საფრთხეშია თუ არა ლორთქიფანიძის N10-ში მდებარე კორპუსის კონსტრუქცია - ექსპერტის კომენტარი

სამხარაულის სახელობის სასამართლო ექსპერტის ზაზა ყიფიანის ინფორმაციით, ლორთქიფანიძის ქ. N10-ში მდებარე საცხოვრებელი კორპუსის კონსტრუქციას საფრთხე არ ემუქრება.

ექსპერტმა ზაზა ყიფიანმა მედიის წარმომადგენლებს ლორთქიფანიძის ქუჩაზე ჩამოშლილი ფერდისა და მიმდებარედ არსებული კორპუსის ვიზუალური დათვალიერების შედეგები გააცნო.

ექსპერტის განმარტებით, კორპუსის კონსტრუქციას საფრთხე არ ემუქრება, ფერდი კი დაუყოვნებლივ გამაგრებას ექვემდებარება.

„ის, რაც ვიზუალურად ვნახეთ, კორპუსს რაიმე მნიშვნელოვანი დაზიანება არ აქვს და უშუალოდ კორპუსის კონსტრუქციას საფრთხე არ ემუქრება. რაც შეეხება ფუძეს, მთის მხარეს, ის საფრთხის შემცველია და საჭიროებს გამაგრებას. გამაგრებული უნდა იყოს როგორც კორპუსი, ასევე გეოლოგიურად ფერდი“, - აღნიშნა ზაზა ყიფიანმა.

შეგახსენებთ, რომ ლორთქიფანიძის ქ. N10-ში მდებარე საცხოვრებელი კორპუსიდან უსაფრთხოების მიზნით, მოსახლეობის ევაკუაცია გუშინ განხორციელდა. ადგილობრივი მცხოვრებლები დედაქალაქის მერიამ დროებითი საცხოვრებლით უზრუნველყო.