აშშ-ში მცხოვრები მამაკაცი მომაკვდავი მეგობრისთვის ქართული კერძების მომზადებაში დახმარებას ითხოვს - "ცოტა ხნის წინ შეიტყო, რომ სიცოცხლის 2 თვე დარჩა..."

აშშ-ში, ოჰაიოში მცხოვრები ფილიპ კოვალსკი მომაკვდავი მეგობრისთვის ქართული კერძების მომზადებაში დახმარებას ითხოვს. ამ სურვილის შესახებ კოვალსკიმ სოციალური კამპანიის - Spend 4 Seasons in Georgia-ს "ფეისბუქის" გვერდზე დაწერა და დახმარება ითხოვა:

"მოგესალმებით ყველას. საქართველოსთან დაკავშირებული სასწრაფო საქმე მაქვს და თქვენი დახმარების იმედად ვარ. ფოტოზე ჩემი ახლო მეგობარია, რომელსაც სიმსივნის ბოლო სტადია აქვს და ცოტა ხნის წინ შეიტყო, რომ 2 კვირიდან 2 თვემდე სიცოცხლის დრო დარჩა... ის ქართული კულინარიის ენთუზიასტია და მინდა მისთვის ქართული სუფრის გაკეთება, რაც შეიძლება სწრაფად.

პრობლემა იმაშია, რომ ის ცხოვრობს დეიტონში, ოჰაიოს შტატში, სადაც ქართული რესტორნები არ არის. შეუძლია ვინმეს დახმარება? იცნობთ ოჰაიში მცხოვრებ ქართველებს, რომლებიც დაგვეხმარებიან ქართული სუფრის კერძების მომზადებაში? თუ გამოსავალი არ იქნება, რა თქმა უნდა, ვეცდები თავადაც მოვამზადო, მაგრამ არამგონია ქართველებივით გემრიელი გამომივიდეს...." - წერს მიმართვაში კოვალსკი.

ემოციურ პოსტს უამრავი გამოხმაურება მოჰყვა როგორც ქართველებისგან, ისე უცხოელებისგან. მეგობრის დასახმარებლად ფილიპს სთავაზობენ მიმართოს აშშ-ში საქართველოს საელჩოს, აძლევენ მისამართებს, სადაც შეძლებს ქართული კერძების ინგრედიენტების შეძენას და შემდეგ მომზადებას:

"თუ ახლომახლოს ქართულ რესტორანს ან მარკეტებს ვერ იპოვით, მაინც შეძლებთ გემრიელი ქართული კერძებისთვის ინგრედიენტების პოვნას აშშ-ში. თუმცა, ხაჭაპურისთვის შესაფერისი ყველის პოვნა კი გაგიჭირდებათ... ხინკალის გაკეთებით ძალიან ისიამოვნებთ, ლობიო მარტივად მოსამზადებელი კერძია. როგორ ფიქრობთ, რამდენად შევძლებთ თბილისიდან გავუგზავნოთ საჩუქარი? მაგალითად ჩურჩხელა და სხვა, რის გაგზავნასაც ამანათით შევძებთ?" - იდეას სთავაზობს თბილისში მცხოვრები ერთ-ერთი უცხოელი.

"სწორედ ეს არის ნამდვილი მეგობრობა! ღმერთმა დაგლოცოთ თქვენ და თქვენი მეგობარი, გჯეროდეთ, რომ სასწაულები ნამდვილად ხდება! სამწუხაროდ, ოჰაიოდან შორს ვარ, თორემ სიამოვნებით დაგეხმარებოდით"

"იცით რა კერძები უყვარს? შემიძლია იდეები მოგაწოდოთ, მაგალითად ადვილია საცივის და ბაჟეს გაკეთება, შემიძლია ქართული სუნელები გამოგიგზავნოთ" - დახმარებას სთავაზობენ და საქციელს უქებენ კოვალსკის ქართველი და უცხოელი ინტერნეტმომხმარებლები.

მოგვიანებით, ფილიპ კოვალსკიმ დაწერა, რომ აშშ-ში მდებარე ერთ-ერთმა ქართულმა რესტორანმა ქართული ღვინო გაუგზავნა, კარგი ამბავია ისიც, რომ ოჰაიოში მცხოვრები რამდენიმე ქართველი დაუკავშირდა და დახმარება შესთავაზეს ქართული კერძების მომზადებაში.

"მადლობა ყველას! ქედს ვიხრი ქართველების სტუმარმასპინძლობისა და ადამიანურობის გამო" - წერს კოვალსკი.

AMBEBI.GE ცდილობს აშშ-ში დაუკავშირდეს მეგობრის დახმარების მსურველ მამაკაცს და შემოგთავაზებთ ისტორიის გაგრძელებას...