"შეეშინდათ ბოკერიას, გვარამიას, სააკაშვილს და უგულავას, მათ ააყირავეს მაგიდა" - ირაკლი კობახიძე მოლაპარაკებების გადადებაზე

პარტია „ქართული ოცნება - დემოკრატიული საქართველოს“ აღმასრულებელი მდივნის, ირაკლი კობახიძის განცხადებით, ის, რომ მოლაპარაკებები დღეს ოპოზიციასა და ხელისუფლებას შორის არ გაგრძელდა, ოპოზიციის ბრალია, რადგან მათ „მაგიდა ააყირავეს“.

როგორც კობახიძემ აღნიშნა, ოპოზიციის კონკრეტულ წარმომადგენლებს, მათ შორის უგულავას, ბოკერიას, სააკაშვილს და გვარამიას საგამოძიებო კომისიის შექმნის და არჩევნების შედეგების გადასინჯვის პროცესის შეეშინდა.

„საარჩევნო სისტემის და ადმინისტრაციის რეფორმის საკითხზე ჩვენ გამოვთქვით მზადყოფნა. მზად ვართ ყველა ჯანსაღ პოლიტიკურ ოპოზიციურ ძალასთან და არა ყველა ოპოზიციურ ძალასთან გავაგრძელოთ მოლაპარაკებები. ეს შეიძლება გაგრძელდეს, თუ ამის ინტერესი იარსებებს. ჩვენი მხრიდან წარმოდგენილი ცვლილებები ითვალისწინებდა ფუნდამენტურ ცვლილებებს და გადასინჯვას. ჩვენ დეტალებზე ვერ ვისაუბრებთ, თუმცა ეს ასე იყო.

რაც შეეხება რიგგარეშე არჩევნებს, გუშინ ჩვენ მაქსიმალურად თამამი განცხადება გავაკეთეთ, რის მიხედვითაც, თუ 1% მაინც დადგინდება გადახრა იმ მონაცემებიდან „ქართული ოცნების“ სასარგებლოდ, რაც ცესკოს მიერ არის წარმოდგენილი, ამ შემთხვევაში ტარდება რიგგარეშე არჩევნები. ასევე, როგორც საარჩევნო შტაბის უფროსმა ვთქვი, რომ ვტოვებ ყველანაირ პოლიტიკურ თანამდებობას და ზოგადად პოლიტიკას. არჩევნების თითქოსდა გაყალბების საკითხი მთლიანად მოვხსენით და ამის ფონზე ოპოზიცია იმავე დღეს აყირავებს მაგიდას. სასოწარკვეთილი ბოკერია და მისი მეგობრები, გვარამია და ა.შ. აყირავებენ მაგიდას. უარი თქვეს დღეს შეკრებაზე, ეს იყო მაგიდის აყირავება. ნახავდნენ, რომ არც არაფერია გაყალბებული. რა თქმა უნდა, იყო ლოკალური ხარვეზები მაგრამ სინამდვილეში, არჩევნები ჩატარდა კონკურენტულ და თავისუფალ გარემოში, რაც ყველა საერთაშორისო ორგანიზაციამ დაადასტურა. შეეშინდა ბოკერიას, გვარამიას, სააკაშვილს და უგულავას და მათ ააყირავეს მაგიდა. მაგრამ ეს მაგიდა ჩვენ ან სხვა პოლიტიკურ პარტიებს არ აუყირავეს. საბაბს ეძებენ, რაც ადვილია, მაგრამ საზოგადოებას თვალში ნაცარს ვერ შეაყრიან“, - განაცხადა კობახიძემ.