარიამ გიორგაძის განმარტებით, მსგავს სიტუაციებში ემპათია და გვერდში დგომა არის ის, რაც საზოგადოებას აძლიერებს.
გამომცემლობის მიერ ორგანიზებულ ფესტივალში მონაწილეობას იღებდა Teen box და ილუზიების მუზეუმი. ღონისძიებაში ჩართულები იყვნენ მოხალისეები, რომლებმაც საკუთარი ხელით დამზადებული ნივთები წარმოადგინეს და გაყიდეს. გაყიდული პროდუქციიდან შემოსული თანხა მოხალისეებმა ასევე ბათუმში დაზარალებულებისთვის განკუთვნილი საერთო ბიუჯეტისთვის გაიღეს.
ფესტივალში მონაწილეობა საინტერესო გამოცდილება იყო თავად ლიბერთინსელებისთვისაც.
“ბათუმში მომხდარმა ტრაგედიამ მთელი ქვეყანა შეძრა. ამ შემთხვევამ ყველა დაზარალებულთა ოჯახების დასახმარებლად გააერთიანა. ჩვენც გვინდოდა ჩვენი, თუნდაც მცირედი წვილი შეგვეტანა ამ დიდ საქმეში. ამის შესაძლებლობა კი ფესტივალმა მოგვცა. თუმცა აქ მხოლოდ შეგროვებული ფული არ იყო მნიშვნელოვანი. იმ დღეს ყველანი ვგრძნობდით სითბოს, თანაგრძნობას, სიყვარულსა და მხარში დგომას ერთმანეთის მიმართ,“ - აღნიშნავს ლიბერთინსელი მარიამ ლიპარტელიანი.
„ზოგადად, წიგნების ფესტივალი ძალიან კარგი საშუალებაა, რომ სხვადასხვა ავტორის ლიტერატურას გაეცნო. თუმცა ჩვენთვის ღონისძიების ჩასატარებლად სულ სხვანაირი მოტივაცია გახდა ის ფაქტი, რომ შემოსული თანხით ბათუმში დაზარალებულების ოჯახებს დავეხმარებოდით. მონაწილეებიც დიდი სიამოვნებით ჩაერთნენ კამპანიაში და საბოლოოდ, ძალიან კარგი საქველმოქმედო ფესტივალი გამოგვივიდა,“ - ამბობს „ლიბერთინსელი“ ლიზი ხურციძე.
ფესტივალის ორგანიზატორებმა საზოგადოების მეტი დაინტერესებისა და ჩართულობისთვის სამაგიდო თამაშების ჩემპიონატიც გამართეს. პარალელურად, ჩატარდა გამოკითხვა ლიბერთინსის წიგნებიდან. გამარჯვებულებს სხვადასხვა საინტერესო საჩუქრები გადაეცათ. ღონისძიების სპონსორები იყვნენ „ლიკანი“ და „დანკინი“.