"25 000 მოქალაქე, რომელმაც გადაწყვიტა ბინა შეეძინა, დაგვეტოვებინა ბედის ანაბარა და შენობების ჩონჩხები დარჩენილიყო თბილისში?" - გიორგი გახარია

საქართველოს პარლამენტში პრემიერ-მინისტრს უსმენენ. გიორგი გახარია პარლამენტში "ნაციონალური მოძრაობისა" და "ევროპული საქართველოს" ფრაქციებმა ინტერპელაციის წესით დაიბარეს.

ერთ-ერთი საკითხი, რომელზეც გახარიას პასუხის გაცემა მოუხდა, დეველოპერებისთვის ანტიკრიზისული გეგმის ფარგლებში, მთავრობის მიერ იპოთეკური სესხების სუბსიდირების თემაა. ამ კონტექსტში გახარიამ "ნაციონალური მოძრაობის" პერიოდი გაიხსენა, როცა 2008 წლის კრიზისის შედეგ, უამრავი მშენებლობა შეჩერდა და მოქალაქეები ღია ცისქვეშ დარჩნენ:

"ბატონმა რომან გოცირიძემ დაგვიწუნა პროექტი, სამშენებლო სექტორის მხარდასაჭერად. ბოლო სამი წლის განმავლობაში, ჩვენმა 25 000-მდე მოქალაქემ იპოთეკური სესხით შეიძინა სამშენებლო კომპანიისგან საცხოვრებელი, პირველი გადახდები დაიწყო ან შენატანი შეიტანა, ამ ხალხის საცხოვრებელი ბინები ჯერ აშენებული არ არის და გამოდის, რომ ბატონი რომანი მთავაზობდა, სამშენებლო კომანიები და ეს მოქალაქეები მიმეტოვებინა ზუსტად ისე, როგორც მათ მიატოვეს 2008 წელს სამშენებლო კომპანიები, ადამიანები რომელთაც ბინები ჰქონდათ ნაყიდი და ათობით ათასი ადამიანი საცხოვრებელი ფართის გარეშე დარჩა, მაშინ როცა ფულის ნაწილი ჰქონდათ გადახდილი.

ეს პრობლემა ჩვენ დღემდე ვერ მოვაგვარეთ და თბილისის მერიას უწევს გადაწყვეტილებების მიღება, რადგან დაუმთავრებელი შენობები, ჩონჩხები, რომლითაც გადატენილია თბილისი, არის სახლები, სადაც ადამიანებმა ფული გადაიხადეს 2008 წლამდე და დღეს საცხოვრებელი არ აქვთ. აი, რას გვთავაზობდა ბატონი რომანი, რომ 25 000 მოქალაქე, რომელმაც გადაწყვიტა ბინა შეეძინა, თურმე უნდა დაგვეტოვებინა ბედის ანაბარა და ეს პროექტებიც ჩონჩხებივით დარჩენილიყო თბილისში" - განაცხადა გახარიამ პარლამენტში გამოსვლისას.