"სიგარეტის მოხმარება მამაკაცებში შემცირებულია, სამწუხაროდ, ქალებში პირიქით გაზრდილია" - თამბაქო საქართველოში ყოველწლიურად მთლიანი სიკვდილიანობის 22%-ს იწვევს

სიგარეტის, ელექტრონული სიგარეტის და ჩილიმის მოხმარება გოგონებსა და ბიჭებში მნიშვნელოვნად არის შემცირებული , - ამის შესახებ დაავადებათა კონტროლის ეროვნული ცენტრის არაგადამდებ დაავადებათა დეპარტამენტის უფროსმა ლელა სტურუამ „ფეისბუქლაივისას“ განაცხადა.

მისი თქმით, მოზრდილ მოსახლეობაში ჩატარებულმა კვლევამ აჩვენა, რომ თამბაქოს მოხმარება შემცირდა მამაკაცებში, თუმცა, ქალებში ეს მაჩვენებელი პირიქით გაიზრდა. თუმცა, როგორც სტურუა ამბობს, მსოფლიო ტენდენცია აჩვენებს, რომ მსგავსი მაჩვენებლის დაფიქსირების შემდეგ, რამდენიმე წელიწადში ქალებშიც მოხმარების მაჩვენებელი კლებისკენ მიდის.

„ჩატარდა ევროპის სასკოლო კვლევა თამბაქოს, ალკოჰოლის და ნარკოტიკების მოხმარების შესახებ, რომელიც 2016 წელსაც გვქონდა ჩატარებული და 2019 წლის მონაცემებმა გვაჩვენა, რომ მნიშვნელოვნად არის შემცირებული როგორც ჩვეულებრივი სიგარეტის, ასევე ელექტრონული სიგარეტის და ჩილიმის მოხმარება როგორც გოგონებში, ასევე ბიჭებში და შესაბამისად, საერთო მოსახლეობაში.

გარდა ამისა, ჩავატარეთ მოზრდილ მოსახლეობაში თამბაქოს გავრცელების შემსწავლელი კვლევა, რომელმაც გვიჩვენა, რომ მცირედით, მაგრამ შემცირებულია თამბაქოს მოხმარება ზოგად პოპულაციაში-შედარებით მნიშვნელოვნად არის შემცირებული მამაკაცებში, სამწუხაროდ, ქალებში არის ოდნავ გაზრდილი მოხმარება“, - განაცხადა სტურუამ.

დაავადებათა კონტროლისა და საზოგადოებრივი ჯანმრთელობის ეროვნული ცენტრის ხელმძღვანელის ამირან გამყრელიძის განცხადებით, თამბაქოს მოხმარების მხრივ საქართველოში საკმაოდ რთული ვითარებაა, რადგან მისი მოხმარებთ გამოწვეული სიკვდილიანობა საერთო რიცხვის 22%-ს შეადგენს.

ამირან გამყრელიძის გამარტებით, თამბაქოს მოხმარების მიმართ განსაკუთრებით მოწყვლადი ახალგაზრდა თაობაა.

„ბევრი საერთო მოდების წერტილია თამბაქოსა და კოვიდ 19-ს შორის, რამეთუ მოგეხსენებათ, კოვიდ-19 უპირველეს ყოვლისა, სასუნთქ სისტემას აზიანებს და მის გართულებას იწვევს, რასაც ჰქვია ატიპიური, ანუ ვირუსული პნევმონია. ამ თვალსაზრისით, ერთის მხრივ თამბაქოს მოხმარებასა და მეორე მხრივ, კოვიდ ინფექციით დასნებოვნებულ პიროვნებებს შორის ბევრი საერთო ზიანია. ამიტომ, ამ საკითხზე ბევრი და დიდი დისკუსიაა, რომლის შესახებაც მოკლედ შემდგომ მოგახსენებთ. მინდა დღეს მთავარი გზავნილი გავაჟღერო- ყველამ უნდა გავითავისოთ, რომ თამბაქო გახლავთ ერთ-ერთი უპირველესი ფაქტი, რომელიც უარყოფითად მოქმედებს ადამიანის ჯანმრთელობაზე, იწვევს 8 მილიონი ადამიანის სიკვდილს, რაც მსოფლიოში საერთო სიკვდილიანობის 12-14%-ია. ამ მხრივ ჩვენ კიდევ უფრო უარესი მდგომარეობა გვაქვს ქვეყანაში, სადაც თამბაქო ყოველწიურად მთლიანი სიკვდილიანობის 22%-ს იწვევს. თამბაქოს მოხმარების მიმართ განსაკუთრებით მოწყვლადია ახალგაზრდა თაობა“, - განაცხადა გამყრელიძემ.