"დედა შვილს გადაეფარა და დამნაშავემ მასაც ესროლა... დაკავებული მოკლულის ბიძაშვილია" - მარნეულში მომხდარი საზარელი დანაშაულის დეტალები

მარნეულის სოფელ ახლოლალოში მომხდარი მკვლელობის მიზეზებს სამართალდამცავები არკვევენ. ბიძაშვილებს შორის მომხდარი კონფლიქტი შემზარავი ტრაგედიით დასრულდა.

16 წლის ახალგაზრდა 3 ნოემბერს, საღამოს, მეზობლად მცხოვრებ 22 წლის ბიძაშვილს სახლში მიუვარდა და ცეცხლსასროლი იარაღიდან გასროლით ახალგაზრდა ბიჭი და ბიცოლა, 39 წლის ქალი მოკლა.

მიყენებული ჭრილობებით დედა-შვილი ადგილზე გარდაიცვალა. დანაშაული ძალოვნებმა ცხელ კვალზე გახსნეს და 16 წლის მაშადი ქაზიმ ზაივი დააკავეს, არასრულწლოვანთან ერთად დაკავებულია მისი მამა, ასტაფ ზაივი.

მართალია ადგილობრივები ამბობენ, რომ მკვლელობა მოზარდმა ჩაიდინა, თუმცა შს სამინისტროს გავრცელებული ოფიციალური ინფორმაციით, ორივე დაკავებულს, მამა-შვილს, ორი პირის მიმართ დამამძიმებელ გარემოებაში ჯგუფურად ჩადენილ განზრახ მკვლელობაში ედება ბრალი.

"გამოძიებით დადგინდა, რომ ბრალდებულებმა მარნეულის მუნიციპალიტეტის სოფელ ახლოლალოში, მეზობლად მცხოვრებ დედა-შვილს - 1981 წელს დაბადებულ ზ.ბ.-ს და 1997 წელს დაბადებულ ა.რ.-ს, წარსულში არსებული უთანხმოების ნიადაგზე, მათივე საცხოვრებელი სახლის ტერიტორიაზე, ცეცხლსასროლი იარაღებიდან გასროლით სასიკვდილო ჭრილობები მიაყენეს. სამართალდამცველებმა დანაშაულის ჩადენის იარაღები - სანადირო თოფები ნივთმტკიცების სახით ამოიღეს. დამამძიმებელ გარემოებებში ორი პირის მიმართ ჯგუფურად ჩადენილ განზრახ მკვლელობის ფაქტზე გამოძიება საქართველოს სისხლის სამართლის კოდექსის 109-ე მუხლის მე-2 ნაწილის "ე" და მე-3 ნაწილის "ა" ქვეპუნქტით მიმდინარეობს." - ნათქვამია შს სამინისტროს გავრცელებულ განცხადებაში. აღნიშნული დანაშაული 16-დან 20 წლამდე, ან უვადო თავისუფლების აღკვეთას ითვალისწინებს.

ჩვენ შევეცადეთ მეტი დეტალი გაგვერკვია მომხდარზე, თუმცა ადგილობრივების ნაწილი ამბობს, რომ ბიძაშვილებს შორის უთანხმოების მიზეზი მათთვის არ იყო ცნობილი. ნაწილი კი ამბობს, რომ ამ ოჯახებს შორის ოჯახური კონფლიქტები 5 თვეა გრძელდება, მაგრამ ისინი არ აკონკრეტებენ, რაზე ჰქონდათ მათ უთანხმოება.

"5 თვეა ამ ოჯახებს შორის კონფლიქტი იყო. ისინი ერთმანეთის მეზობლად ცხოვრობენ. რაღაც ოჯახური პრობლემა იყო, მაგრამ რა, ეს არ ვიცი. სოფელმა მართლა არ იცის ეს დეტალები. ოჯახებმა, ბუნებრივია, იციან. 22 წლის ბიჭის დედის მოკვლა არ უნდოდათ, უბრალოდ, დედამ შვილის დაცვა სცადა, გადაეფარა და ამ დროს გასროლილი ტყვია მასაც მოხვდა და ორივე, დედა- შვილი ადგილზე დაიღუპა. ასე ვიცით, რომ ბიჭმა ესროლა თავის ბიძაშვილს, მამაც წაიყვანეს პოლიციაში. გვეგონა, ის დაკითხვაზე იყო წაყვანილი და გამოუშვებდნენ, მაგრამ ახლა შევიტყვეთ, რომ ორივე დააკავეს. ადგილზე გარდაიცვალა ორივე. კარგი ხალხი იყვნენ, ცუდია, რაც მოხდა" - ამბობს AMBEBI.GE-სთან ადგილობრივი ქალბატონი.

"მთელი სოფელი გაოგნებულია, ეს ტრაგედია საღამოს მოხდა. გასროლის ხმა გავიგეთ, რომ მოვედით, უკვე დახოცილები დაგვხვდა დედა-შვილი. გარდაცვლილები და დამნაშავეები ნათესავები არიან, ორივე წყნარი ოჯახი იყო, ჩხუბის ხმაც კი არასდროს გაგვიგია. ყველა გაკვირვებული ვართ" - აღნიშნავს მეზობელი.

ჩვენ ასევე დავუკავშირდით დამია-გეურარხის ადმინისტრაციულ ერთეულში მერის წარმომადგენელს შუქური აბასოვს. ისიც ამბობს, რომ არ იცის დანაშაულის მოტივი.

"ძმების ოჯახია, ერთმანეთის მეზობლად ცხოვრობენ. ბიძაშვილმა თავისი ბიძაშვილი და ბიცოლა მოკლა. წუხელ, დაახლოებით 11 საათზე მოხდა ეს ამბავი. მათ შორის დაპირისპირებაზე არაფერი ვიცოდით, ალბათ, სამართალდამცავები გაარკვევენ ყველაფერს. როგორც ვიცით, 16 წლის ბიჭმა, მაშადი ქაზიმ ზაივმა გაისროლა ცეცხლსასროლი იარაღიდან. მამამისი ასტაფ ზაივიც დაკავებულია, მოკლულია 22 წლის ვასიფი და დედამისი, 1982 წელს დაბადებული იზრეიდა ბაირამოვა.

დედა გადაეფარა შვილს და ასე სცადა მისი დაცვა, ისიც მოკლა. ასე ამბობენ მეზობლები. იზრეიდას ქმარი სახლში არ ყოფილა იმ დროს. მოუვარდნენ ისინი აქეთ, მოკლულის ეზოშია დანაშაული ჩადენილი. მათ შორის რაიმე სერიოზული პრობლემა თუ იყო, არავინ იცოდა. გაირკვევა დეტალები. სხვას ვერაფერს გეტყვით",- გვითხრა მერის წარმომადგენელმა.

მოკლულებს ექსპერტიზა რუსთავის პროზექტურაში ჩაუტარდათ და ისინი სახლში უკვე გადაასვენეს. საქმეზე გამოძიება გრძელდება. სავარაუდოდ, დაკავებულების დაკითხვის შემდეგ გახდება ცნობილი მკვლელობის მოტივი.