"თუ მსგავსი ტენდენცია შევინარჩუნეთ უახლოესი ერთი კვირის განმავლობაში, ეტაპობრივი გახსნა შეიძლება უფრო ადრე დავიწყოთ" - გიორგი გახარია

მთავრობის სხდომის გახსნისას, პრემიერმა გიორგი გახარიამ ქვეყანაში კორონავირუსის გავრცელების საწინააღმდეგოდ დაწესებული შეზღუდვების შემსუბუქებაზე ისაუბრა.

"ვმსჯელობთ იმაზე, როგორ უნდა მოვახერხოთ, რაც შეიძლება სწრაფად, უსაფრთხოდ და გონივრულად ეკონომიკის ეტაპობრივი გახსნა. როცა მიზნობრივი შეზღუდვები დავაწესეთ, ეს იყო დეკემბრის ბოლოს, ამას ჰქონდა კონკრეტული მიზანი, გახსოვთ, მაშინ დადებითობის მაჩვენებელი იყო ძალიან მაღალი და ზოგიერთ ქალაქში 30%-საც აჭარბებდა, სწორედ ამის შემცირებას ემსახურებოდა ეს მიზნობრივი შეზღუდვები. დღეის მონაცემებით, 18 000 ათასი ტესტიდან დადებითი იყო 723, რაც ჩვენთვის მაინც მაღალი რიცხვია, მაგრამ უკვე მიუახლოვდა 4%-ს. როცა დადებითობის მაჩვენებელი სტაბილურად გვექნება 4%, ჩვენ უფრო თამამად, მაგრამ გონივრულად შეგვეძლება ეკონომიკის გახსნა.

დღევანდელი მონცემები გვაძლევს ფრთხილი ოპტიმიზმის საშუალებას. ვიწყებთ მსჯელობას იმაზე, რომ თუ მსგავსი ტენდენცია შევინარჩუნეთ უახლოესი ერთი კვირის განმავლობაში, ეტაპობრივი გახსნა შეიძლება უფრო ადრე დავიწყოთ, ეს შეეხება, უპირველესად, თბილისს, ქუთაისს და რუსთავს, ამასთანავე მნიშვნელოვანია, რომ გაიხსნას საგანმანათლებლო დაწესებულებები, რომ ბავშვებს მივცეთ კლასებში სწავლის საშუალება, ეს შეეხება ასევე მუნიციპალურ ტრანსპორტსაც, ლაპარაკია ეტაპობრივ გახსნაზე, რათა არ დავაყენოთ რისკის ქვეშ პანდემიის მართვის ის მიღწევა, რომელიც, როგორც ფაქტი, ჩვენ უკვე გვაქვს, რაც ბოლო 2 თვის ერთობლივი შრომის შედეგია“, - განაცხადა გახარიამ.