რა არის და როგორ უწყობს ხელს საკონკურსო პროექტი "დიდგორელი" განათლებას?

კომპანია „არემჯის“ გენერალური სპონსორობით, საქართველოს მუნიციპალიტეტებში კონკურსში მონაწილე სკოლის მოსწავლეების წახალისება ხდება

კომპანია ,,არემჯის“ მხარდაჭერით, მესამე წელია, რაც პროექტი „დიდგორელი“ ტარდება. „დიდგორელი“ თეთრიწყაროს, ბოლნისისა და დმანისის მუნიციპალიტეტებში საჯარო და კერძო სკოლების მოსწავლეებისთვის განკუთვნილი საგანმანათლებლო პროექტია. კონკურსი ისტორიის პოპულარიზაციას ისახავს მიზნად და მასში რომელშიც მე-10, მე-11 და მე-12 კლასის მოსწავლეები მონაწილეობენ. „დიდგორელის“ გამარჯვებულებს სამთო მომპოვებელი კომპანია „არემჯი“ 6-თვიან სტიპენდიას უნიშნავს.

პანდემიის გამო, პროექტმა საკლასო ოთახებიდან ღია სივრცეშიც გადაინაცვლა. 2020 წელს „დიდგორელს“საგანმანათლებლო ექსკურსიების სახით ახალი კომპონენტი - „დიდგორელის ტური“ დაემატა, რომლის მიზანიც სხვადასხვა ისტორიული ადგილების მონახულება და ადგილზე საქართველოს ისტორიის შესახებ ლექცია-სემინარების მოწყობაა.

პროექტი „დიდგორელის“ შესახებ AMBEBI.GE თავად პროექტის იდეის ავტორს, ისტორიკოსს და მკვლევარს ლევან ჟვანიას ესაუბრა.

- ბატონო ლევან, როდიდან ხორციელდება პროექტი დიდგორელი და რას ემსახურება ის?

- „დიდგორელი“ საგანმანათლებლო პროექტია, რომლის განხორციელებაც 2019 წელს დაიწყო. პროექტი ისტორიით მოსწავლე-ახალგაზრდობის მეტად დაინტერესებასა და ზოგადად, ისტორიის პოპულარიზაციას ემსახურება. შეგვიძლია ვთქვათ, რომ „დიდგორელის“ ზოგადი მიზანი განათლების ხელშეწყობაა, კონკრეტულად კი, ეს ისტორიის სასკოლო კონკურსია. მთავარი და უპირველესი ჩვენთვის მოსწავლეების ცოდნის გაღრმავებაა.

- თქვენ პროექტი "დიდგორელის" იდეის ავტორი ბრძანდებით. შეგიძლიათ, მოგვიყვეთ, როგორ დაგებადათ მისი განხორციელების იდეა და რა იყო/არის ის მთავარი მიზანი, რის გამოც ის დააფუძნეთ?

- მე ისტორიკოსი და ისტორიის პედაგოგი ვარ. 2003 წელს, როდესაც ისტორიულზე ჩაბარება გადავწყვიტე, ზოგს ჩემი არჩევანი ცოტა არ იყოს, გაუკვირდა, რადგანაც სკოლაში ყველა საგანს ძალიან კარგად ვსწავლობდი, ჩემს ამ გადაწყვეტილებას არ ელოდნენ, რადგანაც მაშინაც ისტორია „პოპულარულ“ საგანად და სპეციალობად არ ითვლებოდა. ალბათ ამიტომ, მომდევნო წელს, პარალელურად მეორე უნივერსიტეტშიც ჩავაბარე, სხვა ე.წ. „პოპულარულ“ სპეციალობაზე, თუმცა, მე ისტორიკოსად დავრჩი და ჩემთვის ყველაზე მნიშვნელოვანი ისტორიაა... მიუხედავად გარკვეული პროგრესისა, დღემდე ისტორია შეიძლება ითქვას, „მეორეხარისხოვან“ საგნად ითვლება, რაც ყოველთვის ძლიერ მაწუხებდა. მოგეხსენებათ, სკოლებში ძალიან ბევრი ოლიმპიადა და კონკურსი ტარდება, თუმცა ასეთი მასშტაბისა და მსგავსი ისტორიის კონკურსი აქამდე არ ჩატარებულა. ძალიან დიდი ხნის წინ უკვე მინდოდა ასეთი აქტივობის განხორციელება, თუმცა ვერ შევძელი და მერე, საბოლოოდ, კომპანია „არემჯის“ დახმარებით 2019 წელს ეს პროექტი დავიწყეთ, რომელიც მანამდე სხვადასხვა უწყებას წარვუდგინეთ. „დიდგორელმა“ მოწონება დაიმსახურა და შესაბამისად, განხორციელებაც არ დავაყოვნეთ.

