"ქალმა შიშისგან გულწასული ბავშვი ბუნკერში შემოიყვანა და თან ამშვიდებდა, ეს ცუდი თამაში მალე დასრულდებაო" - ქართველი გოგონა ებრაელების საოცარ სიმამაცეზე

"ახლა, ამ წუთებში, როდესაც თქვენ გესაუბრებით, აქაურობა ინგრევა. ჯოჯოხეთური ხმებია. ათ წელზე მეტია აქ ვცხოვრობ, მაგრამ ასეთი რამ არ მახსოვს... სირენების ხმები ფაქტობრივად დღე-ღამე არ წყდება. ვცდილობ, არ მეშინოდეს, რადგან ვიცი, ისრაელს უძლიერესი შეიარაღებული ძალები ჰყავს, ასევე ე.წ. რკინის გუმბათი აქვს, მაგრამ ამ გუგუნში ცხოვრება წარმოუდგენელია. არადა, ებრაელებს არ უყვართ შეშინებული ადამიანები, თავად ამ ხმებში შეუძლიათ ცხოვრება გააგრძელონ. გაოცებული ვარ მათი სიმამაცით..." - ამბობს AMBEBI.GE-სთან საუბარში ისრაელის ქალაქ აშკელონში მცხოვრები ქართველი, ნაია ციციშვილი.

მისი თქმით, ამ წუთებში აშკელონსა და აშდოდში სირენები ისევ განახლდა. ისრაელმა ჰამასისისგან გაშვებული რაკეტების მორიგი ტალღა მოიგერია. ადგილობრივი მედიის ცნობით, ისრაელშიც არის მსხვერლი, მაგრამ ბევრად მძიმე მდგომარეობაშია ღაზას სექტორი, 100-მდე შენობა, სადაც ტერორისტებს ბაზები ჰქონდათ მოწყობილი, დაბომბილია.

- ვიცი, რომ ისრაელის ხელისუფლება მშვიდობიან მოსახლეობას 2 საათით ადრე აფრთხილებდა, დაეტოვებინათ ტერიტორია. ვიცი, რომ გადიოდნენ, თუმცა, ყველა არა, ზოგს ტერორისტები არ უშვებდნენ, რომ შემდეგ მსოფლიოსთვის ეჩვენებინათ, როგორ უსწორდება ისრაელის ხელისუფლება მშვიდობიან მოსახლეობას. ვინც ახერხებდა, გარბოდა, რჩებოდნენ ტერორისტები და მათი თანამოაზრეები. ამ ქალაქებში, რომელიც ჰამასის სამიზნეა, უმძიმესი მდგომარეობეაა, რადგან ფაქტობრივად ბუნკერიდან ვერ გამოვდივართ.

ძალიან შეშინებულები ვართ, უფრო მეტად ემიგრანტები, თორემ ადგილობრივები წარმოუდგენლად მამაცურად იქცევიან. მობილიზაცია არ არის გამოცხადებული, მაგრამ ასე მგონია არ სჭირდება, რადგან მზად არიან, თავისი ქვეყნის ყოველი გოჯის დასაცავად დღესვე წავიდნენ არმიაში. თან ისე, რომ საქმეს არ მოწყდნენ. ამდენი წელია აქ ვცხოვრობ, ვიცოდი მათ უკიდეგანო პატრიოტიზმზე, მაგრამ ახლა ჩემი თვალით ვხედავ, როგორც უყვართ თავიანთი ქვეყანა.

ბომბები ჩამოცვივდა ქალაქში, რადგან ჰამასი ერთბაშად ძალიან მასშტაბურ დარტყმებს ახორციელებს, რამდენიმე ადგილას მაღაზიასა და სხვა ობიექტსაც დაეცა, ყველაფერი ღია იყო, მაგრამ არავის მოსვლია აზრად ამით ესარგებლა. პირიქით, გარეთ დარჩენილ სურსათს იღებდნენ და დანგრეული კედლის იქით დებდნენ... ემიგრანტები ძალიან შეშინებული ვართ.

ადგილობრივები სიმშვიდის დროს გამოდიოდნენ და ჩვენთვის საჭირო ნივთები, მატრასები, თბილი მოსაცმელი, წყალი, ჩაი, ყავა და პირბადეები მოაქვთ. ჩვენ კითხვაზე, რა ხდება გარეთ, ძალიან მშვიდად გვპასუხობენ, ყველაფერი კარგად იქნება, ძალიან მალე. ჩვენ ვერავინ შეგვაშინებსო... მართლაც მჯერა, რომ ასე იქნება.

ვიცი, რომ ტერორისტები გარბიან და მშვიდ ადგილს აფარებენ თავს, რადგან ისრაელის დარტყმები მასშტაბური გახდა. მთლიანობაში 1000-ზე მეტი რაკეტა ისროლეს ისრაელის მიმართულებით, აქედან 200 რაკეტა ისრაელმა ისევ უკან გადაუგდო პალესტინას, დაახლოებით 850 რაკეტა კი ისრაელის ტერიტორიაზე Iron Dome-მა გაანადგურა, ზოგი მათგანი კი ჩამოვარდა. ამ ინფრომაციას ადგილობრივები ისე გვაწვდიან, როგორც სტატისტიკას, და არა ჩვენს გარშემო არსებულ საშინელ რეალობას. დავინახე, როგორ შემოჰყავდა ახალგაზრდა ქალს 5 წლამდე, შიშისგან ლამის გულწასული შვილი ბუნკერში და თან ძალიან მშვიდად ეუბნებოდა, რომ ეს ცუდი თამაში ძალიან მალე დასრულდებოდა. არავითარი ისტერიკა ან ცრემლები, სხვებმა სათამაშოები მიაწოდეს და ურჩიეს, გარედან შემოსულ ხმაურზე არ ეფიქრა. აქ საოცარი თანადგომა ვნახე.

- რა ხდება იმ რაიონებში, სადაც არაბები და ებრაელები ერთად ცხოვრობენ?

- ჩემს ახლობელს ვესაუბრე. იქ საკმაოდ მძიმე სიტუაციაა, რადგან არაბებმა ებრაულ დასახლებებს ე.წ. მოლოტივის კოქტეილები დაუშინეს. პოლიციაა მობილიზებული. ვფიქრობ, იქაც შეძლებს ისრაელის ძალოვანი სისტემა ვითარების კონტროლს, რადგან რასაც ვუყურებ, ოპერატიულად და სწორად მუშაობის გეგმა წლების წინ აქვთ შემუშავებული, ფაქტობრივად, ძვალსა და რბილში გამჯდარი.