სიჩუმის ქალაქიდან ხმაურიანი წვეულებების ქალაქამდე - ფოტოები უხანიდან, რომელიც საზოგადოების კრიტიკის მიზეზი გახდა

ჩინეთის ქალაქ უხანის სახელი დღეს მთელმა მსოფლიომ იცის და ამის მიზეზი კორონავირუსია. ოფიციალური ვერსიით, COVID-19 ჩინეთის სწორედ ამ ქალაქიდან გავრცელდა.

ვიდრე ვირუსი მთელ მსოფლიოს მოედებოდა და სხვადასხვა ქალაქები კარანტინის რეჟიმში დაიწყებდნენ ცხოვრებას, მანამდე უხანი დაცარიელდა, პირველად კორონავირუსის საფრთხის გამო სწორედ ამ ქალაქში მცხოვრები ადამიანები გამოკეტეს სახლებში, დანარჩენი მსოფლიო კი ყოველ დღე ინტერესით აკვირდებოდა იქ მიმდინარე პროცესებს, ეპიდემიოლოგიურ ვითარებას და ვირუსთან დაკავშირებულ ამაღელვებელ ადამიანურ ისტორიებს

სიჩუმის ქალაქად ქცეული უხანი დღეს, კორონავირუსის გავრცელებიდან რამდენიმე თვის შემდეგ, სულ სხვა ცხოვრებით ცხოვრობს. იქაურ ქუჩებში კვლავ ხმაურია და ადამიანები პანდემიამდელ ცხოვრებას აგრძელებენ. არ ერიდებიან ხალხმრავალ წვეულებებს, კონცერტებსა და მუსიკალურ ფესტივალებს.

BBC წერს, რომ უხანში ათასობით ადამიანი ერთმანეთის მხარდამხარ, აუზის პირას შეგროვდა და მუსიკალურ ფესტივალს დაესწრო, სადაც არავინ იცავდა სოციალურ დისტანციას და არც პირბადე ეკეთა ვინმეს.

გამოცემა ასევე აქვეყნებს ფოტოებს და წერს, რომ ეს სურათები გასულ შაბათ-კვირასაა გადაღებული. მაშინ, როცა მსოფლიო კორონავირუსის პანდემიას ებრძვის და ყოველდღიურად ათასობით ახალი შემთხვევა ვლინდება და ზოგიერთ ქალაქში ადამიანები კვლავ კარანტინში არიან, აღნიშნული ფოტოები საზოგადოების სიბრაზის მიზეზი აღმოჩნდა და სოციალურ ქსელებში ისინი ვირუსულად გავრცელდა. საზოგადოების ნაწილი ამ ფოტოებს ირონიულად მიიჩნევს.

ოფიციალური ინფორმაციით, კორონავირუსის ახალი შტამი, COVID-19 ჩინეთის ქალაქ უხანში, 2019 წლის დეკემბერში გამოვლინდა, საიდანაც მალე სხვა ქვეყნებშიც გავრცელდა. 2020 წლის 11 მარტს ჯანდაცვის მსოფლიო ორგანიზაციამ კორონავირუსის პანდემია გამოაცხადა და მსოფლიო დღემდე პანდემიის რეჟიმში ცხოვრობს.

არსებობს დაუდასტურებელი ინფორმაცია, რომ ვირუსი ჩინეთში რამდენიმე თვით ადრე, 2019 წლის დეკემბერში გავრცელდა, თუმცა ინფორმაცია დამალეს. აშშ-ის ოფიციალური პირები და მათ შორის, პრეზიდენტი დონალდ ტრამპი ჩინეთსა და ჯანდაცვის მსოფლიო ორგანიზაციას კორონავირუსთან დაკავშირებული ინფორმაციის დამალვაში სდებს ბრალს და პასუხისმგებლობას ჯანმოს ხელმძღვანელს აკისრებს. სწორედ ამის გამო აშშ-მა ჯანდაცვის მსოფლიო ორგანიზაცია დატოვა.

ბოლო მონაცემებით, კორონავირუსით ინფიცირებულთა რაოდენობამ, გლობალური მასშტაბით, 22 მილიონს გადააჭარბა, გარდაცვლილია 778 102 პაციენტი, ხოლო გამოჯანმრთელებულთა რაოდენობა 14.8 მილიონს აჭარბებს. ინფიცირებულთა რაოდენობის მიხედვით, მსოფლიო ქვეყნების ათეული ასეთია - აშშ, ბრაზილია, ინდოეთი, რუსეთი, სამხრეთ აფრიკა, პერუ, მექსიკა, კოლუმბია, ჩილე და ესპანეთი. რაც შეეხება ჩინეთს, ინფიცირებულთა რაოდენობის თვალსაზრისით, ის მსოფლიოს 34-ე ქვეყანაა, სადაც COVID-19-ის 84 871 დადასტურებული შემთხვევაა გამოვლენილი, 4 634 პაციენტი გარდაიცვალა, ხოლო 79 642 გამოჯანმრთელდა.