„დიდგორელის“ დაწყებამდე არაერთხელ გავიარეთ კონსულტაცია თეთრიწყაროსა და მანგლისის მიტროპოლიტთან, მეუფე ანანიასთან, - საოცარ ადამიანთან და ისტორიკოსთან, რომელიც აქტიურად ჩაერთო თეთრიწყაროში „დიდგორელის“ განხორციელების საქმეში, რაც ჩვენთვის ძალიან მნიშვნელოვანი იყო.

როგორია მექანიზმი, რომლითაც „დიდგორელი“ ტარდება? თავდაპირველი გადაწყვეტილებით, პროექტი მე-10, მე-11 და მე-12 კლასელებისთვის ტარდება. ის სიმბოლურად თეთრიწყაროს მუნიციპალიტეტში დავიწყეთ, ვინაიდან დიდგორის ველი სწორედ ამ მუნიციპალიტეტში მდებარეობს. „დიდგორელი“ შედგება რამდენიმე ტურისგან, პირველი - ეს არის შიდა სასკოლო ტურები, ამ ტურმა გამოავლინა 121 საუკეთესო შედეგის მქონე მოსწავლე, რომლებმაც მეორე ტურში მიიღეს მონაწილეობა. თუმცა, მეორე ტურამდე, ჩვენ შევხვდით მათ პედაგოგებს და სკოლის დირექტორებს, კიდევ ერთხელ მკაფიოდ გავაცანით კონკურსის შესახებ დეტალური ინფორმაცია, გადავეცით 400 კითხვა, რომელიც შედგენილი იყო მეცხრე კლასის სახემძღვანელოზე დაყრდნობით და ვუთხარით, რომ საკონკურსო კითხვები სწორედ ამ კითხვებიდან იქნებოდა. ვთხოვეთ, მაქსიმალურად გამოეყენიბინათ დარჩენილი სამი კვირა და მოემზადებინათ მოსწავლეები. როდესაც ჩავატარეთ მეორე ტური, მივიღეთ გასაოცარი შედეგი, მოსწავლეების აბსოლუტურმა უმრავლესობამ ძალიან მაღალი შედეგი აჩვენა, რაც იმ სამი კვირის მოსამზადებელი პერიოდის დამსახურება იყო. მოსწავლეებმა არ დაიზარეს და ზოგმა დავიწყებული მასალა გაიხსენა, ზოგმა კი, რაც არ უსწავლია, ის ისწავლა. ასე გაგრძელდა ფინალამდე, შესაბამისად, „დიდგორელის“ მთავარი მიზანი - ცოდნის გაღრმავება მიღწეულია. ჩვენ ამ პრინციპით ჩავატარეთ ბოლნისის მუნიციპალიტეტში და ასე ვატარებთ დმანისშიც, თუმცა, დმანისში ძალიან მნიშვნელოვანი სიახლე გვაქვს, კერძოდ: მოსწავლეებს, გარდა იმ 400 კითხვისა, გადავეცით ვასილ ბარნოვის, ლევან გოთუას და არტურ ლაისტის ისეთი მოთხრობები და წერილი, როგორიცაა „ისნის ცისკარი“, „გოხნარის დევი“, „კრწანისის სევდა“, „პირველად ილიასთან“. მათ ვუთხარით, რომ სატესტო კითხვები იქნებოდა ამ ნაწარმოებებიდანაც, შესაბამისად, ყველა მოსწავლემ რამდენჯერმე წაიკითხა ყველა მოთხრობა და მეორე ტურის დასრულების შემდეგ სასიამოვნოდ გაკვირვებული დავრჩით მათი შედეგებით. ვფიქრობთ, რომ „დიდგორელისთვის“ ეს კომპონენტი უმნიშვნელოვანესია, მოსწავლეები უკვე დაინტერესდნენ აღნიშნული მწერლებით. ამ კომპონენტს უფრო დავხვეწთ მომავალში და ის „დიდგორელისთვის“ ერთ-ერთი ძლიერი მხარე იქნება.

