პირბადის გარეშე მოძრაობა, 50 ლარის ნაცვლად, შესაძლოა 20-30 ლარით დაჯარიმდეს

პირბადის ტარების წესის დარღვევისთვის შესაძლოა, ჯარიმა არა 50 ლარის, არამედ 20-30 ლარის ოდენობით განისაზღვროს. როგორც იურიდიულ საკითხთა კომიტეტის თავმჯდომარე ანრი ოხანაშვილმა ჟურნალისტებთან განაცხადა, ეს იქნება ფიქსირებული თანხა 20, 25 ან 30 ლარის ოდენობით. მისი თქმით, საჭიროა დეტალური, რაციონალური სანქციების შემოღება, რომელიც საზოგადოებას მძიმე ტვირთად არ დააწვება.

"ჩვენი თვითმიზანი არ არის ვინმესთვის ფულადი თანხის დაკისრება, ჩვენი ამოცანაა ჩვენი საზოგადოების ჯანმრთელობის დაცვა, რომ მაქსიმალურად შევაფერხოთ კორონავირუსის გავრცელება. ამისთვის პირბადე არის ერთ - ერთი მნიშვნელოვანი კომპონენტი, რომ მოქალაქეებს ჰქონდეთ ვალდებულება დახურულ საჯარო სივრცეში ატარონ პირბადე. ღია სივრცეებში პირბადის ტარების ვალდებულება არ არსებობს, პასუხიგებლობაც არ არის გათვალისწინებული. ასევე, კონკრეტულმა იურიდიულმა პირმა უნდა უზრუნველყოს კონტროლი, რომ პირბადის გარეშე პირი არ შევიდეს", - განაცხადა ოხანაშვილმა.

მისივე თქმით 50-ლარიანი ჯარიმის შემცირებას გუნდი ეთანხმება.

"ერთი მნიშვნელოვანი საკითხი, რომელიც ხაზგასმით მინდა გითხრათ, ჩვენ პირველადი სახით წარმოვადგინეთ 50 ლარის ოდენობით ფულადი სანქციები, თუმცა, მე წარვადგინე გუნდში ეს პროექტი, ჩვენ ვიმსჯელეთ და ჩვენი გუნდის უმრავლესობის პოზიციაა, რომ ეს 50 ლარი არ უნდა იყოს მყარად ფიქსირებული, შესაბამისად, ჩვენ კომიტეტზე უკვე დავსვამთ საკითხს, რომ პირბადის არტარებისთვის თანხა იყოს არა 50 ლარი, არამედ შევამციროთ ეს, სავარაუდოდ, 20-დან 30 ლარამდე იქნება ეს თანხა დაკორექტირებული. ამის მოტივაცია გახლავთ ის, რომ არ გვსურს მძიმე ტვირთად დააწვეს ეს საზოგადოებას. ჩვენ ამ კვირაში ვიწყებთ განხილვას, შესაბამისად, შეგვიძლია სამივე მოსმენით მივიღოთ და ამ კვირაშივე ამოქმედდება," - განაცხადა ოხანაშვილმა.

დაავადებათა კონტროლის ეროვნული ცენტრის დირექტორის მოადგილის, პაატა იმნაძის განცხადებით, მაქსიმალურად უნდა დავიცვათ პირველ რიგში ნიღბის ტარების წესი.

მისივე თქმით, თუ ნიღაბი უკეთია ორივეს - დაავადებულს და ჯანმრთელს, ამას პრაქტიკულად ნულამდე დაყავს დაავადების რისკი.

„მაქსიმალურად დავიცვათ პირველ რიგში ნიღბის ტარება, თუ ნიღაბი უკეთია ავადმყფოს ეს ძალიან ამცირებს გადადების რისკს, თუ უკეთია ჯანმრთელს, ესეც ამცირებს გადადების რისკს, მაგრამ თუ ნიღაბი უკეთია ორივეს - დაავადებულს და ჯანმრთელს, ამას პრაქტიკულად ნულამდე დაჰყავს დაავადების რისკი. ამიტომ მოთხოვნა არის, რომ ნიღაბი უნდა ეკეთოს ყველას, რა თქმა უნდა, ეს არ ეხება ღია სივრცეს, სადაც დისტანციის დაცვა შეგვიძლია და სახლშიც არ არის აუცილებელი ნიღბის ტარება,“ - აღნიშნა პაატა იმნაძემ.