"ინფიცირებულებმა მოულოდნელად ყნოსვისა და გემოს შეგრძნება დაკარგეს... აქ ჩარჩენილია ექიმების ჯგუფიც" -  რა მდგომარეობაა დაკეტილ მესტიაში

დღეს, საკოორდინაციო სხდომის დასრულების შემდეგ მესტიაში, უშგულსა და ლენჯერში საკარანტინო შეზღუდვები დაწესდა, მიზეზი ერთ დღეში გამოვლენილი კოვიდინფიცირების 17 შემთხვევა გახდა. ამ ეტაპზე შეზღუდულია გადაადგილება და ადგილზე მიმდინარეობს ღრმა ეპიდკვლევა. სვანეთში კორონავირუსით აფეთქების მიზეზი თბილისიდან ჩასული სტუმარი გახდა.

AMBEBI.GE-ს ინფორმაციით, ლენჯერში, თბილისიდან სტუმრად ჩასულმა ქალბატონმა და ოჯახის სხვა წევრებმა მოულოდნელად ყნოსვისა და გემოს შეგრძნება დაკარგეს. შემდეგ კი ოჯახის ერთ-ერთ წევრს მოხუც ქალბატონს, რომელსაც ქრონიკული დაავადება აქვს, სიცხემ აუწია. რადგან ქალი ასთმით არის დაავადებული ქუთაისში გადაიყვანეს, სადაც გამოკვლევის შემდეგ "კოვიდ-19" დაუდასტურდა.

კოვიფინფიცირებულები აღმოჩნდა ოჯახის ყველა წევრი, სულ 17 კაცი, თუმცა მოხუცი ქალის გარდა ყველა უსიმპტომოა, მათ შორის ერთ-ერთი ორსულია.

"ბებიას ფილტვის ანთება აქვს, თუმცა მსუბუქ ფორმაში, არც ახველებს. თბილისიდან ჩამოსული ქალის ყველა კონტაქტი თვითიზოლაციაშია" - გვიყვება წყარო...

ჩვენთვის ასევე ცნობილი გახდა, რომ მესტიაში ჩარჩა თბილისიდან ჩასული ექიმების საკმაოდ დიდი ჯგუფიც, რომელიც ერთ-ერთმა ფარმაცევტულმა კომპანიამ ტრენინგზე ჩაიყვანათ...

აღნიშნული ინფორმაცია ჩვენთან საუბარში სამეგრელო-ზემო სვანეთის გუბერნატორის მოადგილემ ნინო ვიბლიანმა დაადასტურა...

- ქალბატონო ნინო, რა მდგომარეობაა ახლა მესტიაში?

- მოგეხსენებათ, ჩვენთან გამოვლინდა "კოვიდინფიცირების" ფაქტი, ამიტომ ამ ეტაპზე მიმდინარეობს ღრმა ეპიდკვლევა. მთელი სოფლის ღრმა ეპიდკვლევა მიდის და ამ ეტაპზე 300-ზე მეტი ბიოლოგიური ნიმუშია აღებული, ხვალ დილიდან ეპიდკვლევა განახლდება.

- ჩვენი ინფორმაციით, მესტიაში ჩარჩენილია ექიმების საკმაოდ დიდი ჯგუფიც, რომელიც ერთ-ერთ ფარმაცევტულ კომპანიას ჰყავდა წამოყვანილი ტრენინგებზე...

- დიახ, გიდასტურებთ, არა მარტო ექიმების ჯგუფი, არამედ აქ იმყოფებიან ტურისტებიც. საგანგებო მდგომარეობაზე გადასვლიდან გამომდინარე ტურიზმის ეროვნული ადმინისტრაცია საგანგებო მუშაობის რეჟიმზე გადავიდა. უკავშირდება განთავსების ყველა ობიექტს, ტურისტული ნაკადების დასადგენად. რა ლოკაციაზეც უნდათ გადასვლა ამ ადამიანებს, ამას ტურიზმის ადმინისტრაცია უზრუნველყოფს, ასევე ტრანსპორტირებასაც, მაგრამ აუცილებლად უნდა გაიარონ 14 დღიანი კარანტინის პერიოდი.

- პირველწყარო თბილისიდან სტუმრად ამოსული ქალია?

- თბილისიდან ამოსული ქალბატონი იმყოფებოდა სტუმრად ოჯახში, საიდანაც მოხდა გავრცელება. დანარჩენი მიმდინარეობს კვლევა და სანამ ღრმა ეპიდკვლევა არ ჩატარდება, მანამდე კომენტარს ვერ გავაკეთებთ.

- ჩვენი ინფორმაციით ეს ქალბატონი ორსულია...

- სავარაუდოდ, არა ქალბატონი, არამედ მამაკაცი შეიძლება იყოს ვირუსის მომტანი, მაგრამ სანამ ღრმა ეპიდკვლევა არ ჩატარდება, ვერ დავადასტურებთ, თუმცა გიდასტურებთ, რომ ორსული გოგონაცაა კოვიდინფიცირებული და ამჟამად იმყოფება თბილისში და ეკუთვნის იმ ოჯახის, ლენჯერის კლასტერს.

- გავრცელებული ინფორმაციით ყველა კარგად გრძნობს თავს, გარდა ასაკოვანი ქალბატონისა.

- დიახ, ყველა ინფიცირებულის მდგომარეობა დამაკმაყოფილებელია, ერთ ქალბატონს აქვს თანმდევი ქრონიკული დაავადება და შედარებით უფრო საყურადღებოა, თუმცა მძიმეს ვერ ვიტყვი.

- რამდენი ხნით იქნება დაკეტილი რეგიონი?

- ეპიდკველევის დასრულების შემდეგ გვექნება ინფორმაცია, წინასწარ ვერაფერს გეტყვით.