"დმანისში "დიდგორელის" მესამე ტური უკვე დასრულდა, სამ ფინალისტს წასაკითხად გადავეცით ვასილ ბარნოვის ძალიან საინტერესო რომანი "ტრფობა წამებული". ამ რომანიდანაც იქნება საფინალო კითხვები. 12 მარტს გაიმართება ფინალი და "დიდგორელის" კიდევ ერთი სტიპენდიანტი გამოვლინდება.

- რატომ შეირჩა "დიდგორელისთვის" თავდაპირველად კონკრეტულად ის რეგიონები, სადაც ის ტარდება?

- ჩვენ ვინაიდან ამ საგანმანათლებლო პროექტს „დიდგორელი“ ვუწოდეთ და ვინაიდან დიდგორი სწორედ ქვემო ქართლში, კონკრეტულად, თეთრიწყაროს მუნიციპალიტეტში მდებარეობს, ამიტომ კონკურსი თეთრიწყაროში დავიწყეთ. როგორც ცნობილია, კონკურსი ყველასათვის უფასოა, აგრეთვე, აბსოლუტურად ყველა მონაწილე იღებს სამახსოვრო საჩუქრებს, წიგნებს, მედალიონებს და ა.შ. გამარჯვებულს ენიშნება ექვსთვიანი სტიპენდია (თვეში 100 ლარი), მეორე და მესამე ადგილზე გასულებს გადაეცემათ ერთჯერადი ფულადი ჯილდოები, აგრეთვე, მესამე ტურში 20-მდე საუკეთესო შედეგის მქონე მოსწავლე იღებს სხვადასხვა ფასიან საჩუქრებს, აქვთ საინტერესო ტური ეროვნულ ბიბლიოთეკაში, ოკუპაციის მუზეუმში, მერაბ კოსტავას სახლ-მუზეუმში და ა.შ. ამ ყველაფერს, მიუხედავად იმისა, რომ გვყავს არაერთი მხარდამჭერი, ვერ გავაკეთებდით, რომ არა ჩვენი გენერალური სპონსორი კომპანია „არემჯი“. როგორც კი „არემჯიმ“ კონკურსის შესახებ გაიგო, მაშინვე დაინტერესდა და მისი დამსახურებით ჩვენ უკვე ასეულობით მოსწავლე გავახარეთ, წავახასილეთ და უფრო მეტად დავაინტერესეთ ისტორიითა და არამარტო ისტორიით.

- კიდევ რა არის თქვენი სამომავლო გეგმები?

- ჩვენ არაერთი მიზანი გვაქვს, მალე კონკურსი ჩატარდება მეორე საფეხურის მოსწავლეებისთვის - მე-7, მე-8 და მე-9 კლასის მოსწავლეებისთვის, უამრავ პედაგოგს, მშობელს და მოსწავლეს აქვს „დიდგორელის“ ამ საფეხურში ჩატარების სურვილი. აგრეთვე, ვთანამშრომლობთ განათლების სამინისტროს შესაბამის დეპარტამენტთან, მათი ექსპერტების დახმარებით ვაპირებთ სატელეფონო აპლიკაციის შექმნას. ვიცით, რომ მოსწავლეები სხვადასხვა სახის თამაშებით არიან დაინტერესებულნი, ყველას აქვს ინტერნეტი და ტელეფონი. სწორედ ამიტომ, ჩვენ მათ განათლების მიღებაზე ორიენტირებულ ერთგვარ „თამაშს“ შევთავაზებთ და გარკვეული პერიოდის შემდეგ „დიდგორელის“ აპლიკაციაც გვექნება. ეს იქნება „დიდგორელის“ აპლიკაცია, რომელიც სასარგებლო და საჭირო ცოდნას მისცემს მოსწავლეებს.

