18
მაისიდღის ზოგადი ასტროლოგიური პროგნოზი
გოგონა, რომლის წვეულებაზე დაწყებულ კონფლიქტს 19 წლის ფეხბურთელი გიორგი შაქარაშვილი ემსხვერპლა, საბედისწერო ღამეს ტვ პირველისთვის" მიცემულ ექსკლუზიურ ინტერვიუში დეტალურად იხსენებს. ის ამბობს, რომ იუბილეზე გიორგი შაქარაშვილი თავად არ დაუპატიჟია, რადგან მას ახლოს არ იცნობდა.
"ჩემი მეგობრის მეგობარი იყო და აქედან მოხდა მისი დაპატიჟება. მანამდე 3-4ჯერ მყავდა ნანახი. ჩემმა მეგობარმა ლიზი ნადირაძემ მიწერა და დაპატიჟა. ვიცოდი, რომ მოსვლას აპირებდა" - ამბობს გაბეჩავა.
როგორც ამბობს ამის შემდეგ გიორგი "ინსტაგრამზე" დაუკავშირდა და უთხრა, რომ დაბადებისდღისთვის ემზადებოდა.
რაც შეეხება ნარეკვავში მომხდარ კონფლიქტს, გაბეჩავა იხსენებს, რომ თავდაპირველად მცირე კამათი დიჯეი კოკო ღიბრაძის მისამართით გამოთქმულმა რეპლიკამ გამოიწვია, თუმცა სიტუაცია მალევე განიმუხტა.
"უკვე 11 საათი იყო რომ ბავშვები აღარ იყვნენ სახლში, მე გარეთ არ გავსულვარ წვიმის გამო. ერთ-ერთი მოდის და მეუბნება გარეთ რაღაც ხდებაო, კამათობენო და იქნებ ჩააწყნაროო. მივედი იმ მომენტში, კიბის ეპიზოდი რომ ჩანს და ვცდილობდი გაშველებას. კონკრეტული პირები არ მახსოვს, მაგრამ საბურთალოელები და ნახალოვკელები ჩხუბობდნენ, ერთ-ერთი იყო ჩიქოვანი. ჩიქოვანი იყო ძალიან ნაცემი. დავინახე, რომ ქვა ჩაარტყეს თავში... ამის შემდეგ გამოიძახეს სასწრაფო, ოღონდ სად და ვინ, ეს დეტალები არ ვიცი" - ამბობს გაბეჩავა და აქვს აზუსტებს, რომ ვახო ჩიქოვანი დაბადების დღეზე თავად არ დაუპატიჟებია.
როგორც გახმაურებული საქმის მოწმე ჰყვება, გიორგი შაქარაშვილი ჩხუბში არ მონაწილეობდა.
"მერე გავიგე, რომ თურმე გიორგი აშველებდა და საბურთალოელების მხარეს იდგა. 23:40 წუთზე ჩხუბის მონაწილეები მცხეთიდან წავიდნენ. სახლი უკვე დაცლილი იყო. ნარეკვავში სულ რამდენიმე ადამიანი დავრჩით და მათ შორის იყო გიორგი შაქარაშვილი და გუკა ამირხანაშვილი" - განაცხადა გაბეჩავამ.
ასევე გოგონა იხსენებს, ეპიზოდს, როდესაც მეგობრებმა თემქაზე, ადეიშვილების სახლში ასვლა გადაწყვიტეს. როგორც ის ამბობს, სწორედ იქ ცდილობდნენ შაქარაშვილის შესახებ ინფორმაცია მიეღოთ.
"თემქაზე როდესაც მივედით გავჩერდით ეზოში და ვარკვევდით რაღაცეებს. მივხვდი, რომ ჩემი კლასელების ნამოქმედარი იქნებოდა. ყველას ტელეფონი გათიშული ჰქონდა. დავურეკე თენგო ბარბაქაძეს, ირაკლი მუმლაძეს... ვწერდი მაგრამ უშედეგოდ. ვნერვიულობდით და განვიცდიდით, რომ ასეთი რაღაც მოხდა, მაგრამ ვერაფერი გავიგეთ.. ვერაფერს ვერ ვიზამდით. არ გვეგონა, რომ გარდაცვლილს ვიპოვიდით 4 დღის შემდეგ" - ამბობს გაბეჩავა.
კითხვაზე, რატომ არ დარეკა მან ან მისმა რომელიმე მეგობარმა პოლიციაში იმ ღამეს, ასე პასუხობს:
"ჩემს დაბადების დღეზე არ მინდოდა მეგობრებს შორის კამათის დროს პოლიციისთვის დამერეკა. ამ გადმოსახედიდან რომ მცოდნოდა რა მოხდებოდა დავრეკავდი, მაგრამ არ მიფიქრია რომ მსგავსი რამ მოხდებოდა" - ამბობს ანა გაბეჩავა.
შეგახსენებთ, რომ 19 ივნისს, დაახლოებით 11:00 საათზე, გიორგი შაქარაშვილის დაკარგვის შესახებ ოჯახმა შინაგან საქმეთა სამინისტროს მიმართა. პოლიციამ, სამაშველო სამსახურთან ერთად, შეტყობინების მიღებისთანავე დაიწყო სამძებრო სამუშაოები.
4-დღიანი საძიებო სამუშაოების შედეგად, მყვინთავებმა ფეხბურთელ გიორგი შაქარაშვილის ცხედარი წყალში იპოვეს. მომხდარზე დაკავებულია 17 პირი, მათ შორის არიან მორაგბეები, ძიუდოისტი და ფეხბურთელი. ყველა დაკავებულს მცხეთის სასამართლომ წინასწარი პატიმრობა შეუფარდა.
ექსპერტიზის დასკვნის მიხედვით, გიორგი შაქარაშვილი გარდაცვალების მიზეზი ასფიქსია გახდა. ამავდროულად, გიორგი შაქარაშვილის ცხედარზე აღინიშნება სიკვდილის წინა ახლო პერიოდში მკვრივი-ბლაგვი საგნის მოქმედებით მიყენებული, სიცოცხლისდროინდელი დაზიანებები შუბლის/თავის, ორივე თვალბუდის, ზედა და ქვედა ტუჩის მიდამოებში, მარჯვენა იდაყვის სახსრისა და მარჯვენა წინამხრის მიდამოებში, აგრეთვე მუცლის, საზარდულის, ბოქვენის, წელისა და ორივე დუნდულოს მიდამოებში.
ექსპერტიზის დასკვნისა და საქმეში არსებული სხვა მტკიცებულებების ერთობლივი ანალიზის საფუძველზე სისხლის სამართლის საქმის უკვე არსებულ კვალიფიკაციას დაემატა დამამძიმებელ გარემოებებში ჯგუფურად განხორციელებული განზრახ მკვლელობა, დანაშაული გათვალისწინებული საქართველოს სისხლის სამართლის კოდექსის 109-ე მუხლის მე-2 ნაწილის „ე“ ქვეპუნქტით და გამოძიება გიორგი შაქარაშვილის გარდაცვალების ნაწილში წარიმართება აღნიშნული კვალიფიკაციით.
