"პრეზიდენტი მომიყვა ბატონ მიშელთან შეხვედრის შესახებ, რამდენად გაოგნებული იყო..." - რას ამბობს ვახტანგ მეგრელიშვილი სალომე ზურაბიშვილთან შეხვედრის შემდეგ
"პრეზიდენტი თავად მომიყვა, ბატონ მიშელთან შეხვედრის შესახებ, რამდენად გაოგნებული იყო და რამდენად აინტერესებდა რეალური მიზეზები იმაზე, რაც მოხდა საქართველოში", - ამის შესახებ "გირჩის“ ერთ-ერთმა ლიდერმა ვახტანგ მეგრელიშვილმა პრეზიდენტ სალომე ზურაბიშვილთან შეხვედრის დასრულების შემდეგ ჟურნალისტებს განუცხადა.
მისივე განმარტებით, ზურაბიშვილთან მიშელის დოკუმენტზე ისაუბრა.
"ქალბატონ პრეზიდენტთან საუბარი გვქონდა შარლ მიშელის დოკუმენტზე და მას აინტერესებდა, როგორი იყო ჩვენი დამოკიდებულება. მოვუყევი "გირჩის“ დამოკიდებულება, თუ რას ნიშნავს ეს ჩვენთვის და გვგონია, რომ ქალბატონი სალომესთვის საინტერესო იყო ჩვენი დამოკიდებულება. ჩვენ გვქონდა კრიზისი და ფაქტობრივად, მიშელის შეთანხმება, რომელიც არის, თავისი შინაარსით, ეს ჩვენი კონსტიტუციური ჩარჩოა, ვინდაიდან არ გვყავდა არცერთი ინსტიტუტი, რომელსაც ვენდობოდით, ამ ადამიანებმა კი შეასრულეს ეს როლი.
დღეს, ფაქტობრივად, "ქართულმა ოცნებამ“ უმცირესობა, ანუ ის 10% დაგვაიგნორა და ამავე დროს, არ გაითვალისწინა ის, რომ მე მასთან კი არ მქონდა კონტრაქტი, არამედ კონტრაქტი მქონდა შუამავლებთან, ანუ ევროკავშირთან და ამერიკასთან. მე ამას ასე ვუყურებ და ეს მოვუყევი ქალბატონ სალომეს. მკითხა, როგორია ჩვენი დამოკიდებულება არჩევნებთან მიმართებით და ვუთხარი, რომ არჩევნებთან სრულიად განსხვავებული დამოკიდებულება გვქონდა ჩვენ, ვიდრე კობახიძის ეს განცხადება იქნებოდა.
ბუნებრივია, სხვანაირი დამოკიდებულება გვაქვს, მაგრამ როგორც მე შევამჩნიე, თვითონ პრეზიდენტი, ამ საუბრებით, რაც ჩემთან ჰქონდა და ალბათ, სხვებთანაც ექნება, თავად ყალიბდება საკუთარ პოზიციაზე და ჩემთვის პოზიცია არ უთქვამს“, - აცხადებს მეგრელიშვილი.
შეგახსენებთ, რომ პრეზიდენტი სალომე ზურაბიშვილი პოლიტიკური პარტიების წარმომადგენლებს ხვდება.