- ახსენეთ კორონავირუსის პანდემიაც. ზოგადად, პროექტის განხორციელების გზაზე რა სირთულეებს ხვდებით, განსაკუთრებით, პანდემიამ რა დაბრკოლებები შეგიქმნათ და როგორ უმკლავდებით მათ?

- ვინაიდან სკოლაში სასწავლო პროცესი არ მიმდინარეობდა და პრაქტიკულად, გარკვეული პერიოდის განმავლობაში მთელ ქვეყანაში სწავლა გაჩერებული იყო, „არემჯის“ მხარდაჭერით კიდევ ერთი ახალი კომპონენტი მოვიფიქრეთ. „დიდგორელის“ მონაწილეები, თეთრიწყაროელი მოსწავლეები ბოლნისის მუნიციპალიტეტში წავიყვანეთ. მათ ბოლნისის სიონის ეზოში ძალიან საინტერესო ლექცია მოისმინეს და რა თქმა უნდა, დაათვალიერეს ის; გარდა ამისა, ნახეს გერმანული ბოლნისი. ბოლნისში ჩატარებული კონკურსის „დიდგორელებს“ რაც შეეხება, ისინი თეთრიწყაროში, მანგლისში წავიყვანეთ და მანგლისის სიონი, უძველესი და ძალიან მნიშვნელოვანი ტაძარი დავათვალიერებინეთ. მოსწავლეებმა იქაც ძალიან საინტერესო ლექცია მოისმინეს ტაძრისა და იმ პერიოდის შესახებ, როცა ის აშენდა. ასე რომ, ვინაიდან მოსწავლეები სასწავლო კლასებში ვერ შედიოდნენ, ჩვენ ღია სივრცე გამოვიყენეთ და მათ მაინც მნიშვნელოვანი და ძალიან საინტერესო აქტივობა შევთავაზეთ. გარდა ამისა, ყველა მონაწილეს ამ შემთხვევაში ისტორიის წიგნებთან ერთად სხვადასხვა სამახსოვრო საჩუქრებიც გადავეცით.

- რა როლს ასრულებს პროექტის განხორციელებაში თავად "არემჯი" და რა არის ის მთავარი მიზანი, რის გამოც სამთო მომპოვებელი კომპანია მსგავს პროექტშია ჩართული?

- ცნობილია, რომ „არემჯი“ ძალიან აქტიურად უჭერს მხარს სხვადასხვა საგანმანათლებლო პროექტს, ეს მხოლოდ „დიდგორელს“ არ ეხება - „არემჯისთვის“ მთავარ მიმართულებებს შორისაა განათლების, ხელოვნების, კულტურისა და სპორტის მხარდაჭერა. შესაბამისად, ამ შემთხვევაშიც „არემჯი“ „დიდგორელის“ მხარდამჭერია. პრაქტიკულად, რომ არა ეს მხარდაჭერა, პირდაპირ რომ ვთქვათ, ალბათ, ეს დიდი ხნის ოცნება ვერ ახდებოდა და „დიდგორელს“ ვერც დავიწყებდით - ამ კონკურსში მონაწილეობა ხომ ყველასთვის უფასოა, ყველა იღებს საჩუქარს, გაიცემა სტიპენდიები და ა.შ. ყოველ შემთხვევაში, „არემჯის“ გარეშე „დიდგორელს“ ასეთი ფორმით ვერ დავიწყებდით... ჩვენ გვაქვს თბილისის მუნიციპალიტეტის შესაბამის სამსახურებთან კომუნიკაცია და მალე იქაც ჩავატარებთ „დიდგორელს. საბოლოოდ ჩვენი ოცნებაა, რომ „დიდგორელი“ საყოველთაო გახდეს და მთელ ქვეყანაში ერთიანად ჩატარდეს. აგრეთვე, მოლაპარაკებები გვაქვს ერთ-ერთ ტელევიზიასთან და შესაძლოა, გარკვეული პერიოდის შემდეგ „დიდგორელის“ სატელევიზიო ფორმატიც ვიხილოთ. ჩვენ გვჯერა, რომ „არემჯი“ მომავალშიც იქნება ჩვენი „დიდგორელის“ სპონსორი და ათიათასობის „დიდგორელის“ წარმატებული მონაწილე გვეყოლება.