"მათ შეეძლოთ რუკა გაეყიდათ კიდეც, მაგრამ ეს არ გააკეთეს. შესაძლოა, ეს მასალები ინახებოდა იმისთვის, რომ ისინი გრძნობდნენ პასუხისმგებლობას" - უსაფრთხოების ექსპერტი

საგარეო საქმეთა სამინისტროს მეზობელი ქვეყნების დეპარტამენტის სასაზღვრო ურთიერთობათა სამსახურის უფროსი ივერი მელაშვილსა და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვას წინასწარი პატიმრობა შეეფარდათ. ბრალდებულების მიმალვის საფრთხის მოტივით, პროკურატურა აღკვეთის სახედ, პატირმობას ითხოვდა, ივერი მელაშვილს გირაოც არ შეუთავაზებია, ილიჩოვას დაცვამ კი მისი 20 ათასლარიანი გირაოს სანაცვლოდ გათავისუფლების შუამდგომლობა დააყენა. არც ერთი დაკავებული წარდგენილ ბრალს არ აღიარებს. ივერი მელაშვილს სასამართლო პროცესზე ემოციური გამოსვლა ჰქონდა, სადაც კიდევ ერთხელ აღნიშნა, რომ უდანაშაულოა და ქვეყნის ინტერესების საწინააღმდეგოდ არასდროს უმუშავია.

შეგახსენებთ, რომ აზერბაიჯანთან, საზღვრის დადგენის კომისიის წევრები ივერი მელაშვილი და ნატალია ილიჩოვა 7 ოქტომბერს დააკავეს. პროკურატურა მათ სადემარკაციო კომისიაში მუშაობისას, საქართველოს ტერიტორიული ინტერესების საწინააღმდეგო რუკებით მუშაობაში ადანაშაულებს. საგამოძიებო უწყების მტკიცებით:

"ექსპერტიზის დასკვნით დადგინდა, რომ ბრალდებულები საზღვრების დელიმიტაციის პროცესში ხელმძღვანელობდნენ 1970-80-იან წლებში გამოცემულ რუკებზე დატანილი საზღვრის ხაზებით, რაც არსებითად ეწინააღმდეგება ჩვენი ქვეყნის ისტორიულ საზღვარს, მათ შორის დავით გარეჯთან მიმართებაში".

დაკავებულების წინააღმდეგ გამოძიება საქართველოს სისხლის სამართლის კოდექსის 308-ე მუხლის პირველი ნაწილით მიმდინარეობს რაც 10-დან 15 წლამდე პატიმრობას ითვალისწინებს.

ambebi.ge უსაფრთხოების ექსპერტს, დავით კუხალაშვილს ესაუბრა, რომელიც დოკუმენტის საქართველოსთვის ისტორიული უსაფრთხოების კუთხით მნიშვნელობაზე საუბრობს, არ გამორიცხავს, რომ ბრალდებულთა წრე გაფართოვდეს და ვარაუდობს, რომ აღნიშნული პოლიტიკური გადაწყვეტილება, რომელიც მაღალი რანგის თანამდებობის პირის მიერ უნდა იყოს მიღებული, შესაძლოა, გარკვეულ პოლიტიკურ კორუფციასაც უკავშირდებოდეს.

"ყველაზე ცუდი ის გახლავთ, რომ, ფაქტობრივად, ჩვენს ქვეყანას გააჩნდა ისტორიული უსაფრთხოების კუთხით ყველაზე მნიშვნელოვანი მტკიცებულებითი დოკუმენტაცია და ის არ იქნა გამოყენებული იმ პროცესში, რომელიც ჩვენი ინტერესების სასარგებლოდ შეიძლებოდა დასრულებულიყო. აქ არის ორი მომენტი:

1. რეალურად, ამ ადამიანებს ეს ინფორმაცია ჰქონდათ წარდგენილი კომისიისთვის, კომისიის ოქმში შეიძლება ეს დაფიქსირებულიცაა და არ მოხდა ამის გათვალისწინება.

2. რუკა არ წარუდგინეს კომისიას და შესაბამისად, ამით დააზიანეს საქართველოს ინტერესი.

არც ისაა გამორიცხული, რომ მიღებულია პოლიტიკური გადაწყვეტილება მაღალი რანგის თანამდებობის პირის მიერ და შესაძლოა, ეს გადაწყვეტილება გარკვეულ პოლიტიკურ კორუფციასაც უკავშირდებოდეს. ცალსახად იკვეთება დაინტერესებული უცხო ქვეყნების სადაზვერვო ინტერესის გატარება ჩვენი ქვეყნის ინტერესების საზიანოდ. დანარჩენი, გამოძიების პროცესზეა დამოკიდებული - რას იტყვიან თვითონ ის პირები, ვისაც ეს რუკები გააჩნდათ. დანაშაული შეიძლება იყოს ჩადენილი ქმედებით, ან უმოქმედობით. ორივე შემთხვევაში ვფიქრობ, რომ დანაშაულის ნიშნები არის იქიდან გამომდინარე, რომ თუ ეს ადამიანები თვლიდნენ, რომ ეს რუკები წარმოადგენდა რეალურ მტკიცებულებათა ბაზას, მათ აუცილებლად უნდა შეექმნათ შესაბამისი დოკუმენტები და მიემართათ საგარეო საქმეთა და შს სამინისტროებისთვის. სავარაუდოდ, შესაძლებელია, რომ ამ შემთხვევაში მაღალი რანგის პოლიტიკური ლიდერის გადაწყვეტილებამ ითამაშა დიდი როლი”.

