ამირან გამყრელიძე პატრიარქთან დაკავშირებით კომენტარს აკეთებს

პატრიარქი თავს კარგად გრძნობს და ამ ეტაპზე არ იქნა მიზანშეწონილად ჩათვლილი, რომ ტესტირება ჩატარებულიყო, - ამის შესახებ დაავადებათა კონტროლის ეროვნული ცენტრის ხელმძღვანელმა ამირან გამყრელიძემ „ინტერპრესნიუსს“ განუცხადა. როგორც მან სააგენტოსთან საუბარში განმარტა, დღეს საპატრიარქოში კორონავირუსთან დაკავშირებით ტესტირება დაახლოებით 55 ადამიანს ჩაუტარდა.

"დღეს, ჩვენი ეპიდემიოლოგთა ჯგუფი მუშაობდა საპატრიარქოში. მოგეხსენებათ, ეს გამოწვეული იყო იმით, რომ რამდენიმე დღის წინ, საპტრიარქოს თანამშრომელს კორონავირუსული ინფექცია დაუდასტურდა, ამიტომ კონტაქტების კვლევა მიმდინარეობს, მხედველობაში მაქვს ეპიდანამნეზი და ჩაღრმავებული ეპიდემიოლოგიური კვლევა და ასევე, ბიოლოგიური ნიმუშების აღება, რომელიც PCR ტექნოლოგიით გამოიკვლევა.

დაახლოებით, 55-მდე ნიმუში იქნა აღებული, შესაბამისად, ტესტები დღეს ლუგარის ლაბორატორიაში ჩატარდება. პატრიარქი თავს კარგად გრძნობს და ამ ეტაპზე არ იქნა მიზანშეწონილად ჩათვლილი, რომ ტესტირება ჩატარებულიყო. კიდევ ერთხელ ხაზს ვუსვამ, ეპიდემიოლოგიური კვლევა მიმდინარეობს, შესაბამისად, პროტოკოლით გადაწყდება, საჭიროება თუ დადგება, ჩატარდება“, - განაცხადა გამყრელიძემ.