ქართველმა დიზაინერმა, ძალადობის მსხვერპლ ქალთა დასახმარებლად, დიპლომატები, პოლიტიკოსები და შოუბიზნესის წარმომადგენლები გააერთიანა

ქართველმა დიზაინერმა, ბრენდის "Nina Zarqua collection" დამფუძნებელმა ნინა ზარქუამ მორიგი საქველმოქმედო ღონისძიება გამართა. "Nina Zarqua collection"-ის სამოსი და აქსესუარები საცხენოსნო კლუბ "შავი ცხენის" ტერიტორიაზე გამოიფინა და მნიშვნელოვანი ფასდაკლებით გაიყიდა. შემოსული თანხა კი სრულად გადაირიცხა ძალადობის მსხვერპლ ქალთა ფონდში. ღონისძიებას დიპლომატები, პოლიტიკოსები და შოუბიზნესის წარმომადგენლები ესწრებოდნენ. როგორც ბრენდის დამფუძნებელი ამბობს, ქალებზე ძალადობის ფაქტები, სამწუხაროდ, მზარდია და საქველმოქმედო ღონისძიებით მას სურდა ერთი მხრივ ძალადობა, როგორც დანაშაული დაეგმო, მეორე მხრივ კი მსხვერპლი ქალების გაძლიერების პროცესში მონაწილეობა მიეღო.

ღონისძიებას თურქეთის ელჩი საქართველოში ესწრებოდა. როგორც ფატმა სერენ იაზგანიმ ambebi.ge-სთან განაცხადა ძალადობის წინააღმდეგ საზოგადოებაში ცნობიერების ამაღლება მნიშვნელოვანია.

"დღევანდელი ღონისძიება იმაზეა, თუ როგორ შეგვიძლია ჩვენ საქართველოში, საზოგადოების სხვადასხვა ნაწილში ოჯახში ძალადობის შესახებ ცნობიერების ამაღლება. აქ ბევრი განსხვავებული ადამიანია, მათ შორის ფერმის მფლობელები, წარმომადგენლები დიპლომატიური წრეებიდან, არასამთავრობო და სოციალური პასუხისმგებლობის სექტორიდან. ჩვენ ამ სფეროების გაერთიანება გვსურს, რადგან ეს არის საერთო პრობლემა. ასევე, გვსურს, რომ ნატო-ს ძალადობის წინააღმდეგ მიმართულ ქსელს მეტი რესურსი მივცეთ, რათა მეტ ქალს და ბავშვს დავეხმაროთ - მათ უნდა იცოდნენ, რომ არსებობს სირთულეებიდან გამოსავალი. ეს ბევრად მნიშვნელოვანია, ვიდრე ნებისმიერი საზღვარი, ვიდრე ნებისმიერი პოლიტიკური საკითხი, ეს პრობლემა პოლიტიკის მაღლა დგას და ვფიქრობ, ასე უნდა გავაგრძელოთ” - განაცხადა თურქეთის ელჩმა საქართველოში.

ყოფილი მოდელი ნინა ზარქუა აქსესუარების, ფეხსაცმელების, ჩანთებისა და სამკაულის ხაზზე მუშაობს, რომელიც მსოფლიოს სხვადასხვა ქვეყანაში იყიდება. ქართველი დიზაინერის სახელი დიდი ხანია გასცდა ჩვენი ქვეყნის ფარგლებს. 2019 წელს, მუსიკალურ ფესტივალზე Coachella Valley Music and Arts-ზე ცნობილი ამერიკელი ტოპ-მოდელი კენდალ ჯენერი, სწორედ ზარქუას შექმნილი ფეხსაცმლით წარსდგა მსმენელის წინაშე.