კითხვაზე, ეს ადამიანები დამოუკიდებლად მიიღებდნენ თუ არა გადაწყვეტილებას და გაფართოვდება თუ არა ბრალდებულთა წრე, ექსპერტი პასუხობს:

"აუცილებლად გაფართოვდება პირთა წრე, ვინც ამ საქმეში ფიგურირებდა და ისინი მისცემენ ინფორმაციას გამოძიებას, თუ რა მოხდა რეალურად. ეს არის წმინდა ისტორიული უსაფრთხოების მიმართულება და მინდა გითხრათ, რომ უცხო ქვეყნის სპეცსამსახურები ნადირობენ მტკიცებულებითი ფორმის დოკუმენტებზე მათ გასანადგურებლად, რათა მერე ტერიტორიული პრეტენზიები წამოაყენონ ამა თუ იმ ქვეყნის მისამართით და შემდეგ ხელში ჩაიგდონ ეს ტერიტორიები. ვფიქრობ, ამ მოდელმა იმუშავა. ეს ადამიანები გადაწყვეტილებას ვერც ერთ ვარიანტში დამოუკიდებლად ვერ მიიღებდნენ. შესაძლებელია, მათ ეს დოკუმენტები იმიტომაც შეინახეს, რომ როცა დრო მოვიდოდა, ჩვენება მიეცათ. მათ შეეძლოთ რუკა გაეყიდთ კიდეც კარგ ფასად, მაგრამ ეს არ გააკეთეს. შესაძლოა, ეს მასალები ინახებოდა სწორედ იმისთვის, რომ ისინი გრძნობდნენ პასუხისმგებლობას და როცა დრო მოვიდოდა, ისინი გარკვეულ ინფორმაციას მიაწვდიდნენ დაინტერესებულ მხარეს (ხელისუფლებას).

ფაქტია, რომ კარგი ნამუშევარია, მათ შორის, ოპერატიული კუთხით და ზოგადად, თუ გადავხედავთ ჩვენს ისტორიას ბოლო 30 წლის განმავლობაში, ამ მუხლით სს საქმე არ აღძრულა. ეს პროცესები თუ გაგრძელდა, ძალიან ბევრი ყოფილი თანამდებობის პირი თავის ადგილს დაიკავებს საქართველოს ისტორიაშიც და პასუხსაც აგებს იმ ქმედებებისთვის, რაც მათ ქვეყნის ინტერესების საწინააღმდეგოდ განახორციელეს. ეს არის უმძიმესი თემა და მათ შეეძლოთ, როდესაც ხელისუფლება შეიცვალა, მაშინვე განეცხადებინათ და უმოქმედობით ქვეყნის ინტერესების დამაზიანებელ საქმეში არ მიეღოთ მონაწილეობა. ასეთი დოკუმენტები არის მკაცრი აღრიცხვის დოკუმენტები, რომლებიც ინახება ეროვნულ, ისტორიულ არქივებში და სახელმწიფომ ის ისევე უნდა დაიცვას, როგორც სახელმწიფოს საზღვარი.

ჩვენდა სამწუხაროდ, ყველა იმპერია, ვინც კი გვებრძოდა, ანადგურებდა ისტორიულ მტკიცებულებას. რისთვის სჭირდებოდათ და ინახავდნენ ისინი ამ მტკიცებულებას? იმისთვის თუ სჭირდებოდათ, რომ დღის სინათლეზე გამოეტანათ, მათ ამის დრო ჰქონდათ...

ფაქტია, რომ საბოლოო ჯამში, ამ წუთში გვაქვს ხელსაყრელი დოკუმენტი საერთაშორისო არენაზე ჩვენი პოზიციების აღსადგენად იმ ტერიტორიაზე, რომელზედაც გარკვეულწილად, კონტროლი დაგვაკარგვინეს. კარგი დიპლომატიით გვაქვს შანსი წარმატებას მივაღწიოთ".

• იხილეთ ასევე: "მე ამისთანა ბრალდებით, ვერ ვიცოცხლებ, არ შემიძლია... ვერც ციხე გამტეხს" - რა თქვა ივერი მელაშვილმა პროცესზე