"ვადამდელი არჩევნების 2022-ში, 2023-ში, ან 2024-ის არჩევნებამდე 2 თვით ადრე ჩატარება კატეგორიულად არ განიხილება" - მამუკა მდინარაძე

ფრაქცია "ქართული ოცნების“ ლიდერის, მამუკა მდინარაძის განცხადებით, მმართველი გუნდი ვადამდელ არჩევნებს "კატეგორიულად არ განიხილავს“.

როგორც მდინარაძემ ჟურნალისტებს განუცხადა, “ქართული ოცნება” მართალია და საკუთარ პოზიციას მყარად დაიცავს.

"არანაირი რიგგარეშე ვადამდელი არჩევნები - რაც არ უნდა გადაწიონ და მათი გადმოსახედიდან ჩვენთვის მომხიბვლელი იყოს წინადადება - 2022-ში, 2023-ში, 2024 წლის არჩევნებამდე 2 თვით ადრე ჩატარება თუ ა.შ. არანაირი მსგავსი საკითხი კატეგორიულად არ განიხილება მმართველ გუნდში. იქიდან გამომდინარე, რომ ეს ყვეელაფერი დამოკიდებულია იმაზე, რა მოხდა სინამდვილეში. გვაჩვევენ და ცდილობენ, ჩვენც კი დავკომპლექსდეთ, რომ არჩევნები კარგად ჩატარდა - ეს ვერავინ ვერ უნდა გაბედოს. ასეთი ტრენდი მკვიდრდება, ღალატად უთვლიან ერთმანეთს, თუ ვინმე იტყვის, რომ არჩევნები არ გაყალბებულა“,- განაცხადა მდინარაძემ.

ამასთან, მისი თქმით, ხელისუფლებას მიაჩნია, რომ საარჩევნო კანონმდებლობის დახვეწა შესაძლებლია და ოპოზიციას მხოლოდ "მსგავს თემებზე წაყვება“.

"ჩვენ ვერანაირ ვადამდელ და რიგგარეშე არჩევნებზე ვერასდროს ვერ ვილაპარაკებთ იმიტომ, რომ მართლები ვართ რეალურად. როდესაც რომელიმე ხელისუფლება კადრულობს და რაღაცას აყალბებს, მას ბევრ რამეზე მოუწევს წასვლა, მაგრამ, როდესაც ხელისუფლება მართალია, ანუ ჩვენ, ჩვენს პოზიციებს მყარად დავიცავთ და თუ რაიმეზე მივყვებით, იმიტომ მივყვებით, რომ მიგვაჩნია, აარჩევნო კანონმდებლობის დახვეწა შესაძლებელია და კიდევ უფრო მეტი, შესაძლებელია, თუნდაც ჩვენთვის რისკიანი, მაგრამ ღია, დემოკრატიული მექანიზმის ჩადება. მსგავს თემებზე წავყვებით. სხვაზე - არა”,- განაცხადა მდინარაძემ.

მდინარაძის თქმით, ოპოზიციის მოთხოვნები შემდეგნაირად ჟღერს: “სანამ მე არ გავიმარჯვებ, მე ეს მოთხოვნა მექნება”.

"სულ რომ მართლა რაღაც დარღვევები აღმოეჩინათ, შეიძლებოდა მათი მხრიდან დათმობა, რომ ეთქვათ, რომ დღეს ისეთი პრობლემური პერიოდია, ეკონომიკა ისე ზიანდება, მოქალაქეები ისე ზიანდებიან, ასობით გარდაცვლილი ადამიანი გვყავს, ჩვენ რაღაცას ვთმობთ. ამ ომის პერიოდში, ისინი დგანან სხვა მხარეს. იბრძვიან აკრძალული მეთოდებით“,- განაცხადა მდინარაძემ.

ცნობისთვის, როგორც "ლელოს" ლიდერმა მამუკა ხაზარაძემ ტელეკომპანია "პალიტრანიუსის" გადაცემა "დღის ნიუსრუმში" განაცხადა, ერთ-ერთი ვარიანტია, რომ რიგგარეშე არჩევნები 2022 წელს ჩატარდეს, თუმცა ეს უნდა იყოს სრულად პროპორციული სისტემით ჩატარებული.

„აქ მნიშვნელოვანია, რომ ქვეყანა რაც შეიძლება სწრაფად გადავიდეს პროპორციულ არჩევნებზე. აქ ხომ მხოლოდ იმაზე არ არის საუბარი, რომ კალენდარულად 2021-ში არ გამოვიდა, 2022-ში ჩავატაროთ იმავე სისტემით რა სისტემითაც დღეს ჩატარდა არჩევნები, აქ ლაპარაკია პრინციპულად ახალ სისტემაზე ანუ სრულად პროპორციული არჩევნების ჩატარებაზე“,- განაცხადა ხაზარაძემ.