"ანგარიშზე ჰქონდა 75 000 ლარიო, ან სინდისი არ გაქვთ, ან ნამუსი ტალახში რომ სვრით ბავშვის სახელს" - რას წერს კიბერუსაფრთხოების საკითხების ექსპერტი

ექსპერტი კიბერუსაფრთხოების საკითხებში ხათუნა მშვიდობაძე გარდაცვლილ 23 წლის თამარ ბაჩალიაშვილის ანგარიშზე დიდი რაოდენობით თანხის არსებობასთან დაკავშირებით საზოგადოებაში გამოწვეულ აჟიოტაჟს ეხმიანება და "ფეისბუქის" პირად გვერდზე ვრცელ პოსტს აქვეყნებს, სადაც აღნიშნავს, რომ პროგრამირება და კიბერუსაფრთხოება მაღალანაზღაურებადი სფეროა.

"ბევრი ვიფიქრე დამეწერა თუ არა, მაგრამ ამის არ დაწერა და უპასუხოდ დატოვება არ შეიძლება. პროგრამირება, კიბერუსაფრთხოება და ა.შ მაღალანაზღაურებადი სფეროა. ვიღაცეები აზიარებენ რომ გარდაცვლილ გოგონას ჰქონდა ანგარიშზე 75 000 ლარიო და ამით უკავშირებენ მის საქმიანობას კიბერ კრიმინალურ სინდიკატს.

ან სინდისი არ გაქვთ, ან ნამუსი, ან ადამიანობის არაფერი შეგრჩათ ასე რომ სვრით ტალახში ამ ბავშვის სახელს?! რა ხალხი ხართ თქვენ? ვინ ხართ? სად გაიზარდეთ მართლა?! კიბერუსაფრთხოების სფეროში ვარ უკვე ათი წელია და ამ მიმართულებით დიდხნიანი გამოცდილება მაქვს. ამ სფეროში კადრების დეფიციტი არა მარტო საქართველოში, არამედ ამერიკაშიცაა -- თვით ინტერნეტ ტექნოლოგიების ქვეყანაში.

ევროპაშიც კადრების დიდი დეფიციტია, მათ შორის გერმანიაში, საფრანგეთში და ა.შ ანუ მოთხოვნა აჭარბებს (მსოფლიო ბაზარზე) მიწოდებას --ამ პროფესიის კადრებზე. ელემენტარული supply-demand-ის საკითხია. შესაბამისად ანაზღაურებაც მაღალია. საშუალო დონის პროგრამისტის ანაზღაურება საათში არის დაახლოებით 150 დოლარი. (მაღალი დონის პროგრამისტის ანაზღაურება საათში ბევრად მეტია) ეხლა გადავამრავლოთ რვა საათზე და დღეში გამოდის 1200 დოლარი.

დამწყები პროგრამისტის ანაზღაურება დაახლოებით 50 დოლარია. გადავამრავლოთ რვა საათზე გამოდის 400 დოლარი დღეში. ეხლა გადავამრავლოთ ათ დღეზე, გამოდის 12,000 დოლარი საშუალო დონის პროგრამისტზე და დამწყები დონის პროგრამისტზე 4,000 დოლარი. (ათ დღეში).

ეხლა ავიღოთ პენტესტერების დღიური შემოსავალი-- მინიმუმ 500 დოლარია დღეში, საშუალოდ 1000 დოლარი დღეში. ეს სფერო ბევრ სუბ-სპეციალობას მოიცავს და ყველა მიმართულების საათობრივ, დღიურ თუ თვიურ ხელფას ვერ ჩამოვწერ აქ.თან ანაზღაურება გამოცდილების მიხედვით იცვლება. საკმარისად მოვიყვანე მაგალითები.

რა არის ეხლა იმაში გასაკვირი, რომ გარდაცვლილი გოგონას ანგარიშზე 75 000 ლარი (დაახლოებით 25 000 დოლარი) შესაძლოა ყოფილიყო. ერთ-ერთი მედია საშუალება ავრცელებს ამ ინფორმაციას, აზიარებს უამრავი და ჩირქს ცხებენ გარდაცვლილს.

ერთ პროექტში შეიძლება გადაგიხადონ ეს თანხა. სანამ სისულელეებს დაწერთ და დაიჯერებთ, იქნებ ვინმეს ვინც თქვენზე მეტი იცის ჰკითხოთ მაინც. ან ბოლობოლო დაგუგლეთ. ზოგადი წარმოდგენა მაინც გექნებათ. მერე რომ მიადექით ამ კომპანიას და ამოსვარეთ ტალახში ასე ყოველგვარი ფაქტების გარეშე, ეს როგორ შეიძლება?! ეთიკის ნორმები დაიცავით მაინც.

პ.ს კიდევ კომპიუტერის პაროლი როგორ ვერ გატეხესო? ხალხნო, FBI vs Apple ქეისი წაიკითხეთ მაინც, ასე მარტივი ამბავი არ არის ეს და ასეთი ქეისები ბევრია. ყველას კი არ აქვს პაროლად 123456. გმადლობთ", - წერს "ფეისბუქზე" ექსპერტი კიბერუსაფრთხოების საკითხებში.

ცნობისთვის, 23 წლის თამარ ბაჩალიაშვილს, რომელიც რამდენიმე დღის წინ გარდაცვლილი ნახეს, საბანკო ანაბარზე 75 000 ლარი ჰქონდა. ინფორმაციას ამის შესახებ "იმედი" ავრცელებს.

თამარ ბაჩალიაშვილი პროგრამისტი იყო და ის რამდენიმე კომპანიაში მუშაობდა. როგორც მედიისთვის არის ცნობილი, ის კომპანია ZAG-სა და ავსტრიული კომპანია SpryFlash-ში მუშაობდა.